މެންޗެސްޓާ (ޑިސެމްބަރު 11) - މެންޗެސްޓާ ސިޓީ އަށް ފަހު އިތުރު ކްލަބެއްގެ ބެންޗުން ނުފެންނާނެ ކަމަށް އެ ޓީމާ ހަވާލުވެހުރި ސްޕެއިނުގެ ކޯޗު ޕެޕް ގާޑިއޯލާ ބުނެފި އެވެ.
ބާސެލޯނާ އާއި ބަޔާން މިއުނިކަށް ކުރިން ކޯޗުކޮށްދިން ގާޑިއޯލާ ސިޓީއާ ހަވާލުވީ 2016 ވަނަ އަހަރު އެވެ. ގާޑިއޯލާ ވަނީ އެ ޓީމަށް 18 ޓްރޮފީ (ބޮޑެތި މުބާރާތްތަކުގައި 15 ތަށި) ހޯދައިދީފަ އެވެ. އޭގެ ތެރޭގައި ހަ ޕްރިމިއާ ލީގު ތަށްޓާއި ޗެމްޕިއަންސް ލީގުގެ އިތުރުން، ފީފާ ކްލަބް ވޯލްޑް ކަޕް ހިމެނެ އެވެ. ގާޑިއޯލާ ވަނީ ސިޓީ އަށް ޖެހިޖެހިގެން ހަތަރު ޕްރިމިއާ ލީގު ތަށި ހޯދައިދީ، އެ ކާމިޔާބީ ހާސިލްކުރި ފުރަތަމަ ޓީމުގެ ޝަރަފް ވެސް ހޯދައިދީފަ އެވެ.
އިންގްލެންޑް ކޯޗުކަމާއި ބްރެޒިލްގެ ކޯޗުކަމުގެ އޮފާ ދޫކޮށްލި ގާޑިއޯލާ، 53، ދާދި ފަހުން ވަނީ ސިޓީއާ އެކު، އިތުރު ދެ އަހަރުގެ ކޮންޓްރެކްޓެއް ހަދައިފަ އެވެ. ސިޓީއާ އެކު މި ސޮއިކުރާ އެއްބަސްވުމާ އެކު، އެ ކްލަބްގަައި އޭނާ 10 އަހަރުވާއިރު، މިއީ، ގާޑިއޯލާގެ ކެރިއަރުގައި އެންމެ ގިނަ އަހަރު އެއް ކްލަބެއްގައި މަޑުކުރާ ފަހަރެވެ.
ޑެނީ ގާސިއާގެ ޔޫޓިއުބް ޗެނަލަށް ދިން އިންޓަވިއުއެއްގައި ގާޑިއޯލާ ބުނީ، ކްލަބް ފުޓްބޯޅައިގައި ސިޓީ ވެގެންދާނީ އޭނާގެ ފަހު މަަސައްކަތަށް ކަމަށެެވެ.
"އެހެން ޓީމަކަށް (ކްލަބަކަށް) ދެން ކޯޗުކޮށް ނުދޭނަން. މެންޗެސްޓާ ސިޓީ ދޫކޮށްލާފައި ގޮސް އެހެން ޓީމެއްގައި ދެން މި މަސައްކަތެއް ނުކުރެވޭނެ. މި މަސައްކަތް މި ގޮތަށް ކުރެވޭނެ ހަކަތައެއް ދެން ނުހުންނާނެ، ފަަހަރުގައި ދެން އޮތީ ގައުމީ ޓީމުގައި ކަަމަށް ވެސް ވެދާނެ،" ގާޑިއޯލާ ބުންޏެވެ.
ފުޓްބޯޅައިން ދިއުމަށް ފަހު، ދެން ގާޑިއޯލާ ފެންނާނެ ކަމަށް އޭނާ ގަބޫލުކުރަނީ ގޯލްފް ކަމަށެވެ.
ސިޓީގެ ފޯމަށް ވަރަށް ބޮޑަށް އަސަރުކޮށްފައިވާއިރު، އެންމެ ފަހުން ކުޅުނު ނުވަ ވަރަަކަށް މެޗަށް ބަލާއިރު، ސިޓީ މޮޅުވީ އެންމެ މެޗަކުންނެވެ. ދެން، ސިޓީ އަށް އޮތީ ޗެމްޕިއަންސް ލީގުގައި ޔުވެންޓަސް އާއި ޕްރިމިއާ ލީގުގައި މެންޗެސްޓާ ޔުނައިޓެޑާ ބައްދަލުކުރާ މެޗުތަކެވެ.
ގާޑިއޯލާ ބުނީ މި ސީޒަނަށް ވެސް ވަކި ޓާގެޓްތަކެއް ހެދުމުގެ ވިސްނުމަށް ވުރެ މި ވަގުުތު ފޯކަސް ބަހައްޓަަނީ ކުރިއަށް އޮތް މެޗަށް އެކަންޏެވެ.
