އިދިކޮޅު ސިޔާސީ ޕާޓީތައް ކަމަށްވާ އެމްޑީޕީ އަދި ދަ ޑިމޮކްރެޓްސް އިން ގުޅިގެން މަސައްކަތްތައް ކުރެވޭނެ ގޮތެއް ހޯދޭނެ ކަމަށް ދަ ޑިމޮކްރެޓްސްގެ ކައުންސިލް މެންބަރު ސައިފު ފާތިހު ވިދާޅުވެއްޖެ އެވެ.
ގާނޫނުއަސާސީގެ ދިފާއުގައި ގެ ނަމުގައި އެ ޕާޓީން ބާއްވަމުން ގެންދާ ސިލްސިލާ ޖަލްސާތަކުގައި ތެރެއިން މިރޭގެ ޖަލްސާގައި ވާހަކަދައްކަވަމުން ސައިފު ވިދާޅުވީ، މި ސަރުކާރުން މަޖިލިސް މެންބަރުންނާއި ނޫސްވެރިން ކޮންޓްރޯލް ކުރަން ކުރާ މަސައްކަތްތަކާއި ލާމަރުކަޒީ ނިޒާމަށް ދެމުންދާ ގެއްލުންތަކާ ދެކޮޅަށް އެ ޕާޓީން ތެދުވާނެ ކަމަށެވެ.
އެގޮތުން، ޖަލްސާވެސް ބާއްވާނެ ކަމަށާއި މުޒާހަރާވެސް ކުރާނެ ކަމަށާއި ހައްޔަރުގައި ވެސް ތިބެން ޖެހޭނެ ކަމަށް ވިދާޅުވެ ސައިފު ވަނީ ގުޅެން ތައްޔާރަށް ތިބި ސިޔާސީ ޕާޓީތަކާއެކު މަޝްވަރާގެ މޭޒަށްވެސް ދާނެ ކަމަށެވެ.
"އަޅުގަނޑު މިވަގުތު، އަޅުގަނޑުމެންނާ އެއްކޮށް މި މަސައްކަތް ފަށްޓަވާފައި އެވާ އެމްޑީޕީއަށް މަރުހަބާ ދަންނަވަން. އިރާދަކުރެއްވިއްޔާ އަޅުގަނޑުމެން އެންމެން އެއްކޮށް މި މަސައްކަތް ކުރެވޭނެ ގޮތެއް ހޯދޭނެ،" ސައިފު ވިދާޅުވި އެވެ.
މި ސަރުކާރުން އަވަސް އަރުވާލައިގެން ގާނޫނުއަސާސީއަށް ގެނައި އިސްލާހުތަކާއެކު، ގާނޫނުއަސާސީގެ ދިފާއުގައި ގެ ނަމުގައި ހަރަކާތްތައް ފެށީ އެމްޑީޕީންނެވެ. އެގޮތުން ޖަގަހަ ޖަލްސާތަކުންގޮސް އެ ޕާޓީން ވަނީ އަންގާރަ ދުވަހުގެ ރޭ ކާނިވަލް ސަރަހައްދުގައި ބޮޑު ޖަލްސާއެއްވެސް ބާއްވާފަ އެވެ.
އެ ޖަލްސާގެ ކުރިން ބޭއްވި އެމްޑީޕީގެ ގައުމީ މަޖިލީހުން ވަނީ އެހެން ސިޔާސީ ޕާޓީތަކާ ގުޅިގެން އިދިކޮޅު ސިޔާސީ ހަރަކާތްތައް ހިންގުމަށް ފާސްކޮށްފަ އެވެ. އަދި، އެ ޕާޓީތަކާއި މަދަނީ ޖަމިއްޔާތަކާ ގުޅިގެން އިދިކޮޅު ސިޔާސީ ހަރަކާތްތައް މުޅި ރާއްޖެއަށް ފުޅާކޮށް އެކި ކަންކޮޅުތަކުގައި އިހުތިޖާޖުތައް ރާވައި ހިންގުމަށްވެސް އެ ރޭ ފާސްކުރި އެވެ.
ނަމަވެސް މިހާތަނަށް މި ނިންމުމުގެ ދަށުން އެއްވެސް ޕާޓީއަކާއެކު ސިޔާސީ މަސައްކަތް ފެށުމަށް ރަސްމީ މަޝްވަރާއެއް ބާއްވާފައެއް ނުވެ އެވެ.
އެމްޑީޕީއާއެކު ސިޔާސީ މަސައްކަތް ކުރެވޭނެ ގޮތެއް ހޯދޭނެ ކަމަށް ސައިފު ވިދާޅުވި ޑިމޮކްރެޓްސް އަކީ އެމްޑީޕީގެ ތެރެއިން އުފެދުނު ޕާޓީ އެކެވެ. ކުރީގެ ރައީސް މުހައްމަދު ނަޝީދު އިސްވެ ހުންނަވާ އެ ޕާޓީ އުފެއްދެވީ މިދިޔަ އަހަރު ބޭއްވި އެމްޑީޕީގެ ރިޔާސީ ޕްރައިމަރީއަށްފަހު ޖެހުނު މައްސަލަތަކަކާ ގުޅިގެންނެވެ.
އެ ދެ ޕާޓީގެ އިތުރުން، އަބްދުﷲ ޔާމީނު އިސްވެ ހުންނަވާ އުފެއްދެވި ޕީއެންއެފް އިން ވެސް ދަނީ މި ސަރުކާރާ ދެކޮޅަށް ސިޔާސީ މަސައްކަތްތަކެއް ކުރަމުންނެވެ.
ޑިމޮކްރެޓްސް އަދި ޕީއެންއެފްގެ އާންމު މެންބަރުން އެމްޑީޕީން ކުރިއަށް ގެންދިޔަ ބޮޑު ޖަލްސާގައި ބައިވެރިވި އެވެ.
