ލަންޑަން (ޑިސެމްބަރު 27) - އިންގްލެންޑްގެ ކްރިކެޓް ތަރި، ބެން ސްޓޯކްސްގެ ފަލަމަސްގަނޑަށް ލިބުނު އަނިޔާއާ ގުޅިގެން ތިން މަސް ދުވަހަށް ކުޅުމާ ދުރުގައި ހުންނަން ޖެހިއްޖެ އެވެ.
މަޝްހޫރު އޯލްރައުންޑަރު، ސްޓޯކްސް، 33، ގެ ފަަލަމަސްގަނޑަށް އަނިޔާވީ މި މަހުގެ ކުރީކޮޅުގައި ޓެސްޓް މެޗެއްގައި ނިއު ޒީލެންޑާ ދެކޮޅަށް ކުޅެނިކޮށެވެ. މިއީ، ސްޓޯކްސްގެ ވާތުފައިގެ ފަލަމަސްގަނޑަށް މި އަހަރު އަނިޔާވި ދެ ވަނަ ފަހަރެވެ. މިދިޔަ އޮގަސްޓް މަހު ވެސް ސްޓޯކްސްގެ ފަލަަމަސްގަނޑަށް ލިބުނު އަނިޔާއަކަށް ފަރުވާ ހޯދާފައިވެ އެވެ.
ސްޓޯކްސް ބުނެފައިވަނީ، ފަލަމަސްގަނޑަށް ތަކުރާރުކޮށް އަނިޔާވަމުން އަންނާތީ، ޑޮކްޓަރުންގެ ޓީމުގެ ލަފާގެ މަތިން ނިންމާފައިވަނީ އަންނަ މަހު އޮޕަރޭޝަން ކުރުމަށް ކަމަށެވެ. އަދި މި އަނިޔާއިން ރިކަވާވެ، އޭޕްރީލް މަހު އެނބުރި ކުޅުމަށް އާދެވޭނެ ކަމަށް ސްޓޯކްސް ވަނީ ބުނެފަ އެވެ.
އަނިޔާގެ ސަބަބުން ސްޓޯކްސް އަށް ގިނަ މުބާރާތްތަކެއް ގެއްލޭނެ އެވެ. އޭގެ ތެރޭގައި، އަންނަ މަހު ދެކުނު އެފްރިކާގައި ބާއްވާ ފްރެންޗައިސް ކްރިކެޓް ލީގާއި އިންގްލެންޑުން އިންޑިއާއާ ދެކޮޅަށް ކުޅޭ ވައިޓް ބޯލް ޓުއާގެ އިތުރުން، ފެބްރުއަރީ މަހު ޕާކިސްތާންގައި ފަށަން ނިންމާފައިވާ ޗެމްޕިއަންސް ޓްރޮފީ މުބާރާތް ހިމެނެ އެވެ.
މީގެ އިތުރުން، ސްޓޯކްސް ވަނީ، މާޗް މަހު ފަށާ އިންޑިއަން ޕްރިމިއާ ލީގުގެ އޯކްޝަނުން ވެސް އަމިއްލަ އަށް ވަކިވެފަ އެވެ.
