މުޅި ރާއްޖޭގައި ދުނިޔޭގެ ފެންވަރުގެ ޕޭމަންޓް ނިޒާމެއް ގާއިމުކުރުމުގެ ބިންގާ އަޅައިދެވުނީ އެމެރިކަން އެކްސްޕްރެސް (އެމެކްސް) ގެ އެހީތެރިކަމާ އެކީ ކަމަށް ބޭންކް އޮފް މޯލްޑިވްސް (ބީއެމްއެލް) ގެ ސީއީއޯ އަދި މެނޭޖިން ޑިރެކްޓަރު މުހައްމަދު ޝަރީފް ވިދާޅުވެއްޖެ އެވެ.
ބީއެމްއެލް އާއި އެމެކްސްގެ އެކްސްކްލޫސިވް ޕާޓްނާޝިޕަށް 20 އަހަރު ފުރުމުގެ މުނާސަބަތުގައި ރޭ ބޭއްވި ހަފުލާގައި ޝަރީފް ވަނީ ބޭންކުން ހޯދި ކާމިޔާބީގައި އެ ހިދުމަތުން މުހިންމު ދައުރެއް އަދާކުރި ކަމަށް ވިދާޅުވެފަ އެވެ. އަދި ރާއްޖޭގެ މާލީ ދާއިރާ އާއި އެ ދާއިރާއިން މީހުން ބިނާކުރަން އެމެކްސްއިން ދިން އެހީތެރިކަން ފާހަގަކުރައްވާ، އެމެކްސްއަށް އޭނާ ތައުރީފުކުރެއްވި އެވެ.
"2004 އިން ފެށިގެން، އެމެރިކަން އެކްސްޕްރެސް އާއި ބޭންކް އޮފް މޯލްޑިވްސްގެ އޮތް ގުޅުމަކީ ހަމައެކަނި ކާޑު ޕާޓްނަރެއްގެ ގުޅުމެއް ނޫން. އެ ގުޅުމަކީ ބޭންކެއްގެ ގޮތުގައި އަޅުގަނޑުމެންނަށް ލިބުނު ކުރިއެރުމާއި ކާމިޔާބީގައި ވަރަށް މުހިންމު ދައުރެއް އަދާކޮށްދިން ގުޅުމެއް. އެމެކްސް އަކީ ރާއްޖޭގެ މާލީ ދާއިރާގައި މަސައްކަތްކުރަމުންދާ އެތައް ބައެއް ބިނާކުރުމަށް ވަރަށް ބޮޑު އެހީތެރިކަމެއް ދިން ފަރާތެއް،"
މި ގޮތުން ޝަރީފް ފާހަގަކުރެއްވި އެއް ކަމަކީ ރާއްޖެއަށް ފުރަތަމަ ކްރެޑިޓު ކާޑު ތައާރަފުކުރި ދުވަހެވެެ. ޝަރީފަކީ ކްރެޑިޓު ކާޑު ތައާރަފުކުރުމުގެ މަޝްރޫއު އިސްވެ ހިންގުމާއި އޭރު ބޭންކުގައި އުފެދުނު ކާޑު ޓީމު އިސްވެ ހިންގަން ހަވާލުކުރެވުނު މީހާ އެވެ. ކްރެޑިޓު ކާޑަކީ މުޅިން އާ ކަމަކަށް ވެފައި އެ ހިދުމަތް ތައާރަފުކުރުމުގައި ގިނަ ގޮންޖެހުންތަކަށް ދިމާވީ ނަމަވެސް ބޭންކުގެ ކަސްޓަމަރުންނަށް ޓަކައި އެ ހިދުމަތް ތައާރަފުކުރެވުނީތީ އުފާކުރައްވާ ކަމަށް ޝަރީފް ވިދާޅުވި އެވެ.
"އަޅުގަނޑުމެންނަށް އޭރު ދަސްވިކަމަކީ މި ހިތްވަރުގަދަ މަސައްކަތުން އަޅުގަނޑުމެންގެ ކަސްޓަމަރުންނަށް ބޭންކިން ހިދުމަތް ޒަމާނީކޮށްދޭނެކަމާއި، ވިޔަފާރިތަކާއި ދަތުރުވެރިންނަށް ވެސް ފަސޭހަކަމާއި، ރައްކާތެރިކަމާއި އަދި ލުއިފަސޭހަކަން ލިއްބައިދޭނެކަން." އޭނާ ވިދާޅުވި އެވެ.
