ޗައިނާ އާއި ރާއްޖެއިން ހަދާފައިވާ މިނިވަން ވިޔަފާރީގެ އެއްބަސްވުން (އެފްޓީއޭ) އިން މިހާރު ކުރަމުންދާ ވިޔަފާރިއަކަށް އަސަރެއް ނުކުރާނެ ކަމަށް އިކޮނޮމިކް މިނިސްޓަރު މުހައްމަދު ސައީދު މިއަދު ވިދާޅުވެއްޖެ އެވެ.
މިނިވަން ވިޔަފާރީގެ އެއްބަސްވުން ޖެނުއަރީ 1، ގައި ފަށާނެކަން އިއުލާން ކުރުމަށް ބޭއްވި ރަސްމިއްޔާތުގައި ސައީދު ވިދާޅުވީ ރާއްޖެއިން ޗައިނާއާ އެކު ހެދި މިނިވަން ވިޔަފާރި އެއްބަސްވުމާ އެކު ޑިއުޓީއަކާ ނުލައި ތަކެތި ރާއްޖޭގެ ބޯޑަރަށް އެތެރެވުމުން މިހާރު ކުރަމުންދާ ވިޔަފާރިއަށް އަސަރު ނުކުރާނެ ކަމަށެވެ.
"އަޅުގަނޑުމެން ގޮސް ތަކެތި ގަންނަނީ އެ ލިބޭ މުދަލެއްގެ ކޮލިޓީ އާއި އަގާއި އަދި ލިބުމުގެ ފަސޭހަ އާއި ލުއިތަކަށް ބަލާފައި. ހަމަ މި ގޮތް އޮންނާނެ ގައުމުތަކާއި ވިޔަފާރި ކުރުމުގައި ވެސް. އިލެކްޓްރޯނިކްސް، ފަރުނީޗަރު، ކޮންސްޓްރަކްޝަން މެޓީރިއަލް، ނޫނީ އެހެން ގޮސް އާންމުކޮށް އަޅުގަނޑުމެން ގައުމަށް އިމްޕޯޓު ކުރާ ހުރިހާ މުދަލެއް ވެސް ކޮންޒިއުމާ ބޭނުންވާ ވަރަކަށް ބޭނުން ކޮލިޓީއެއްގެ އެއްޗެއް ކޮންޒިއުމާ މި ގަންނަނީ،" ސައީދު ވިދާޅުވި އެވެ.
"އެހެންވީމަ އެ މުދާ އަޅުގަނޑުމެންނަށް މި ވާ ގޮތަކީ ޑިއުޓީއަކާއި ނުލައި ދިވެހިރާއްޖޭގެ ބޯޑަރަށް އެތެރެ ކުރެވޭ ގޮތް މިވަނީ. ދެން މިއާ ގުޅިގެން ޓްރެޑިޝަނަލް މާކެޓްސް ގެއްލުމުގެ އެއްވެސް ފުރުސަތެއް އޮންނާނެ ކަމަކަށް އަޅުގަނޑަކަށް ގަބޫލެއް ނުކުރެވޭ، ވިޔަފާރި ކުރާ އެއްވެސް ބަޔަކު ގަބޫލު ކުރާނެ ކަމަށް، ޓްރެޑިޝަނަލް މާކެޓުން ގަތުމުގެ ފުރުސަތު އަދިވެސް އެބަ އޮތް."
ސައީދު ވިދާޅުވީ މިނިވަން ވިޔަފާރީގެ އެއްބަސްވުމެއް ހެދުމަށް އިންޑިއާއާ އެކު އެއްބަސްވެ، އެކަމާ ގުޅިގެން ކުރަން ޖެހޭ މަޝްވަރާތައް ކުރަމުންދާއިރު، އިނގިރޭސިވިލާތާ އެކު ވެސް މިނިވަން ވިޔަފާރީގެ އެއްބަސްވުމެއް ހެދުމުގެ މަޝްވަރާތައް ކުރިއަށް ގެންދާ ކަމަށެވެ.
މީގެ އިތުރުން ތުރުކީއާ އެކު ވެސް މިނިވަން ވިޔަފާރީގެ އެއްބަސްވުމެއްގައި ސޮއިކުރެވިފައިވާއިރު، އެ އެއްބަސްވުމަށް އަންނަ އަހަރުގެ ފުރަތަމަ ކުއާޓަރުގައި އަމަލު ކުރަން ފެށޭނެ ކަމަށެވެ. .
