އިންޑިއާގެ ކޯސްޓުގާޑުގެ ދެ ބޯޓެއް މާލޭގައި ބަނދަރުކޮށްފި އެވެ.
މި ދެ ބޯޓު ރާއްޖެ އައިސް މާލެ ބޭރުގައި ބަނދަރުކުރީ އިއްޔެ ހެނދުނު ކަމަށް މި ނޫހަށް މައުލޫމާތު ލިބިފައިވެ އެވެ.
އިންޑިއާ ކޯސްޓުގާޑުގެ ރަސްމީ އެކްސް އެކައުންޓުން އިއްޔެ ހަވީރު ކުރި ޕޯސްޓެއްގައި ބުނީ ކޯސްޓު ގާޑު އުޅަނދު 'ވައިބާވް' އަދި 'އަބިރާޖް' ރާއްޖޭގައި ބަނދަރުކުރީ ޕޯޓްކޯލެއްގެ ދަށުން ކަމަށެވެ.
އެ ޕޯސްޓުގައިވާ ގޮތުން މި ދަތުރުގެ ތެރެއިން ރާއްޖެ-އިންޑިއާ ގުޅިގެން ހިންގާ ކަނޑުގެ އޮޕަރޭޝަންތައް ވަރުގަދަކުރުމަށް މަސައްކަތް ކުރެވިގެންދާނެ ކަމަށްވެ އެވެ. ހާއްސަކޮށް ކަނޑަށް ކުނިއެޅުމުގެ މައްސަލަތަކާއި ސާޗް އެންޑް ރެސްކިއު އޮޕަރޭޝަންތަކަށް އިސްކަމެއް ދެވިގެންދާނެ އެވެ.
މި ދަތުރުގައި ރާއްޖޭގެ ސިފައިންނާއި އިންޑިއާ ސިފައިން އެކުގައި ކުޅިވަރުގެ ހަރަކާތްތައް ބާއްވާ، ތަމްރީނުތައް ކުރިއަށް ގެންގޮސް ތިމާވެށީގެ ދާއިރާއިން މައުލޫމާތު ފޯރުކޮށްދިނުމުގެ ސެޝަންތަކެއްވެސް ކުރިއަށް ގެންދަން ވަނީ ހަމަޖެހިފަ އެވެ.
މިއީ އިންޑިއާ ކަނޑުގެ ސަލާމަތާއި ސަރަހައްދީ ގުޅުމަށް އިންޑިއާއިން ދޭ އިސްކަމުގެ ރަމްޒެއް ކަމަށްވެސް އެ ގައުމުގެ ކޯސްޓުގާޑުން ބުނެފައިވެ އެވެ.
އިންޑިއާގެ ކޯސްޓުގާޑު ބޯޓުތައް ބަނދަރުކުރުމާއެކު ތަފުސީލަށް އެދުމުން އެމްއެންޑީއެފް އިން ވަނީ އާންމުކުރާ މައުލޫމާތު ފިޔަވާ އިތުރު ތަފުސީލެއް ނުދެވޭނެ ކަމަށް ބުނެފަ އެވެ. ސިފައިންގެއިން މިހާތަނަށް މި ދެ ބޯޓު ބަނދަރުކުރުމާ ގުޅޭގޮތުން އެއްވެސް މައުލޫމާތެއް ދީފައެއް ނުވެ އެވެ.