އެމެކްސްއާ އެކީ ބީއެމްއެލްއިން ހާސިލުކުރި ކާމިޔާބީތަކާއި ލަނޑުދަނޑިތައް
- ބީއެމްއެލްއިން ދިވެހިރާއްޖޭގައި ފުރަތަމަ ކްރެޑިޓް ކާޑުތައް ތައާރަފުކޮށް، ވަކިވަކި ފަރުދުންނާއި ވިޔަފާރިތަކަށް ދުނިޔޭގެ ފެންވަރުގެ މާލީ ހައްލުތަކަށް ވާސިލުވުމުގެ ބާރު ދިނުން
- އެމެކްސްގެ ހިދުމަތް ބަލައިގަތުން ތައާރަފުކޮށް އަވަސް ސްޕީޑެއްގައި ކުދި ފިހާރަތަކުން ފެށިގެން ދިވެހިރާއްޖެ ދުނިޔޭގެ މަންޒިލަކަށް ހަދާފައިވާ ރިސޯޓުތަކާ ހަމައަށް އެ ހިދުމަތް ފުޅާކުރުން
- އެމްކްސްއާއެކު "އެކްސްޕީރިއަންސް މޯލްޑިވްސް" ޑެސްޓިނޭޝަން މާކެޓިން ކެމްޕޭން ފަށައި، ފަތުރުވެރިކަމުގެ ސިނާއަތަށް އެހީތެރިވެދީ، ދުނިޔޭގެ އެންމެ މަގުބޫލު މަންޒިލަކަށް ރާއްޖެ ހެދުމަށް އެމެކްސްގެ ފުޅާ ނެޓްވޯކްގައި ރާއްޖެ މަޝްހޫރުކޮށްދެވުނު
- ރާއްޖޭގެ ފުރަތަމަ ޝަރީއާ ހުއްދަކުރާ ކްރެޑިޓް ކާޑު އެމެރިކަން އެކްސްޕްރެސްއާއެކު ތައާރަފުކުރުން
ޝަރީފްގެ ވާހަކައިގައި ބީއެމްއެލް އާއި އެމެކްސްގެ ގުޅުމަށް މިވީ މުއްދަތުގެ ތެރޭގައި އެއް ޓީމުން އަނެއް ޓީމަށް ދިން އެއްބާރުލުމާއި އެހީތެރިކަން ފާހަގަކުރައްވައި، އެކަމަށް ޝުކުރުއަދާކުރެއްވި އެވެ. އަދި ކުރިއަށް އޮތް ތަނުގައި ވެސް ދެ ވިޔަފާރި ގުޅިގެން ގިނަ މަސައްކަތްތަކެއް ކުރަން ރާވާފައި އޮތް ކަމަށް އޭނާ ވިދާޅުވި އެވެ.
"ފައިސާ ދެއްކުމާއި ބޭންކިންގެ ދުނިޔެ ބަދަލުވަމުން އަންނަ ހިނދު އެމެކްސްއާއެކު، އަޅުގަނޑުމެން މިވަނީ އައު އީޖާދުތަކުގެ ކުރީ ސަފުގައި ތިބުމަށް އަޒުމްކަނޑައަޅާފަ. އަދި ޑިޖިޓަލް ބަދަލުތައް ގެނައުމަށް މަސައްކަތްކުރުމާއެކު، ދިވެހިރާއްޖޭގެ އާ ޖީލުތަކުން ބޭނުންވާ މާލީ ހައްލުތައް ފޯރުކޮށްދިނުމަށް މަސައްކަތްކުރާނަން،" ޝަރީފް ވިދާޅުވި އެވެ.
ބީއެމްއެލްއަކީ ރާއްޖޭގައި އެންމެ ފުޅާދާއިރާއެއްގައި ކާޑު ދޫކުރުމާއި ކާޑުގެ ހިދުމަތް ބަލައިގަންނަ ބޭންކެވެ. އެ ބޭންކުން ބުނީ ތިން ލައްކައަށް ވުރެ ގިނަ ކަސްޓަމަރުންނާއި 8،000 އަށް ވުރެ ގިނަ މާޗަންޓުން ބޭންކުގެ ނެޓްވާކުގެ ތެރޭގައި ހިމެނޭ ކަމަށެވެ.
