އިދިކޮޅު، މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ ލީޑަރުން ހައްޔަރުކޮށްފި ހާލަތެއްގައި އެ ޕާޓީގެ ހަރަކާތްތައް މަޑުނުޖެހި ހިންގާނެ ބަޔަކު ކަނޑައަޅައިފި އެވެ.
ކާނިވާ ސަރަހައްދުގައި ބާއްވަމުންދާ އެމްޑީޕީގެ ޖަލްސާ ފެށުމުގެ ކުރިން ބޭއްވި އެ ޕާޓީގެ ގައުމީ މަޖިލީހުގެ ބައްދަލުވުމުގައި ޗެއާޕާސަން ފައްޔާޒު އިސްމާއިލް ވިދާޅުވީ، ޕާޓީގެ މިހާރުގެ ލީޑަޝިޕް ހައްޔަރުކޮށްފި ނަމަ ޕާޓީ ހިންގާނެ ބަޔަކު ކަނޑައެޅީ ރޭ ބޭއްވި ގައުމީ މަޖިލީހުގެ ނުރަސްމީ ބައްދަލުވުން ކަމަށެވެ.
ނަމަވެސް އެއީ ކޮން ބައެއްކަން އޭނާ ވިދާޅެއްނުވެ އެވެ.
"ގާނޫނުއަސާސީގެ ދިފާއުގައި ރައްޔިތުން" ނަމުގައި މިރޭ ބޭއްވި އެމްޑީޕީގެ ގައުމީ މަޖިލީހުން ވަނީ ސިޔާސީ ހަރަކާތްތައް މުޅި ރާއްޖެއަށް ފުޅާކޮށް އެކި ކަންކޮޅުތަކުގައި އިހުތިޖާޖުތައް ރާވައި ހިންގުމަށް ސިޔާސީ ޕާޓީތަކާއި މަދަނީ ޖަމިއްޔާތުގެ އިތުުރުން އާންމު ފަރުދުން ބައިވެރި ކުރުމަށް ފާސްކޮށްފަ އެވެ.
ރައްޔިތުންގެ މަޖިލީހުގެ މެންބަރެއް ޕާޓީން ވަކިކޮށްގެން ގޮނޑި ގެއްލޭ ގޮތަށް ގާނޫނު އަސާސީއަށް ގެނައި ބަދަލު ދެމި އޮންނަ މުއްދަތުގައި، ރައްޔިތުންގެ ހައްގުގައި ވަކާލާތުކޮށްގެން ނުވަތަ އެމްޑީޕީއަށް ސޮއިކުރުމުގެ ސަބަބުން ގޮނޑި ގެއްލިއްޖެ ނަމަ އެ މެންބަރަކު ތަމްސީލުކުރި ދާއިރާއަށް އަލުން އިންތިހާބު ކުރަން އެހީތެރިވުމަށްވެސް މިރޭ ފާސްކުރި އެވެ.
މެންބަރުންގެ ގޮނޑި ގެއްލޭ ބަދަލު، ގާނޫނުއަސާސީއާ ހިލާފު ކަމަށާއި އެހެންވެ، ކުރިން ގާނޫނުއަސާސީ އޮތް ގޮތަށް ރުޖޫއަ ކުރުމަށް ރައްޔިތުންގެ މަޖިލީހަށާއި، ސަރުކާރަށް އެމްޑީޕީން މިރޭ ވަނީ ގޮވާލައިފަ އެވެ.
