ލަންޑަން (ޑިސެމްބަރު 19) - ގައުމެއްގެ ބޮޑުވަޒީރުކަން ކުރުމަށް ވުރެ ފުޓްބޯޅަ ޓީމެއްގެ ކޯޗުކަމުގެ ވަޒީފާ އަދާކުރަން އުނދަގޫ ކަމަށް ޓޮޓެންހަމް ހޮޓްސްޕާސްގެ ކޯޗުކަމާ ހަވާލުވެ ހުރި އޮސްޓްރޭލިއާގެ ކޯޗު އަންގޭ ޕޮސްޓެކޮގްލޫ ބުނެފި އެވެ.
ކުރިން ސެލްޓިކަށް ކޯޗުކޮށްދިން ޕޮސްޓެކޮގްލޫ، ޓޮޓެންހަމްގެ ކޯޗުކަމާ ހަވާލުވީ، މިދިޔަ އަހަރުގެ ޖޫން މަސް ތެރޭގަ އެެވެ.
މިދިޔަ އާދިއްތަ ދުވަހު އިނގިރޭސި ޕްރިމިއާ ލީގުގައި ސައުތެމްޓަން އަތުން ޓޮޓެންހަމް މޮޅުވިއިރު، އެ ނަތީޖާއާ އެކު، އެ ޓީމަށް ވަނީ ފަސް މެޗަަށް ފަހު މޮޅެއް ލިބިފަ އެވެ. އެ މެޗަށް ފަހު، ސައުތެމްޓަންގެ ކޯޗު ރަސަލް މާޓިން ވަކިކުރިއިރު، އޭނާ އަކީ މި ސީޒަނުގައި ޕްރިމިއާ ލީގުން ވަޒީފާ ގެއްލުނު ހަތަރު ވަނަ ކޯޗެވެ.
މީގެ ކުރިން، ލެސްޓާ ސިޓީގެ ކޯޗު ސްޓީވް ކޫޕާ ވަކިކުރިއިރު، މެންޗެސްޓާ ޔުނައިޓެޑުން އެރިކް ޓެން ހާގް އަދި ވުލްވްސް އިން ގެރީ އޮނީލް ވަނީ ވަކިކޮށްފަ އެވެ.
ޕޮސްޓެކޮގްލޫ ބުނީ، ފުޓްބޯޅަ ޓީމެއްގެ ކޯޗަކަށް ހުންނައިރު، ފެންވަރު ސާބިތުކޮށްދޭން ކޮންމެ ހަފްތާ އަކު "އިންތިހާބަކާ ކުރިމަތިލާންޖެހޭ" ކަމުގެ އިހުސާސް ވެސް ކުރެވޭ ކަމަށެވެ.
"މިއީ ކޮންމެ ގޮތަކަށް ބެލިޔަސް ދިރިއުޅުމަކަށް މިހާރު އަދާކުރަން ޖެހޭ އެންމެ އުނދަގޫ ވަޒީފާ. ތި މީހުން ބުނެފާނެ ސިޔާސީ ކަންކަމޭ އުނދަގުލީ، އެކަމަކު، އަހަރެންގެ ނަޒަރުގައި މިއީ (ފުޓްބޯޅަ ޓީމެއްގެ ކޯޗުކަމަކީ) އެންމެ އުނދަގޫ މަސައްކަތް،" ޕޮސްޓެކޮގްލޫ ބުންޏެވެ.
"ޕްރައިމް މިނިސްޓަރު ހޮވަނީ ފަސް އަހަރުން، އެހެންނު؟ އެކަމަކު، އަހަރެެމެން އެބަ ކުރިމަތިލާން ޖެހޭ އިންތިހާބަކާ ކޮންމެ ހަފްތާ ބަންދެއްގައި، ވޯޓު ލިބެނީ މޮޅުވީމަ ނުވަންޏާ ގާތްގަނޑަކަށް ހުރިހާ ކަމެއް ނިމުމާ ގާތުގައި ތި ހުރެވެނީ،"
އިނގިރޭސި ލީގު ކަޕްގެ ސެމީ ފައިނަލުގެ ޖާގައެއް ހޯދަން ޕޮސްޓެކޮގްލޫ މިރޭ ޓޮޓެންހަމް ގޮވައިގެން އަމިއްލަ ދަނޑުގައި ކުޅެނީ މެންޗެސްޓާ ޔުނައިޓެޑާ އެވެ. ޓޮޓެންހަމް އިން އެންމެ ފަހުން ތަށްޓެއްގައި އަތްލީ 2008 ވަނަ އަހަރު އެެވެ. އެ ފަަހަރު އެ ޓީމުން ހޯދީ ލީގު ކަޕް ޗެމްޕިއަންކަމެވެ.
ޕޮސްޓެކޮގްލޫ ބުނީ، އޭނާ ޓޮޓެންހަމްގައި ދިގު މުއްދަތަކަށް ހުންނަން ކުރަން ޖެހޭ މަސައްކަތް ވަރަށް ސާފު ކަމަށާއި އެއީ އެ ކްލަބަށް ތަށި ހޯދައިދިނުން ކަމަށެވެ.
