ދަ ޑިމޮކްރެޓްސްގެ މެންބަރުންނަށް "ގާނޫނު އަސާސީގެ ދިފާއުގައި ރައްޔިތުން" ގެ ނަމުގައި މިރޭ އެމްޑީޕީން ބާއްވާ ޖަލްސާގައި ބައިވެރިވެވޭނެ ކަމަށް އެ ޕާޓީގެ ރައީސް ހަސަން ލަތީފް ވިދާޅުވެއްޖެ އެވެ.
ހަސަން ލަތީފް "އަދަދު" އަށް ވިދާޅުވީ އެމްޑީޕީގެ ޖަލްސާގައި ބައިވެރިވާން ޑިމޮކްރެޓްސް އިން ވަކި ގޮތެއް ނިންމާފައި ނެތުމުން، އެ ޕާޓީގެ މެންބަރުންނަށް އެ ޖަލްސާގައި ބައިވެރިވުމަށް އެއްވެސް ހުރަހެއް ނެތް ކަމަށެވެ.
"އާންމު މެންބަރުންނަށް އެ މެންބަރުން ބޭނުން ކަންކަން ކުރެވޭނެ ޕާޓީން ވަކި ގޮތެއް ކަނޑައަޅާފައި ނެތިއްޔާ. އެއީ އެމީހުންގެ ރައިޓެެއް އެކަހަލަ އެއްވުންތަކުގައި ބައިވެރިވުން ވެސް އަދި އެނޫނަސް ގާނޫނު އަސާސީ އާއި ގާނޫނުތަކުން އެމީހުންނަށް ލިބޭ ހައްގުތައް ހަމަ ލިބޭނެ،" ހަސަން ވިދާޅުވި އެވެ.
ހަސަން ވިދާޅުވީ ސިޔާސީ ޕާޓީއެއްގެ ޖަލްސާގައި ޑިމޮކްރެޓްސްއަށް ތަމްސީލު ކުރެވޭނީ ދެ ޕާޓީން މަޝްވަރާތައް ކުރެވި ގޮތްތަކެއް ނިންމައިގެން ކަމަށެވެ. ނަމަވެސް ކުރިއަށް އޮތް ތަނުގައި އިދިކޮޅު ސިޔާސީ ޕާޓީތައް މެދުގައި މަޝްވަރާތައް ކުރެވި، އެކީގައި މަސައްކަތްތަކެއް ކުރެވޭނެ ކަމަށް އުއްމީދު ކުރައްވާ ކަމަށް ހަސަން ވިދާޅުވި އެވެ.
"ކުރިއަށް އޮތް ތަނުގައި އަޅުގަނޑު އުންމީދު ކުރާ ގޮތަކީ މަޝްވަރާތައް ހިނގަން ޖެހޭނެ ޕާޓީއެއް އަނެއް ޕާޓީއާ ދޭތެރޭގައި. އޭގެ ފަހުން އަޅުގަނޑުމެން އެކީގައި ޖަލްސާ ބާއްވައި، ދަތުރުކޮށް ބައިވަރު ކަންކަން ކުރެވޭނެކަން އެބަ އެނގޭ އަޅުގަނޑުމެންނަށް،" އޭނާ ވިދާޅުވި އެވެ.
އެމްޑީޕީން ބާއްވާ ޖަލްސާގައި ރާއްޖޭގެ ހުރިހާ ސިޔާސީ ޕާޓީތައް ބައިވެރިވުމަށް އެ ޕާޓީގެ ޗެއާޕާސަން ފައްޔާޒް އިސްމާއިލް އިއްޔެ ވަނީ ދައުވަތު ދެއްވައިފަ އެވެ.
"އެހެން ނަމަވެސް އަޅުގަނޑުމެން މިހާރު އެކްސްޓެންޑު މި ކުރަނީ އިންވިޓޭޝަން ހަމަ ހުރިހާ ސިޔާސީ ޕާޓީއަކުން ވެސް މި ޖަލްސާގައި ބައިވެރިވެވަޑައިގަތުމަށް،" ފައްޔާޒު ވިދާޅުވި އެވެ.
އެމްޑީޕީން މިރޭ ކާނިވާގައި ބާއްވާ ޖަލްސާ ފަށާނީ މިރޭ 8:30 ގަ އެވެ.
