ނޭޕާލުގައި ކުރިއަށްދިޔަ ސެންޓްރަލް އޭޝިއާ ވޮލީބޯލް އެސޯސިއޭޝަން (ކާވާ) މެންސް ކްލަބް ޗެމްޕިއަންޝިޕުގެ ތިންވަނަ ހޮވާ މެޗުގައި އީރާންގެ ޗަދޯރުމަލޫ އަތުން ރާއްޖޭގެ ކްލަބް އެޗްޑީސީ ބަލިވެއްޖެ އެވެ.
މި މުބާރާތުގެ ސެމީ ފައިނަލުގައި އެޗްޑީސީން ހެލްޕް ނޭޕާލް އަތުން ބަލިވީ ސީދާ ތިން ސެޓުން އެވެ.
އިއްޔެ ކުޅުނު ތިން ވަނަ ހޮވާ މެޗުގައި އެޗްޑީސީން ކުޅުނީ ޗަދޯރުމަލޫ އާ ދެކޮޅަށެވެ. އެ މެޗުން ބަލިވީ ސީދާ ތިން ސެޓުންނެވެ.
މި މެޗުގެ ފުރަތަމަ ސެޓުގައި އެޗްޑީސީން ލީޑު ކޮށްގެން ކުޅުނު ނަމަވެސް ސެޓުގެ ފަހުކޮޅު ސެޓު ނިންމާނުލެވި, ކައިރިކައިރީގައި ހެދުނު ގޯސްތަކުގެ ފައިދާ ނަގާ މި ސެޓު ޗަދޯރުމަލޫ އިން ކާމިޔާބުކުރީ 25-21 އިންނެވެ.
ދެވަނަ ސެޓު ފަށައިގެން ވާދަވެރި ކުޅުމެއް ދެ ޓީމުގެ ފަރާތުން ފެނިގެންދިޔައިރު, މި ސެޓުގައި ބޮޑު ލީޑެއް ނަގައިގެން ކުޅުމުގެ ފުރުސަތު ސެޓުގެ ކުރީކޮޅު އެއްވެސް ޓީމަކަށް ނުލިބުނެވެ. އެކަމަކު މަޑުމަޑުން ޗަދޯރުމަލޫ އިން ގޭމުގެ ތެރެއަށްވަދެ ތިން ޕޮއިންޓްގެ ލީޑަކާއެކު ކުޅެން ފެށި އެވެ. އެކަމަކު ސެޓު އެޗްޑީސީން ކުޅުން ރަނގަޅުކޮށް ސެޓު ނިންމަންވެސް ފުރުސަތު ހޯދި އެވެ. އެކަމަކު އެ ޓީމަށް ސެޓު ނިންމާނުލެވުމުގެ ފައިދާ ނަގާ މި ސެޓު ޗަދޯރުމަލޫ އިން ކާމިޔާބުކުރީ 27-25 އިންނެވެ.
ތިން ވަނަ ސެޓުގައި ވެސް ފެނިގެންދިޔައީ އެޗްޑީސީން ސެޓު ފަށައިގެން ލީޑު ކުރި މަންޒަރެވެ. އެކަމަކު މި ސެޓުގައި ވެސް އެޗްޑީސީ އަށް ސެޓު ނިންމާނުލެވުމުގެ ފައިދާ ނަގާ އީރާނު ޓީމުން ވަނީ 27-25 އިން ސެޓު ގެންގޮސްފަ އެވެ.