ތާރީހުގައި ރާއްޖެއިން ސޮއިކުރާ ފުރަތަމަ އެފްޓީއޭގެ ދަށުން ޗައިނާއިން ރާއްޖެއަށް އެތެރެ ކުރާ 70 ޕަސަންޓުގެ ތަކެތިން ޑިއުޓީ މައާފްވެގެންދާކަން ފާހަގަކުރައްވާ ސައީދު ވިދާޅުވީ ކުރިއަށް އޮތް އެ އަދަދު 20 ޕަސަންޓު އިތުރުކޮށް ޖުމްލަ 90 ޕަސަންޓުގެ ތަކެތިން ޑިއުޓީ މައާފްވެގެންދާނެ ކަމަށެވެ. އަދި ރާއްޖެއިން އެކްސްޕޯޓުކުރާ ތަކެތީގެ 95 ޕަސަންޓު ތަކެތި އެއްވެސް ޑިއުޓީއެއް ނުނަގައި އެފްޓީއޭގެ ދަށުން އެކްސްޕޯޓު ކުރެވޭނެ ކަމަށް އޭނާ ވިދާޅުވި އެވެ.
"ޓެރިފް އެއްކޮށްހެން ކެނޑިގެންދާނެ 70 ޕަސަންޓު ގާތްގަނޑަކަށް އައިޓަމްސްގެ ދިވެހިރާއްޖެއަށް އެތެރެކުރާ ފުރަތަމަ ދުވަހުން ފެށިގެން ވެސް. އޭގެ ތެރޭގައި ޗައިނާއަށް އެކްސްޕޯޓުކުރާ އައިޓަމްތަކުގެ ތެރޭގައި 95 ޕަސަންޓު ހަމަ ސުން ޕަސަންޓުގައި އެކްސްޕޯޓު ކުރެވޭނެ. މިއާ އެކުގައި ފަސް އަހަރު ދުވަހުގެ ތެރޭގައި އިތުރު ގާތްގަނޑަކަށް 20 ޕަސަންޓާ އެކުގައި 90 ޕަސަންޓާ ހަމައަށް ދިވެހިރާއްޖެއަށް އެތެރެކުރާ ޗައިނާގެ ހުރިހާ މުދަލަކުން ޑިއުޓީ މައާފްވެގެން އެދަނީ،" ސައީދު ވިދާޅުވި އެވެ.
ސައީދު ވިދާޅުވީ އެފްޓީއޭގެ ސަބަބުން ކުރިއަށް އޮތް ދުވަސްތަކުގައި ޗައިނާއާ އޮތް ގުޅުން ބަދަހިވެ، ރާއްޖެއަށް ވެސް އޭގެ ފައިދާތަކެއް ކުރާނެ ކަމަށެވެ. އެގޮތުން އެއްބަސްވުމުގެ ދަށުން ރާއްޖޭގެ 296 ސީފުޑް ޕްރޮޑަކްޓް ޗައިނާއަށް އެކްސްޕޯޓު ކުރެވުމުން މަސްވެރިކަމަށް ފައިދާ ކުރާނެ ކަމަށް ވެސް އޭނާ ވިދާޅުވި އެވެ.
"އެހެންވީމަ ދިވެހިރާއްޖޭގެ ވިޔަފާރީގެ ތާރީހުގައި، ދިވެހިރާއްޖޭގެ މި ދިގު ތާރީހުގައި ދުވަހަކު ވެސް ރާއްޖެއަށް ނުލިބޭފަދަ ވިޔަފާރީގެ ކުރިއެރޭނެ ފަދަ ފުރުސަތެއް ފަހިވެގެން މިދިޔައީ ދުނިޔޭގެ އެންމެ ބޮޑު މާކެޓަށް، އެންމެ ބޮޑު ބާޒާރަށް،" ސައީދު ވިދާޅުވި އެވެ.
އެފްޓީއޭއަށް އަމަލު ކުރަން އަންނަ ޖެނުއަރީ 1، އިން ފަށާނެކަން މިއަދު ރަސްމީކޮށް އިއުލާން ކުރީ ޗައިނާ އާއި ރާއްޖެއިން ބޭއްވި ރަސްމިއްޔާތެއްގަ އެވެ. އެ ރަސްމިއްޔާތުގައި ދެ ގައުމުގެ އިގުތިސޯދީ ވުޒާރާގެ އިސްވެރިން ބައިވެރިވި އެވެ.
