ރައީސް ޑރ. މުހައްމަދު މުއިއްޒުއަށް ރާއްޖޭގެ ފުރަތަމަ ރައީސް މުހައްމަދު އަމީންއަށް ވީގޮތް ވެދާނެ ކަމަށް، ކުޅުދުއްފުށީގައި އެމްޑީޕީން ބޭއްވި ޖަލްސާގައި ވާހަކަ ދެއްކި މީހަކު ބުނީ ނަސޭހަތެއްގެ ގޮތުން ކަމަށް އެމްޑީޕީގެ ޗެއާޕާސަން ފައްޔާޒް އިސްމާއިލް މިއަދު ވިދާޅުވެއްޖެ އެެވެ.
އެމްޑީޕީން މިއަދު ބޭއްވި ނޫސްވެރިންގެ ބައްދަލުވުމެއްގައި ފައްޔާޒު މިހެން ވިދާޅުވީ ކުރީގެ ރައީސް މުހައްމަދު އަމީންއަށް ވީގޮތުން މިސާލު ނަންގަވައި ކުޅުދުއްފުށީގައި އެމްޑީޕީން ބޭއްވި ޖަލްސާއެއްގައި މީހަކު ދެއްކި ވާހަކައަކާ ގުޅުވަ އެވެ.
ފައްޔާޒު ވިދާޅުވީ، އޭނާ ގަބޫލުކުރަނީ އެއީ ނަސޭހަތެއްގެ ގޮތުގައި ދެއްކި ވާހަކައެއް ކަމަށެވެ. އަދި ރާއްޖޭގެ ތާރީހުގައި ހިނގާފައި ހުރި ކަންކަން ވެރިންނަށް ހަނދާން ކޮށްދިނުމަކީ އާންމު ރައްޔިތުން ކޮންމެހެން ކުރަންޖެހޭ ކަމެއް ކަމަށެވެ.
"ރައްޔިތުންނަށް ދެރަ ދިނީމާ ހަމަ މުހައްމަދު އަމީންއަށް ހެދިގޮތް ހަދަން ޖެހޭނީ، އެހެން ކޮން ގޮތެއްތޯ ހަދާނީ؟، އެއީ ދިވެހިރާއްޖޭގެ ތާރީހު ދައްކާފައި އޮތް ހަގީގަތް، އަޅުގަނޑު ގަބޫލު ކުރާ ގޮތުގައި ކުޅުދުއްފުށީ ޕޯޑިއަމްގައި އެ ބޭފުޅަކު އެހެން އެ ވިދާޅުވީ ރައީސުލްޖުމްހޫރިއްޔާއަކަށް މިހާރު އެ ހުންނެވި ޑރ. މުއިއްޒުއަށް ނަސޭހަތުގެ ގޮތުގައި، އެހެންވިޔަ ނުދޭށޭ އެ ބޭފުޅަކު ވިދާޅުވީ އިނގޭތޯ؟،" ފައްޔާޒް ވިދާޅުވި އެވެ.
އެ މޭރުމުން ފައްޔާޒް ވާހަކަ ދެއްކެވި ނަމަވެސް، އެ ވިދާޅުވީ މުހައްމަދު އަމީންއަށް ހެދި ކޮން ގޮތެއްގެ ވާހަކައެއް ކަމެއް އެނާ ވިދާޅެއް ނުވެ އެވެ. އޭގެ ތަފުސީލަކަށް ވަޑައިނުގެން ފައްޔާޒް ވިދާޅުވީ ދިވެހިރާއްޖޭގެ ސިޔާސީ ތާރީހަށް ބަލާއިރު، ރައްޔިތުންނަށް އަނިޔާވެރިވާ ވެރިންނާ މެދު ކަން ހިނގާފައި ހުރީ އެހައި ރީތިކޮށް ނޫން ކަމަށެވެ.
"ދިވެހިރާއްޖޭގެ ތާރީހަކީ ސިޔާސީ އެހައި އިނގިރޭސި ބަހުން އަޅުގަނޑު ދަންނަވާނަން، އެހައި ކައިންޑް ޕޮލިޓިކްސްއެއް އޮތް ގައުމެއް ނޫން މިއީކީ އިނގޭތޯ؟، އަނިޔާވެރި ބަޔަކު ވެއްޖެއްޔާމުން އަނެއް ބަޔަކު އަނިޔާވެރި ވާނެ، އެހެންވީމާ އެއީ އޮތް ހަގީގަތެއް،" ފައްޔާޒް ވިދާޅުވި އެވެ.
ދިވެހިރާއްޖޭގެ ފުރަތަމަ ޖުމްހޫރިއްޔާގެ ފުރަތަމަ ރައީސް، މުހައްމަދު އަމީންގެ ވެރިކަން ނިމިގެން ދިޔައީ 1953 ވަނަ އަހަރުގެ އޯގަސްޓު 21 ގައި މާލޭގެ ރައްޔިތުން ގުޅަކުޅޭ ފަސްގަނޑަށް އެއްވެ ގެނައި އިންގިލާބަކުންނެވެ.
