ރާއްޖޭގައި އޮޕަރޭޓު ކުރަމުންދާ 11 ރިސޯޓަކުން ސާވިސް ޗާޖު ރުފިޔާއިން ދޭން ނިންމައިފި އެވެ.
ޓޫރިޒަމް އެމްޕްލޯއީސް އެސޯސިއޭޝަން އޮފް މޯލްޑިވްސް (ޓީމް) ގެ ޖެނެރަލް ސެކްޓްރީ މައުރޫފް ޒާކިރު "އަދަދު" އަށް ވިދާޅުވީ މިހާތަނަށް 11 ރިސޯޓަކުން ސާވިސް ޗާޖު ރުފިޔާއިން ދޭން ނިންމި ކަމުގެ ސާކިއުލާ ލިބިފައިވާ ކަމަށެވެ.
"11 ރިސޯޓެއްގެ ސާކިއުލާ ވަނީ ލިބިފައި. ސާވިސް ޗާޖު ރުފިޔާއިން ދޭން ނިންމި ރިސޯޓުތައް މިދަނީ ދެނެގަންނަމުން. ވަރަށް އަވަހަށް އެ ރިސޯޓުތައް ހާމަ ކުރާނަން،" އޭނާ ވިދާޅުވި އެވެ.
ސާވިސް ޗާޖަކީ ޑޮލަރުން ދޭން ޖެހޭ އެއްޗެއްކަން ގާނޫނުގައި ކަނޑައެޅިފައި އޮތްއިރު، އެކަން އެގޮތަށް ނުކުރެވޭނެތީ މުވައްޒަފުންނާ މަޝްވަރާ ކުރަމުންދާ ކަމަށް ވެސް މައުރޫފް ވިދާޅުވި އެވެ.
މި ނޫހަށް ފުށިފަރު ރިސޯޓުން ޑިސެމްބަރު 25، ގައި ނެރުނު ސާކިއުލާ ލިބިފައިވާއިރު، އެ ސާކިއުލާއިން އެނގޭ ގޮތުގައި އެ ރިސޯޓުގެ މުވައްޒަފުންނަށް ޑިސެމްބަރު މަހުގެ ސާވިސް ޗާޖު ދިނުމަށް ނިންމާފައި ވަނީ ރުފިޔާއިންނެވެ.
އެ ރިސޯޓުން ސާވިސް ޗާޖު ރުފިޔާއިން ދޭން ނިންމީ ބޭރު ފައިސާ މާރު ކުރަން މަޖުބޫރު ކުރާ ގާނޫނުގެ ސަބަބުން ކަމަށް ސާކިއުލާގައި ބުނެފައިވެ އެވެ.
އަންނަ ކޮންމެ ޓޫރިސްޓެއްގެ ބޮލަކަށް ޑޮލަރު މާރުކުރަން މަޖުބޫރުކުރުމާ ގުޅިގެން ކުރިއަށް އޮތް ތަނުގައި މުސާރަ އާއި ސާވިސް ޗާޖު ދެވޭނީ ދިވެހި ރުފިޔާއިން ކަމަށް ޕަލްސް ކުންފުނިން އެ ކުންފުނީގެ މުވައްޒަފުންނަށް މީގެ ކުރިން އެންގި އެވެ. ބައެއް އެހެން ކުންފުނިތަކުން ވެސް މުވައްޒަަފުންނަށް މިފަދަ އެންގުންތައް އަންގާފައިވެ އެވެ.
ބޭރު ފައިސާއާ ބެހޭ ބިލު އޮތް ގޮތުން އަންނަ އަހަރުން ފެށިގެން "ކެޓެގަރީ އޭ" ގައި ހިމެނޭ ރިސޯޓުތަކަށް އަންނަ ކޮންމެ ޓޫރިސްޓެއްގެ ބޮލަކަށް 500 ޑޮލަރު ނުވަތަ މީލާދީ މަހެއްގެ ތެރޭގައި ލިބޭ އާމްދަނީގެ 20 ޕަސެންޓު މާރުކުރަން މަޖުބޫރެވެ. އަދި "ކެޓެގަރީ ބީ" ގައި ހިމެނޭ ސަފާރީތަކާއި ގެސްޓުހައުސްތަކާއި ހޮޓާތަކަށް އަންނަ ކޮންމެ ޓޫރިސްޓެއްގެ ބޮލަކަށް 25 ޑޮލަރު ނުވަތަ މީލާދީ މަހެއްގެ ތެރޭގައި ލިބޭ އާމްދަނީގެ 20 ޕަސެންޓު މާރުކުރަން ޖެހެ އެވެ.
ޓޫރިޒަމް ނޫން ވިޔަފާރިތަކުގެ ތެރެއިން ބޭރު ފައިސާ ޖަމާކުރުމާއި މާރުކުރުން މަޖުބޫރު ވަނީ ވޭތުވި އަހަރުގެ ތެރޭގައި 15 މިލިއަން ޑޮލަރަށް ވުރެ މަތިން އާމްދަނީ ލިބޭ ވިޔަފާރިތަކަށް އެކަންޏެވެ. މި ވިޔަފާރިތަކަށް ވެސް މީލާދީ މަހެއްގެ ތެރޭގައި ލިބޭ އާމްދަނީގެ 20 ޕަސެންޓު މާރުކުރަން މަޖުބޫރެވެ.
އެ ގާނޫނު، މަޖިލީހުގެ ކޮމިޓީ މަރުހަލާގައި އޮތްއިރު ޓޫރިޒަމް ދާއިރާގެ ވިޔަފާރިތަކުން ހިންގާ ދެ ޖަމިއްޔާ ކަމުގައިވާ މޯލްޑިވްސް އެސޯސިއޭޝަން ފޯ ޓްރެވަލް އިންޑަސްޓްރީސް (މަޓީ) އާއި މޯލްޑިވްސް އެސޯސިއޭޝަން އޮފް ޓްރެވަލް އެޖެންޓްސް އެންޑް ޓުވާ އޮޕަރޭޓާސް (މަޓާޓޯ) އިން ހުށަހެޅިކަންކަމަށް ރިއާޔަތްކޮށްފައި ނެތެވެ.
