"ގާނޫނު އަސާސީގެ ދިފާއުގައި ރައްުޔިތުން" ނަމުގައި އިދިކޮޅު މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އިން މާދަމާ ރޭ ކާނިވާ ސަރަހައްދުގައި ބުާއްވާ ޖަލްސާގެ ކުރިން އެ ޕާޓީގެ ގައުމީ މަޖިލިސް ޖަލްސާއެއް ބާއްވަން ނިންމައިފި އެވެ.
އެމްޑީޕީން ބޭއްވި ނޫސްވެރިންގެ ބައްދަލުވުމެއްގައި އެ ޕާޓީގެ ޗެއާޕާސަން، ފައްޔާޒް އިސްމާއިލް ވިދާޅުވީ ގައުމީ މަޖިލިސް ޖަލްސާއެއް ޖަލްސާއާ އެކު ކުރިއަށްދާއިރު، އެ ޖަލްސާގައި ނިންމުންތަކެއް ވެސް ނިންމާނެ ކަމަށެވެ.
"އެ އިވެންޓުގެ ތެރޭގައި އަޅުގަނޑުމެންގެ ގައުމީ މަޖިލީހުގެ ރަސްމީ ޖަލްސާއެއް ހަމަ އެއާ އެއްކޮށް ކުރިއަށްދާނެ އެތަނުގައި. އަދި އޭގައި އަޅުގަނޑުމެންގެ ނިންމުންތަކެއް ނިންމުން ވެސް އޮންނާނެ. އަޅުގަނޑުމެންގެ ވިސްނުން މިހުރީ ހުއްޓުމެއް ނެތި މި މަސައްކަތުގައި ކުރިއަށް ދިޔުން ،" ފައްޔާޒް ވިދާޅުވި އެވެ.
ނަމަވެސް ގައުމީ މަޖިލީހުގެ ޖަލްސާގެ އެޖެންޑާގައި ހިމެނެނީ ކޮން ކަންކަމެއްކަން ފައްޔާޒް ހާމަ ކުރައްވާފައެއް ނުވެ އެވެ.
"އަދަދު" އަށް އެނގިފައިވާ ގޮތުގައި ގައުމީ މަޖިލިސް ޖަލްސާ ކާނިވާގައި ބޭއްވުމަށް ހަމަޖެހިފައި ވަނީ ޖަލްސާގެ ކުރިން ރޭގަނޑު 08:00 ޖަހާއިރެވެ. ޖަލްސާ ފެށުމަށް ތާވަލު ކޮށްފައި އޮތީ ރޭގަނޑު 08:30 ގަ އެވެ.
މާދަމާ ރޭ ބާއްވާ ޖަލްސާއަކީ ސިޔާސީ ޕާޓީތަކަށް ލިބިދޭ ހައްގުގެ ތެރެއިން ބާއްވާ ޖަލްސާއެއްކަން ފާހަގަ ކުރައްވާ ފައްޔާޒް ވިދާޅުވީ ރައްޔިތުންގެ ބާރުވެރިކަން ގެއްލި ނިކަމެތިވަމުންދާތީ އަޑު އުފުލުމުގެ ބޭނުމުގައި ކަމަށާއި ބަންދު ކުރަން ޖެހޭ އެއްވެސް ކަމެއް ނުކުރާނެ ކަމަށެވެ.
ނަމަވެސް ގާނޫނީ އިމުގެ ތެރެއިން ކުރަން އުޅޭ ކަންކަމަށް އެއްވެސް ވަރެއްގެ ހުރަހެއް ސަރުކާރުން އަޅައިފިނަމަ، ޖަލްސާ ބާއްވާނީ މަގުމަތީގައި ކަމަށް ވެސް ފައްޔާޒް ވިދާޅުވި އެވެ.
އެމްޑީޕީން މާދަމާ ރޭ ބާއްވާ ޖަލްސާގައި އިދިކޮޅު އެހެން ސިޔާސީ ޕާޓީތައް ބައިވެރިވުމަށް ވެސް އެ ޕާޓީން ވަނީ ދައުވަތު ދީފަ އެވެ.
މިއީ ނިމިދިޔަ ރިޔާސީ އިންތިހާބަށް ފަހު އެމްޑީޕީން ދުރާލައި ރާވައިގެން ބާއްވާ މިފަދަ ފުރަތަމަ ޖަލްސާ އެވެ.
