ފީފާ ބެސްޓް އެވޯޑްސްގައި ރާއްޖޭގެ ގައުމީ ފުޓްބޯޅަ ޓީމުގެ ކެޕްޓަން، ސަމޫހު އަލީ (ސަމުއްޓޭ) އާއި ކޯޗު އަލީ ސުޒޭން، އެއް ވަނަ ނޮމިނޭޝަން އަކަށް ރެއާލް މެޑްރިޑަށް ކުޅޭ ބްރެޒިލްގެ ފޯވާޑް، ވިނީޝިއުސް އަށް ވޯޓު ދީފި އެވެ.
އެ ގޮތުން، ސުޒޭން އާއި ސަމުއްޓެ ވޯޓު ދީފައިވަނީ، މި ފަހަރުގެ ބެސްޓް އެވޯޑްސް ހޯދި ވިނީޝިއުސް އަށެވެ. ސަމުއްޓެގެ ވޯޓު ތަރުތީބަކީ، ވިނީޝިއުސް، ރޮޑްރީ އަދި ބެލިންހަމް އެވެ. އަދި ސުޒޭންގެ ވޯޓު ތަރުތީބަކީ، ވިނީޝިއުސް، ބެލިންހަމް އަދި ރޮޑްރީ އެވެ.
އެންމެ މޮޅު ކޯޗަކު ހޮވަން، ސަމުއްޓެ ވޯޓު ދީފައިވަނީ، ޕެޕް ގާޑިއޯލާ، ކާލޯ އަންޗެލޮޓީ އަދި ޒަބީ އަލޮންސޯ އަށެެވެ، ސުޒޭން ވޯޓު ދީފައިވަނީ، އަންޗެލޮޓީ، ލިއޮނަލް ސްކަލޯނީ އަދި ލުއިސް ޑި ލަ ފުއެންޓޭ އަށެވެ.
މީޑިއާ އިން ރާއްޖޭގެ ފަރާތުން ވޯޓު ލަނީ ޝިމާޒް އަލީ (ޝިމައްޓެ) އެވެ. އޭނާ މޮޅު ކުޅުންތެރިޔާގެ މަގާމަށް ވޯޓު ދީފައިވަނީ، ވިނީޝިއުސް، ބެލިންހަމް އަދި އާލިން ބްރައުޓް ހާލަންޑް އަށެވެ. އަދި އެންމެ މޮޅު ކޯޗަށް ވޯޓު ދީފައިވަނީ، އަންޗެލޮޓީ، ގާޑިއޯލާ އަދި ސްކަލޯނީ އަށެވެ.
އެންމެ މޮޅު އަންހެން ކުޅުންތެރިޔާ ހޮވަން، ރާއްޖޭގެ އަންހެން ޓީމުގެ ކެޕްޓަން، ހައްވާ ހަނީފާ ވޯޓު ދީފައިވަނީ، އައިޓާނާ ބޮންމާޓީ އާއި ލިންޑްސޭ ހޮރާން އަދި ޓްރިނިޓީ ރޮޑްމަން އަށެވެ. އަދި އަންހެން ޓީމުގެ ކޯޗު މުހައްމަދު ނިޒާމް (ނިޒާމްބެ) ވޯޓު ދީފައިވަނީ، ބޮންމާޓީ އާއި ސޯފިއާ ސްމިތު އަދި ކެއިރާ ވޮލްޝް އަށެވެ.
ބެސްޓް އެވޯޑްސްގެ އެންމެ މޮޅު ކުޅުންތެރިޔާ އަށް މި ސަރަަހައްދުގެ އެހެން ގައުމުތަކުގެ ވޯޓަށް ބަލާއިރު، ބަންގްލަދޭޝްގެ ކެޕްޓަން، ސޮހޭލް ރާނާ ވޯޓު ދިނީ ލިއޮނަލް މެސީ، ވިނީޝިއުސް އަދި ބެލިންހަމް އަށެވެ. އަފްގާނިސްތާންގެ ޝަރީފް މުހައްމަދު ވޯޓު ދީފައިވަނީ، ލަމީން ޔަމާލް، ވިނީޝިއުސް އަދި ޓޯނީ ކްރޫސް އަށެވެ. އިންޑިއާގެ ސަންދޭޝް ޖިންގަން ވޯޓު ދިނީ، ރޮޑްރީ، ކާވަހާލް އަދި ވިނީޝިއުސް އަށެވެ. ނޭޕާލްގެ ކިރަން ކުމާރް ވޯޓު ދިނީ، ބެލިންހަމް، ޔަމާލް އަދި ފްލޯރިއަން ވާޓްޒް އަށެވެ. ޕާކިސްތާންގެ އަބްދުﷲ އިގުބާލް ވޯޓު ދިނީ، ރޮޑްރީ، ވިނީޝިއުސް އަދި ކާވަހާލް އަށެވެ. އަދި ސްރީ ލަންކާގެ ސުޖަން ޕެރޭރާ ވޯޓު ދިނީ، ވިނީޝިއުސް، ރޮޑްރީ އަދި ކްރޫސް އަށެވެ.
