މިއަދުގެ އަލިފާނުގެ ހާދިސާގައި މާލެ ސިޓީ ކައުންސިލުގެ ލޭންޑް އެންޑް ބިލްޑިން އަދި ވައިޓަލް ރެޖިސްޓްރޭޝަން ޑިޕާޓްމެންޓުގައި ހުރި ލިޔެކިޔުންތަކެއް ހަލާކުވެފައި ވާތީ، ރައްޔިތުންނަށް ދޭ މުހިންމު ހިދުމަތްތަކެއް ހުއްޓުމަކަށް އަތުވެއްޖެ އެވެ.
މާލެ ސިޓީ ކައުންސިލުގެ ލޭންޑް އެންޑް ބިލްޑިން އަދި ވައިޓަލް ރެޖިސްޓްރޭޝަން ޑިޕާޓްމެންޓު ހުންނަނީ ހައުސިން މިނިސްޓްރީ އާއި އިންފްރާސްޓްރަކްޗާ މިނިސްޓްރީ ހިންގާ އިމާރާތުގެ ގޯތިތެރޭގަ އެވެ. މިއަދުގެ އަލިފާނުގެ ހާދިސާގައި އެ ދެ މިނިސްޓްރީ ހިންގަމުން ދިޔަ ޓިނުން ހަދާފައި ހުރި އިމާރާތް އެއްކޮށް ބިމާހަމަވިއިރު، އެތަނާ ޖެހިގެން ހުރި އެންވަޔަރަމެންޓު މިނިސްޓްރީ ހިންގަމުން ދިޔަ ގްރީން ބިލްޑިންގެ ބޮޑު ބައެއް ވެސް ވަނީ އަނދައިފަ އެވެ.
މާލެ ސިޓީ ކައުންސިލުގެ ޑެޕިއުޓީ މޭޔަރު އަހުމަދު ނަރީޝް "އަދަދު" އަށް ވިދާޅުވީ ސިޓީ ކައުންސިލްގެ އިމާރާތަށް އަލިފާނުގެ އަސަރުކޮށް، ބައެއް ލިޔުންތައް އަނދާފައިވާ ކަމަށެވެ. އެ އިމާރާތުގައި ހުރި ލިޔުންތައް ސިޓީ ކައުންސިލުން ވަނީ ގެންގޮސްފަ އެވެ.
އަލިފާނުގެ ހާދިސާއާ ގުޅިގެން ވަގުތީ ގޮތުން ހުއްޓިފައިވާ ހިދުމަތްތަކުގެ ތެރޭގައި އިމާރާތްތަކުގެ ރަޖިސްޓްރީ ހެދުމާއި، އިން ވަކި ކުރުމާއި، އިމާރާތް ކުރުމާ ގުޅޭ އެހެން ހިދުމަތްތައް ހިމެނޭ ކަމަށް ނަރީސް ވިދާޅުވި އެވެ.
ނަމަވެސް، އުފަންދުވަހުގެ ސެޓްފިކެޓު ހެއްދުން، ހުޅުމާލޭގައި ހުންނަ ސިޓީ ކައުންސިލްގެ އޮފީހުން ފަށާފައިވާ ކަމަށް އޭނާ ވިދާޅުވި އެވެ.
ސިޓީ ކައުންސިލުގެ ގަލޮޅު އުތުރު ދާއިރާގެ ކައުންސިލަރު ސައިފް ފާތިހު ވިދާޅުވީ ހިދުމަތްތައް އަލުން ފެށުމަށް ކުރަން ޖެހޭ މަސައްކަތްތައް ކުރުމުގައި 24 ގަޑިއިރު ވަންދެން ސިޓީ ކައުންސިލުން މަސައްކަތްތައް ކުރަމުންދާނެ ކަމަށެވެ.
ހައުސިން މިނިސްޓްރީ އާއި އިންފްރާސްޓްރަކްޗާ މިނިސްޓްރީ އަދި ގްރީން ބިލްޑިންގައި ރޯވި އަލިފާންގަނޑު މިހާރު ވަނީ ނިއްވާލައިފަ އެވެ. އެ ހާދިސާގައި އެއްވެސް މީހަކަށް ގެއްލުމެއް ނުލިބެ އެވެ.
