ނިއުޔޯކް، ޔުނައިޓެޑް ސްޓޭޓްސް (ޑިސެމްބަރު 9) - މޭޖަލީގުސޮކާ (އެމްއެެލްއެސް) ކަޕްގެ އެންމެ ކާމިޔާބު ޓީމު ކަމަށްވާ އެލްއޭ ގެލެކްސީން 10 އަހަރު ފަހުން އެ މުބާރާތުގެ ތަށި އުފުލާލާފައިފި އެވެ.
އެމްއެލްއެސް ކަޕްގެ ތަށި އެލްއޭ ގެެލެކްސީން މި ފަހަރު ހޯދީ ފައިނަލުގައި، ވާދަވެރި ނިއު ޔޯކް ރެޑްބުލްސް އަތުން 2-1 އިން މޮޅުވެގެންނެވެ. މިއީ، އެލްއޭ ގެލެކްސީން މި މުބާރާތް ކާމިޔާބުކުރި ހަ ވަަނަ ފަހަރެވެ. އެ ޓީމުން ވަނީ އެންމެ ފަހުން 2014 ވަނަ އަހަރު މި މުބާރާތް ކާމިޔާބުކޮށްފަ އެވެ.
އެމްއެލްއެސްގެ އެންމެ ވާދަވެރި ދެ ޓީމުގެ ކުރިމަތިލުމެއް މި ފަހަރުގެ ފައިނަލުގައި ފެނިގެންދިޔައިރު، އެލްއޭ ގެލެކްސީ އަށް ލަނޑުތައް ޖަހައިދިނީ، ޖޯސެފް ޕެއިންޓްސިލް އާއި ޑޭޖާން ޖޮވެލިޖިޗް އެވެ.
ފައިނަލް މެޗުގެ ތެރެއިން ގެލެކްސީ ޓީމުގެ ރެއުސް ބޯޅަ ހިފައިގެންދަނީ.
މި ދެ ގޯލަށް ފަހު ވެސް ގެލެކްސީ ކުޅުންތެރިން އުފާފާޅުކުރިއިރު ވަނީ އެ ޓީމަށް ކުޅޭ ރިކުއި ޕުއިގްގެ ޖޯޒީ ދައްކާލައިފަ އެވެ. ކުރިން ބާސެލޯނާ އަށް ކުޅުނު ޕުއިގްގެ ކަކުލަށް ސީރިއަސް އަނިޔާއެއް ވެގެން އޭނާ މި ވަގުތު ހުރީ ކުޅުމާ ދުރުގަ އެވެ.
ނިއުޔޯކް ރެޑްބުލްސްގެ ލަނޑު ޖެހީ، ސޯން ނިއަލިސް އެވެ. އިތުރު ގޯލެއް ޖަހައި އެއްވަރުކުރަން ނިއުޔޯކް ރެޑްބުލްސް އިން ކުރި މަސައްކަތް ކާމިޔާބުނުވިއިރު، އެ ކްލަބްގެ ތާރީހުގައި ކުޅުނު ދެ ވަނަ އެމްއެލްއެސް ކަޕް ފައިނަލުން ވެސް މި ވަނީ ބަލިވެފަ އެވެ.
ގެލެކްސީ އަށް ކުޅޭ ފާހަގަކޮށްލެވޭ ކުޅުންތެރިންނަށް ބަލާއިރު، ޖަރުމަނުގެ ތަރި މާކޯ ރެއުސް އާއި އެ ޓީމުގެ ކެޕްޓަން، ކުރިން ސައުތެމްޓަން އަށް ކުޅުނު ޖަޕާނުގެ މާުޔާ ޔޮޝީޑާ ހިމެނެ އެވެ.
މި މުބާރާތުގެ ޗެމްޕިއަންކަން ގެލެކްސީން ހޯދާފައިވާ އަހަރުތަކަކީ 2002، 2005، 2011، 2012، 2014 އަދި 2024 އެވެ. ފައިނަލުގައި ކުޅެ ބަލިވެފައިވަނީ، 1996، 1999، 2001 އަދި 2009 އެވެ.
