ޕެރިސް (ޑިސެމްބަރު 17) - އެފްރިކާގެ މައި ފުޓްބޯޅަ ޖަމިއްޔާ، ކޮންފެޑެރޭޝަން އޮފް އެފްރިކަން ފުޓްބޯލް (ކާފް) އިން ހޮވި އަހަރުގެ އެންމެ މޮޅު ކުޅުންތެރިޔާގެ މަގާމު އެޓަލަންޓާ އަށް ކުޅެމުން އަންނަ ނައިޖީރިއާގެ ފޯވާޑް، އަޑެމޯލާ ލުކްމަން އަށް ލިބިއްޖެ އެވެ.
މި މަގާމަށް ލުކްމަންއާ ވާދަކުރީ މޮރޮކޯގެ އަޝްރަފް ހަކީމީ، އައިވަރީ ކޯސްޓްގެ ސިމޯން އަޑިންގްރާ، ގިނީގެ ސޭހޫ ގިރާސީ އަދި ދެކުނު އެފްރިކާގެ ރޮންވެން ވިލިއަމްސް އެވެ.
މިދިޔަ އަހަރު ކާމިޔާބު ސީޒަނެއް ނިންމާލި ލުކްމަން، 27، ވަނީ އެޓަލަންޓާއާ އެކު ޔޫރޮޕާ ލީގު ހޯދުމުގެ އިތުރުން ނައިޖީރިއާއާ އެކު، އެފްރިކަން ކަޕް އޮފް ނޭޝަންސްގެ ރަނަރަޕަށް ގޮސްފަ އެވެ. ބަޔާ ލެވަކޫސަން އަތުން ޔޫރޮޕާ ލީގުގެ ފައިނަލުގައި އެޓަލަންޓާ މޮޅުވި މެޗުގައި ލުކްމަން ހެޓްރިކެއް ހެދިއިރު، މިއީ، 1975 ވަނަ އަހަރުގެ ފަހުން ޔޫރަޕްގެ ކްލަބް ފައިނަލެއްގައި ފެނުނު ފުރަތަމަ ހެޓްރިކް އެެވެ.
އައިވަރީ ކޯސްޓް އަތުން ނައިޖީރިއާ ވަނީ އެފްރިކަން ކަޕް އޮފް ނޭޝަންސް ފައިނަލުގައި ބަލިވެފަ އެވެ. އެކަމަކު، އެ މުބާރާތުގައި މޮޅު ކުޅުމެއް ދައްކައި ތިން ގޯލު ޖެހި ލުކްމަން ވަނީ މުބާރާތުގެ ޑްރީމް ޓީމުން ޖާގަ ހޯދައިފަ އެވެ.
އިނގިރޭސި ޕްރިމިއާ ލީގުގައި އެވަޓަން، ފުލަމް އަދި ލެސްޓާ ސިޓީ އަށް ކުޅުމުގެ އިތުރުން ޖަރުމަނު ލީގުގައި އާރްބީ ލައިޕްޒިގުން ވެސް ފެނިގެންދިޔަ ލުކްމަން އަށް މި ފަހަރުގެ ބެލޮންޑިއޯ އެވޯޑުން ލިބުނީ 14 ވަނަ އެވެ. އެޓަލަންޓާ އިން މި ވަގުތު އިޓާލިއަން ލީގުގެ އެއް ވަނައިގައި އޮތްއިރު ލުކްމަން ވަނީ މި ސީޒަނުގައި މިހާތަނަށް އަށް ގޯލު ޖަހައިފަ އެވެ.
ނައިޖީރިއާގެ ކުޅުންތެރިންނަށް ޖެހިޖެހިގެން ދެ ވަނަ ފަހަރަށް މި ވަނީ އެފްރިކާގެ މޮޅު ކުޅުންތެރިޔާގެ މަގާމު ލިބިފަ އެވެ. މިިދިޔަ އަހަރުގެ މޮޅު ކުޅުންތެރިއަކީ ނަޕޯލީ އަށް މިދިޔަ ސީޒަނުގައި ކުޅުމަށް ފަހު މި ވަގުތު ލޯން އެއްބަސްވުމެއްގެ ދަށުން ގަލަތަސަރާއި އަށް ކުޅޭ ފޯވާޑް، ވިކްޓަ އޮސިމެން އެވެ.
އެފްރިކާގެ އެންމެ މޮޅު އަންހެން ކުޅުންތެރިއަކީ، ޒިމްބާބްވޭގެ ފޯވާޑް ބާބްރާ ބަންޑާ އެވެ. އެމެރިކާ ލީގުގައި އޯލާންޑޯ ޕްރައިޑަށް ކުޅޭ ބާބްރާ އަކީ މި މަގާމު ހޯދި ޒިމްބާބްވޭގެ ފުރަތަމަ ކުޅުންތެރިޔާ އެވެ.
