ޓިއުރިން، އިޓަލީ (ޑިސެމްބަރު 12) - ޔުއެފާ ޗެމްޕިއަންސް ލީގުގައި ރޭ އާސެނަލާއި ބާސެލޯނާ ކުޅުނު މެޗުތަކުން މޮޅުވިއިރު، ޔުވެންޓަސް އިން 2-0 އިން މެންޗެސްޓާ ސިޓީ ބަލިކޮށްފި އެވެ.
އާސެނަލުން އަމިއްލަ ދަނޑުގައި 3-0 އިން މޮނާކޯ ބަލިކުރިއިރު، ބާސެލޯނާ އިން ވަނީ ރަށުންބޭރުގައި 3-2 އިން ބޮރޫޝިއާ ޑޯޓްމަންޑްގެ މައްޗަށް ކުރިހޯދައިފަ އެވެ.
ޔުވެންޓަސްގެ އަލިއާންޒް އެރީނާގައި އެ ޓީމުން ސިޓީ ބަލިކުރި ގޯލުތައް ޖެހީ، ޑޫސާން ވްލާހޮވިޗް އާއި ވެސްޓެން މެކްކެނީ އެވެ. ވްލާހޮވިޗް ބޮލުން ފޮނުވާލި ބޯޅަ ސިޓީގެ ކީޕަރު އެޑަސަން މޮރާއެސް އަތުން ދޫވެގެން ވަނީ ގޯލު ރޮނގު ހުރަސްކޮށްފަ އެވެ. އަދި ބަދަލަކަށް ކުޅެން އެރި ދެ ކުޅުންތެރިން ގުޅިގެން ކުރި އެޓޭކެއްގައި ޓީމޮތީ ވެއާ ނަގައިދިން ހުރަހަކުން މެކްކެނީ ވަނީ އެކްރަބެޓިކް ކިކަކުން ގޯލު ޖަހައި، ޔުވެންޓަސް މޮޅުކޮށްފަ އެވެ.
ސިޓީ އަށް ލަނޑެއް ޖަހައިދޭން މި މެޗުގައި، އާލިން ބްރައުޓް ހާލަންޑާއި އިލްކާއި ގުންޑޮގާން ފޮނުވާލި ބޯޅަތައް ކާމިޔާބެއްނުވި އެވެ.
އެންމެ ފަހުން ހުރިހާ މުބާރާތެއްގައި ކުޅުނު 10 މެޗުގެ ތެރެއިން އެއް މެޗުން މޮޅުވެ، ހަތް މެޗުން ބަލިވި ސިޓީ މި ވަގުތު ޗެމްޕިއަންސް ލީގުގައި އޮތީ ހަ މެޗުން އަށް ޕޮއިންޓާ އެކު 22 ވަނައިގަ އެވެ. ޔުވެންޓަސް އޮތީ ހަ މެޗުން 11 ޕޮއިންޓާ އެކު 14 ވަނައިގަ އެވެ.
އާސެނަލުން ރޭ މޮނާކޯ ބަލިކުރި މެޗުގައި، ބުކާޔޯ ސަކާ ދެ ގޯލު ޖެހިއިރު، އަނެއް ލަނޑު ޖެހީ ކައި ހަވާޓްޒް އެވެ. މި ފަހަރުގެ ޗެމްޕިއަންސް ލީގުގައި ކުޅުނު ހަ މެޗުގެ ތެރެއިން، ހަަތަރު މެޗުން މޮޅުވެ، 13 ޕޮއިންޓް ހޯދާފައިވާ އާސެނަލް އޮތީ ތިން ވަނައިގަ އެވެ.
ލީގުގެ އެއް ވަނައިގައި އޮތީ ކުޅުނު ހަ މެޗުން ވެސް މޮޅުވެ 18 ޕޮއިންޓް ހޯދާފައިވާ ލިވަޕޫލް އެވެ. އަދި ދެ ވަނައިގައި އޮތީ ހަ މެޗުން 15 ޕޮއިންޓް ހޯދި ބާސެލޯނާ އެވެ.
ބާސެލޯނާ އިން ރޭ ޑޯޓްމަންޑް ދަނޑުގައި ގޯލު ޖެހީ، ފެރާން ޓޮރޭޒް ދެ ގޯލާއި ރަފީނިއާ އެވެ. ޑޯޓްމަންޑްގެ ގޯލުތައް ޖެހީ ސޭހޫ ގިރާސީ އެވެ.
