ބޭރު ފައިސާއާ ބެހޭ ބިލުގައި ޓޫރިޒަމް ވިޔަފާރިތަކުން ޑޮލަރު މާރުކުރަން ކަނޑައަޅާފައި ހުރި އުސޫލުތަކަށް ގެންނަން ހުށަހަޅާފައިވާ ބަދަލުތަކަށް ރިސޯޓުތަކުން މިހާރު ރުހޭ ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން މިއަދު ބުނެފި އެވެ.
ރައްޔިތުންގެ މަޖިލީހަށް މިއަދު ހުށަހެޅި ބޭރު ފައިސާއާ ބެހޭ ބިލުގައި ގެނައި މައިގަނޑު އެއް ބަދަލަކީ ޓޫރިޒަމް ވިޔަފާރިތަކުން މާރުކުރަން ޖެހޭ އަދަދަަށް ގެނައި ބަދަލެވެ.
ޑްރާފްޓު ކުރުމަށް ފަހު އާންމުންގެ ހިޔާލަށް ހުޅުވާލި ބިލާއި މިހާރު އަމަލުކުރަމުން އަންނަ ބޭރު ފައިސާއާ ބެހޭ ގަވާއިދުގައި މާރުކުރަން އޮންނަނީ ވަކި އަދަދެއް ކަނޑައަޅާފަ އެވެ. އެއީ "ކެޓެގަރީ އޭ" ގައި ހިމެނޭ ރިސޯޓުތަކަށް އަންނަ ކޮންމެ ޓޫރިސްޓެއްގެ ބޮލަކަށް 500 ޑޮލަރެވެ. އަދި "ކެޓެގަރީ ބީ" ގައި ހިމެނޭ އެ ނޫން ޓޫރިސްޓު ވިޔަފާރިތަކަށް ކޮންމެ ޓޫރިސްޓެއްގެ ބޮލަކަށް 25 ޑޮލަރެވެ.
ނަމަވެސް މަޖިލީހަށް ހުށަހެޅި ބިލުގައި އޮތީ، "ކެޓަގަރީ އޭ" އާއި "ކެޓެގަރީ ބީ" ގައި ހިމެނޭ ވިޔަފާރިތަކުން ކޮންމެ ޓޫރިސްޓަކަށް ޑޮލަރު މާރުކުރަން ނުވަތަ ލިބޭ ބޭރު ފައިސާގެ އާމްދަނީގެ 20 ޕަސެންޓު މާރުކުރުމުގެ ތެރެއިން އެ ވިޔަފާރިއަކުން އިހުތިޔާރު ކުރާ ގޮތަކަށް މާރުކުރެވޭ ގޮތަށެވެ.
މި ބަދަލާ ގުޅޭ ގޮތުން ރިސޯޓުތަކުން ދެކެނީ ކިހިނެއްތޯ އެމްއެމްއޭގައި ސުވާލުކުރުމުން އެ އިދާރާއިން ބުނީ މިއީ ވިޔަފާރިތަކުން ލިބުނު ހިޔާލާއި އެ ވިޔަފާރިތަކާ އެކީ ކުރެވުނު މަޝްވަރާތަކަށް ފަހު ގެނެވުނު ބަދަލެއް ކަމަށެވެ. އަދި އެ ސިނާއަތުގައި ހަރަކާތްތެރިވާ ގިނަ ވިޔަފާރިތަކުން މި ބަދަލާ މެދު ދެކެނީ "ޕޮޒިޓިވް" ކޮށް ކަމަށް ވެސް އެމްއެމްއޭއިން ބުންޏެވެ.
އެމްއެމްއޭއިން ބޭރު ފައިސާއާ ބެހޭ ގާނޫނާ ގުޅޭ ގޮތުން މަޝްވަރާކުރި އެއް ބަޔަކީ މޯލްޑިވްސް އެސޯސިއޭޝަން ފޯ ޓޫރިޒަމް އިންޑަސްޓްރީސް (މަޓީ) އެވެ. މަޓީއަކީ ރާއްޖޭގައި ހިންގާ ގިނަ ރިސޯޓުތަކެއްގެ ބައިވެރިވުމާއެކީ، ޓޫރިޒަމް ވިޔަފާރިތަކުގެ މަސްލަހަތު ކުރިއަރުވައި ރައްކާތެރިކުރަން ހިންގާ ޖަމިއްޔާއެކެވެ.
މަޓީއާ އެކީ ކުރެވުނު މަޝްވަރާތަކުގައި ވެސް ޕަސެންޓޭޖު ބަދަލެއް ހިމަނައިދޭން އެދިފައިވާ ކަމަށް އެމްއެމްއޭއިން ބުންޏެވެ. އަދި މިއީ ދެ ފަރާތުގެ މަސްލަހަތު ހިމެނޭ ގޮތަށް، އެމްއެމްއޭއިން ބޭނުންވާ ލަނޑުދަނޑިތައް ވެސް ހާސިލުކުރެވޭ ގޮތަށް ގެންނަ ބަދަލެއް ކަމަށް ވެސް އެ އިދާރާއިން ބުންޏެވެ.
ޓޫރިޒަމް ވިޔަފާރިތަކުން ބޭރު ފައިސާ މާރުކުރަން ޖެހޭ ގޮތަށް ބަދަލުތަކެއް ގެނައި ނަމަވެސް، މީގެ ސަބަބުން ބޭރު ފައިސާއިން ލިބޭނެ ކަމަށް ލަފާކުރާ އަދަދަށް މާ ބޮޑު ބަދަލެއް ނާންނާނެ ކަމަށް އެމްއެމްއޭއިން ފާހަގަކުރި އެވެ. އަދި މިހާރު ކަނޑައަޅާފައިވާ ޕަސެންޓޭޖަކީ ވެސް 500 ޑޮލަރު މާރުކުރުމުން ޖެހޭ އަދަދާ ދާދި އެއްވަރުގެ އަދަދެއް ކަމަށް މަރުކަޒީ ބޭންކުން ބުންޏެވެ.
