އިދިކޮޅު ސިޔާސީ ހަރަކާތްތައް މުޅި ރާއްޖެއަށް ފުޅާކޮށް އެކި ކަންކޮޅުތަކުގައި އިހުތިޖާޖުތައް ރާވައި ހިންގުމަށް އިދިކޮޅު މައި ޕާޓީ އެމްޑީޕީން މިރޭ ނިންމައިފި އެވެ.
އެ ޕާޓީން މިރޭ ކުރިއަށް ގެންދާ ބޮޑު ޖަލްސާގެ ކުރިން ބޭއްވި ޕާޓީގެ ގައުމީ މަޖިލީހުގެ ބައްދަލުވުމެއްގައި ހުށަހެޅި ގަރާރު ފާސްކޮށް ނިންމާފައިވަނީ މި މަސައްކަތުގައި ސިޔާސީ ޕާޓީތަކާއި މަދަނީ ޖަމިއްޔާތުގެ އިތުުރުން އާންމު ފަރުދުން ވެސް ބައިވެރި ކުރުމަށެވެ.
"ދިވެހިރައްޔިތުންގެ ޑިމޮކްރެޓިކް ޕާޓީން ދޭ ދައުވަތު ގަބޫލުކުރާ ޕާޓީތަކާއި މަދަނީ ޖަމިއްޔާތަކާއި ވަކިވަކި ފަރުދުންނާ ގުޅިގެން މުޅި ރާއްޖެއަށް ސިޔާސީ ހަރަކާތްތައް ފުޅާކޮށް، ރާއްޖޭގެ ކަންކޮޅުތަކުގައި އެކިއެކި އިހުތިޖާޖުތައް ރާވައި ހިންގުމަށް،" ގަރާރުގައި ބުނެފައިވެ އެވެ.
އިދިކޮޅުން ސީދާ ހަރަކާތައް ނުކުމެ އިހުތިޖާޖުކުރަން ނިންމާފައި މިވަނީ ރައީސް ޑރ. މުހައްމަދު މުއިއްޒުގެ ރިޔާސީ ދައުރުގެ ފުރަތަމަ އަހަރު ނިމުމާއެކު އެވެ.
އެގޮތުން އެމްޑީޕީން ދަނީ މި ފަހުން ވެރިކަންކުރާ ޕީއެންސީގެ މެޖޯރިޓީ އޮތް މަޖިލީހުން ގާނޫނުއަސާސީއަށް ގެނައި ބަދަލުތަކާމެދު ކަންބޮޑުވުން ފާޅުކޮށް އާންމު ދިރިއުޅުމަށް ދަތިތައް ކުރިމަތިވަމުންދާ ކަމަށްވެސް ބުނަމުންވެ.
މަސްވެރިންނާއި ޓެކްސީ ޑްރައިވަރުންނާއި ޓޫރިޒަމް ދާއިރާގެ ވިޔަފާރިވެރިންނާއި ކުދި ވިޔަފާރިތައް ހިންގާ ފަރާތްތަކަށް ކުރިމަތިވެފައިވާ ދަތިތައް ވެސް އެމްޑީޕީން ދަނީ ފާހަގަކުރަމުންނެވެ.
އެ ޕާޓީގެ އިތުރުން، ކުރީގެ ރައީސް މުހައްމަދު ނަޝީދު އިސްވެ އުފެއްދެވި ދަ ޑިމޮކްރެޓްސް އާއި ކުރީގެ ރައީސް އަބްދުﷲ ޔާމީނު އިސްވެ ހުންނަވާ އުފެއްދެވި ޕީއެންއެފް އިން ވެސް ދަނީ މި ސަރުކާރާ ދެކޮޅަށް ސިޔާސީ މަސައްކަތްތަކެއް ކުރަމުންނެވެ.
މި ދެ ޕާޓީގެ އާންމު މެންބަރުން މިރޭ އެމްޑީޕީން ކުރިއަށް ގެންދާ ޖަލްސާގައި ބައިވެރިވާ ކަމަށްވެސް މައުލޫމާތު ލިބިފައިވެ އެވެ.
