ގްރީން ބިލްޑިންގައި ރޯވި އަލިފާންގަނޑު ފެތުރި މާލެ ސިޓީ ކައުންސިލުގެ އިމާރާތުގައި ރޯވެ މާލޭ ރައްޔިތުންގެ މުހިންމު ލިޔެކިޔުންތަކަށް ގެއްލުން ވެފައިވާ ކަމަށް އެ ކައުންސިލުން ބުނެފި އެވެ.
ސިޓީ ކައުންސިލްގެ ޑެޕިއުޓީ މޭޔަރު މީޑިއާއަށް މައުލޫމާތު ދެއްވަމުން ވިދާޅުވީ މާލޭ ރައްޔިތުންގެ އުފަންދުވަހުގެ ސެޓްފިކެޓާއި، ރަށްވެހިކަމުގެ ރަޖިސްޓްރީ އާއި ގޯތީގެ ރަޖިސްޓްރީގެ އިތުރުން މުހިންމު ލިޔެކިޔުން ހުންނަ ކައުންސިލުގެ އިމާރާތަށް ގެއްލުންވެފައިވާ ކަމަށެވެ.
"މިތަނުގެ އެއްވެސް ޑޮކިއުމަންޓަކަށް ގެއްލުންވެއްޖެއްޔާ އެތައް ރައްޔިތަކަށް ލިބިގެންދާނެ ވަރަށް ބޮޑު ގެއްލުމަކަށް ވެގެންދާނެ. އެއީ އިޔާދަ ނުކުރެވޭ އެއްޗެއް. އެއީ އެއްވެސް ތާކު ހުންނާނެ އެއްޗެއް ވެސް ނޫން،" އޭނާ ވިދާޅުވި އެވެ.
ސިޓީ ކައުންސިލްގެ އިމާރާތުގައި ހުރި ތަކެތި ރައްކާ ކުރުމަށް ބޭރަށް ނެރެނީ -- ފޮޓޯ: މުހައްމަދު ޝަހުޒާން / އަދަދު
ނަރީޝް ވިދާޅުވީ ސިފައިންނާއި ފުލުހުންނާ ގުޅިގެން އެ އިމާރާތުގައި ހުރި އެއްޗެހި ނެރެ، ލިބިފައި ހުރި ގެއްލުންތައް ބެލުމުގެ މަސައްކަތް ކުރަމުންދާ ކަމަށެވެ.
"އަޅުގަނޑުމެންގެ ހިދުމަތްތައް ދޭ ތަން މިއީ. އެއްޗިސްތައް ވީހާ ވެސް ރައްކާތެރިކަމާ އެކު ކުރިއަށް ގެންދެވޭތޯ މަސައްކަތް ކުރަމުން މިދަނީ،" އޭނާ ވިދާޅުވި އެވެ.
"އަދަދު" އަށް ލިބިފައިވާ އެ ސަރަހައްދުގެ ވީޑިއޯތަކުން ފެންނަ ގޮތުގައި ސިފައިންނާއި މާލެ ސިޓީ ކައުންސިލުގެ މުވައްޒަފުން ދަނީ އެ އިމާރާތުގައި ހުރި ތަކެތި ބޭރުކުރުމުގެ މަސައްކަތް ކުރަމުންނެވެ. އަދި ފައިލްތަކާއި ލިޔެކިޔުންތަކާއި ބައެއް ފޮތްތަކުގެ އިތުރުން ކޮމްޕިޔުޓަރާއި އެހެން އާލާތްތަކާއި އޮފީސް ސާމާނު އެ ތަނުން ބޭރުކުރަމުންދާ މަންޒަރު ފެނެ އެވެ.
ހައުސިން މިނިސްޓްރީ އާއި އިންފްރާސްޓްރަކްޗާ މިނިސްޓްރީގައި ރޯވި އަލިފާން ނިއްވުމުގެ މަސައްކަތް އެމްއެންޑީއެފް އިން އަންނަނީ ކުރަމުންނެވެ. އަލިފާންގަނޑު މިހާތަނަަށް ކޮންޓްރޯލް ކުރެވިފައި ނުވާއިރު، ވަރަށް ބޮޑަށް އަލިފާންގަނޑު ވަނީ ފެތުރި ބޮޑެތި ގެއްލުންތަކެއް ވެފަ އެވެ.
