މެންޗެސްޓާ (ޑިސެމްބަރު 30) - މި ސީޒަނުގައި ދެން، މެންޗެސްޓާ ސިޓީ އަށް އިނގިރޭސި ޕްރިމިއާ ލީގު ކާމިޔާބު ކުރުމުގެ ފުރުސަތު ނެތް ކަމަށާއި މިހާރު ވިސްނުން ހުރީ ކުރިއަށް ހުރި ޓްރާންސްފާ މާކެޓުގައި ޓީމު ވަރުގަދަ ކުރުމަށް ކަމަށް ސިޓީގެ ކޯޗު ޕެޕް ގާޑިއޯލާ ބުނެފި އެވެ.
ރޭ ލެސްޓާ ސިޓީ އަތުން 2-0 ގެ ނަތީޖާ އަކުން ސިޓީ މޮޅުވި މެޗަކީ ގާޑިއޯލާ ސިޓީ އަށް ކޯޗުކަން ކޮށްދިން 500 ވަނަ މެޗެވެ.
ސިޓީ އިން ޕްރިމިއާ ލީގުގައި މި ފަހުން ކުޅުނު 10 މެޗުގެ ތެރެއިން މޮޅުވީ ދެ މެޗުންނެވެ. ލެސްޓާ އަތުން ސިޓީ އަށް ލިބުނު ތިން ޕޮއިންޓާ އެކު ލީގު ތާވަލުގެ ފަސް ވަނަ އަށް އެ ޓީމު ޖެހިލިޔަސް، ލީގު ތާވަލުގެ އެއްވަނައިގައި އޮތް ލިވަޕޫލްއާ 14 ޕޮއިންޓް ތަފާތު އެބަހުއްޓެވެ. އެއީ، އަދި ލިވަޕޫލް އެއް މެޗު މަދުން ކުޅެގެންނެވެ.
"ޕްރިމިއާ ލީގު ކާމިޔާބުކުރެވޭ ވަރަށް ވުރެ ދުރުގައި މިހާރު މިތިބީ. އަހަރެމެންގެ އެހެން ޓާގެޓްތައް އެބަހުރި މި ސީޒަނަށް. އެފްއޭ ކަޕް ކަހަލަ މުބާރާތްތައް ކާމިޔާބުކުރުން، ލީގުގެ ގަދަ ހަތަރެއްގައި ހިމެނުން" ގާޑިއޯލާ ބުންޏެވެ.
ލީގަށް ވާދަކުރުމުގެ ފުރުސަތު ސިޓީ އަށް ގެއްލުނު ހިސާބެއްގެ ގޮތުގައި ގާޑިއޯލާ ފާަހަގަކުރީ އަމިއްލަ ދަނޑުގައި ވާދަވެރި މެންޗެސްޓާ ޔުނައިޓެޑް އަތުން ބަލިވި މެޗަށެވެ.
ގާޑިއޯލާ ބުނީ ސިޓީ އަށް ދިމާވި އަނިޔާގެ މައްސަލަ ހައްލުކުރަން ޖެނުއަރީ ޓްރާންސްފާ މާކެޓުގައި އެ ޓީމަށް ކުޅުންތެރިން ގެންނާނެ ކަމަށެވެ.
މި ސީޒަނުގެ ބޮޑުބައި ސިޓީން ކުޅެމުން އަންނަނީ މުހިންމު ގިނަ ކުޅުންތެރިން ނުލަ އެވެ. އެ ގޮތުން މެދުތެރޭގައި މުހިންމު ދައުރެއް އަދާކުރި، ސްޕެއިނުގެ މިޑްފީލްޑަރު، ރޮޑްރީ އަށް އަނިޔާވުން އެއީ ސިޓީ އަށް ފޫނުބެއްދުނު މައްސަލަ އެއް ކަމަށް ގާޑިއޯލާ ވަނީ އެއްބަސްވެފަ އެވެ.
"ބައެއް މަގާމުތަކުގައި އަހަރެމެންއަށް އެހީ އެބަ ބޭނުންވޭ. އެކަންތައް ހައްލުކުރަން ކުޅުންތެރިން އަންނަ ޓްރާންސްފާ މާކެޓުގައި ގެންނާނަން" ގާޑިއޯލާ ބުންޏެވެ.
