ނޭޕާލުގައި މިހާރު ފަށާ ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ)ގެ މެންސް ވޮލީބޯލް ކްލަބް ޗެމްޕިއަންޝިޕްގައި ރާއްޖޭގެ ކްލަބް އެޗްޑީސީން ވާދަކުރަން ތައްޔާރުވެއްޖެ އެވެ.
ނޭޕާލުގެ ކަތުމަންޑޫގައި މި މަހުގެ 7-14 އަށް ކުރިއަށްދާ ކާވާ މެންސް ވޮލީބޯލް ކްލަބް ޗެމްޕިއަންޝިޕްގައި ހަތަރު ގައުމަކުން ފަސް ޓީމެއް ވާދަކުރާނެ އެވެ.
އެ ގޮތުން، މުބާރާތް ހޯސްޓްކުރާ ނޭޕާލުން ދެ ޓީމެއް ވާދަކުރާއިރު، ދެން ފެނިގެންދާނީ ރާއްޖެ އާއި އިންޑިއާ އަދި އިރާނުން ޓީމެކެވެ.
މި މުބާރާތުގައި އަމިއްލަ ގައުމުގައި ނޭޕާލް ތަމްސީލުކުރާނެ ދެ ޓީމަކީ، ގަންޑަކީ ޕްރޮވިންވްސް އާއި ހެލްޕް ނޭޕާލް ސްޕޯޓްސް ކްލަބް އެވެ. ރާއްޖޭން ކްލަބް އެޗްޑީސީ ކުޅޭއިރު، އިންޑިއާ އިން ވާދަކުރަނީ، ކަލިކަޓް ހީރޯސް އެވެ. އަދި އިރާނުން ފެނިގެންދާނީ، ޗަދޯރުމަލޫ އެވެ.
މި ފަހުން، ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) އިން ފިރިހެން ޑިވިޝަނަށް ބޭއްވި މުބާރާތްތަކުގައި ކާމިޔާބު ޓީމެއްގެ ގޮތުގައި ފެނިގެންދިޔަ، ކްލަބް އެޗްޑީސީގައި ގައުމީ ފިރިހެން ވޮލީބޯޅަ ޓީމުގެ ގިނަ ކުޅުންތެރިން ހިމެނެ އެވެ. އޭގެ ތެރޭގައި ޓީމުގެ ކެޕްޓަންކަން އެންމެ ފަހުން ކުރި ދެ ކުޅުންތެރިން ކަމަށްވާ، އިސްމާއިލް ސާޖިދު (ކުޑަކާއްޓެ) އާއި އާދަމް ފައިރޫޒް ހިމެނެ އެވެ. އަދި ގައުމީ ޓީމުގައި މޮޅު ކުޅުމެއް ދައްކަމުން އަންނަ ޝަމާއިލް ހުސެއިން އާއި ތަޖުރިބާކާރު ކުޅުންތެރިޔާ، މުހައްމަދު އަހުސަން ވެސް ކުޅެމުން އަންނަނީ އެޗްޑީސީ އަށެވެ.
ޓީމުގެ ކޯޗެއްގެ ގޮތުގައި ހަރަކާތްތެރިވަނީ، ހުސެއިން ޝަރީފް (ނަލަ ހުސެން) އެވެ، ދާދި ފަހުން ނަލަ ހުސެންްގެ ކޯޗުކަމުގައި އެޗްޑީސީން ވަނީ ވޮލީބޯލް އެސޯސިއޭޝަން ކަޕްގެ ޗެމްޕިއަންކަން ހޯދައިފަ އެެވެ.
ކާވާ އިން ބޭއްވި އަންހެން ކްލަބް ޗެމްޕިއަންޝިޕް ކުރިއަށްދިޔައީ މާލޭގަ އެވެ. އެ މުބާރާތުގައި ރާއްޖޭގެ ކްލަބް ވެމްކޯ އާއި ޕޮލިސް ކްލަބް އިން ކުޅުނުއިރު ތަށި ހޯދީ ނޭޕާލް ޕޮލިސް ކްލަބް އެވެ.
