"ގާނޫނުއަސާސީގެ ދިފާއުގައި ރައްޔިތުން" ގެ ނަމުގައި އިދިކޮޅު އެމްޑީޕީން މާދަމާ ރޭ ބާއްވާ ޖަލްސާގައި ބައިވެރިވުމަށް ރާއްޖޭގައި ހަރަކާތްތެރިވާ ހުރިހާ ސިޔާސީ ޕާޓީތަކަށް ދައުވަތުދީފި އެވެ.
ޖަލްސާގެ ތައްޔާރީތަކާ ގުޅޭގޮތުން ތަފުސީލު ދިނުމަށް ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން އެމްޑީޕީގެ ޗެއާޕާސަން ފައްޔާޒު އިސްމާއިލް ވިދާޅުވީ، ޖަލްސާއާ ގުޅިގެން އެއްވެސް ސިޔާސީ ޕާޓީއަކާ އެކު ރަސްމީ މަޝްވަރާއެއް ނުކުރާ ކަމަށެވެ.
"އެހެން ނަމަވެސް އަޅުގަނޑުމެން މިހާރު އެކްސްޑެންޓު މި ކުރަނީ އިންވިޓޭޝަން ހަމަ ހުރިހާ ސިޔާސީ ޕާޓީއަކުން ވެސް މި ޖަލްސާގައި ބައިވެރިވެވަޑައިގަތުމަށް،" ފައްޔާޒު ވިދާޅުވި އެވެ.
ސިޔާސީ ޕާޓީތަކުގެ އިތުރުން މަދަނީ ޖަމިއްޔާތަކުންނާއި އެކި ދާއިރާތައް ތަމްސީލުކުރާ ގްރޫޕުތަކުން ވެސް ޖަލްސާގައި ބައިވެރިވުމަށް ގޮވާލައްވަމުން، ފައްޔާޒު ވަނީ އަތޮޅު ތެރެއިން ވެސް ރައްޔިތުން މާލެ އައުމަށް ދައުވަތުދެއްވާފަ އެވެ.
"އަޅުގަނޑުމެން ވަރަށް ބޮޑަށް އެދެން ދިވެހި އެންމެހާ ލޮބުވެތި ރައްޔިތުން މި ޖަލްސާގަ ބައިވެރިވެވަޑައިގަންނަވާ މިކަމަށް ހިތްވަރު ދެއްވުމަށް. އެނގިވަޑައިގަންނަވާނެ މިއަދު އަޅުގަނޑުމެން މިކަން ދޫކޮށްލައިފިނަމަ މާދަމާ އަޅުގަނޑުމެންނަށް ގެއްލޭ އެތި މާ ބޮޑުވެގެންދާނެ،" އޭނާ ވިދާޅުވި އެވެ.
އަލިމަސް ކާނިވަލް ސަރަހައްދުގައި ބާއްވާ މި ޖަލްސާ ފެށުމަށް ހަމަޖެހިފައިވަނީ މާދަމާ ރޭ 8:30 ގަ އެވެ. މި ޖަލްސާއަކީ ގާނޫނީ އިމުގެ ތެރެއިން ކަންކަން ހަމަ މަގަށް އަޅުވުމަށްޓަކައި "އަޑު ނުއިވޭ ސަރުކާރަކަށް އަޑު އިއްވައިދޭން" ބާއްވާ ޖަލްސާއެއް ކަމަށް ފައްޔާޒު މީގެ ކުރިން ވިދާޅުވެފައިވެ އެވެ.
މި އެއްވުން ވެގެންދާނީ މިދިޔަ އަހަރު ސެޕްޓެމްބަރު ބޭއްވި ރިޔާސީ އިންތިހާބަށްފަހު އެމްޑީޕީން ކާނިވަލުގައި ބާއްވާ ފުރަތަމަ ޖަލްސާއަށެވެ. އަދި، އެ ޕާޓީން އަހަރެއްހާ ދުވަހުގެ ތެރޭގައި ބާއްވާ އެންމެ ބޮޑު ޖަލްސާއަށެވެ.
