ކުއްލި ހަމަލާއެއް ދީ ސޫރިއާގެ ދެވަނައަށް އެންމެ ބޮޑު ސަހަރު ހިފުމުގައި އެ ގައުމުގެ އިދިކޮޅު ހަނގުރާމަވެރިންގެ ފައުޖުތަކުގައި ދިވެހިން ބައިވެރިވެއްޖެ އެވެ.
އާންމުވެފައިވާ ވީޑިއޯތަކާއި ފޮޓޯތަކުން ފެންނަ ގޮތުން ހަލަބު ސިޓީ ހިފުމުގައި އެ ގައުމުގައި ހަރަކާތްތެރިވާ ދިވެހީންގެ ބޮޑު ބައިވެރިވުމެއް އޮތްކަން އެނގެ އެވެ.
އެގޮތުން ހަލަބަށް ދިން ހަމަލާއަށް ތައްޔާރުވުމާއި ހަމަލާތަކަށްފަހު ހަލަބުގެ ކޮންޓްރޯލް ލިބުމުން އެކަމާ އުފާ ފާޅުކޮށްފައިވާ ވީޑިއޯ އާއި ފޮޓޯތަކުން ދިވެހިން ފެނެ އެވެ. އަދި ހަލަބުގެ ކޮންޓްރޯލް ލިބުމުގެ އުފަލުގެ މައްޗަށް ސޫރިޔާގައި ހަރަކާތްތެރިވާ ބައެއް ދިވެހި ހަނގުރާމަވެރިން ވާހަކަދައްކާފައިވާ ވީޑިއޯތައް ވެސް އާންމުވެފައިވެ އެވެ.
ސޫރިއާގެ ދެވަނައަށް އެންމެ ބޮޑު ސަހަރުގެ ކޮންޓްރޯލް އިދިކޮޅު ހަނގުރާމަވެެރިން ނަގާފައިވާކަން ބޭރުގެ ނޫސް އެޖެންސީތަކުން ރިޕޯޓު ކުރީ މިހުގެ 1، ގަ އެވެ. ނަމަވެސް އޭގެ ދެ ދުވަސް ކުރިން އެ ގައުމުގެ އިދިކޮޅު ހަނގުރާމަވެރިން ދިޔައީ ހަލަބުގެ ކޮންޓްރޯލް ލިބުމުގެ އުފާ ސޯޝަލްމީޑިއާގައި ފާޅު ކުރަމުންނެވެ.
ސޫރިޔާގެ ސަރުކާރާ ދެކޮޅަށް ހަނގުރާމަކުރާ ހައިއަތުއް ތަހްރީރުއް ޝާމް އާއި ގުޅިފައިވާ ޖަމާއަތްތަކުން ކުއްލިއަކަށް ދިން ހަމަލާތަކުގެ ސަބަބުން އެ ގައުމުގެ އަހުލީ ހަނގުރާމައިގެ ހުޅުގަނޑު އަނެއްކާ ވެސް ފަޅައިގެން މި ދިޔައީ 2020 ވަނަ އަހަރުން ފެށިގެން މަޑުޖެހިފައި އޮތުމަށް ފަހުގަ އެވެ. މިއީ 2016 ވަނަ އަހަރަށްފަހު ހަލަބުގެ ކޮންޓްރޯލް ބަޝާރުލް އައްސަދުގެ ސިފައިންނަށް ގެއްލުނު ފުރަތަމަ ފަހަރެވެ.
އިދިކޮޅު ހަނގުރާމަވެރިން ހަލަބަށް ދިން ކުއްލި ހަމަލާގައި ބަޝާރުލް އައްސަދުގެ ގިނަ އަދަދެއްގެ ސިފައިން މަރުވި ކަމަށް ސޫރިޔާގެ ޑިފެންސް މިނިސްޓްރީން ވަނީ ހާމަކޮށްފަ އެވެ.
ބަޝާރުލް އައްސަދުގެ ސިފައިން ވަނީ އިދިކޮޅު ހަނގުރާމަވެރިން ހަލަބުގައި ކުރި ހޯދިކަމަށް އިއުތިރާފުވެ، އެ ސަހަރުގެ ބޮޑެތި ސަރަހައްދުތަކުގެ ކޮންޓްރޯލް އިދިކޮޅު ހަނގުރާމަވެރިން ހޯދާފައިވާ ކަމަށް ބުނެފަ އެވެ.
އިދިކޮޅު ހަނގުރާމަވެރިން ހަލަބު ހިފުމާއެކު، އިދްލިބާއި ހަލަބުގައި އިދިކޮޅު ހަނގުރާމަވެރިން ހަރަކާތްތެރިވާ ކަމަށް ގަބޫލު ކުރެވޭ ބައެއް ސަރަހައްދުތަކަށް ރަޝިޔާ އާއި ސޫރިޔާގެ ހަނގުރާމަމަތީ ބޯޓުތަކުން ހަމަލާތަކެެއް ދިފައިވާ ކަމަށް ބޭރުގެ ބައެއް ނޫސް އެޖެންސީތަކުން ރިޕޯޓު ކޮށްފައިވެ އެވެ.
ހަލަބަކީ 2011، ގައި ފެށި ސޫރިޔާގެ އަހުލީ ހަނގުރާމައިގައި އެ ގައުމުގެ ސަރުކާރުގެ ކޮންޓްރޯލް އެންމެ ފުރަތަމަ ގެއްލުނު އެއް ސަހަރެވެ. އެ ސަހަރު އިދިކޮޅު ހަނގުރާމަވެރިންގެ ބާރުގެ ދަށުގައި އޮންނަތާ ގިނަ ދުވަސްތަކެއް ފަހުން ސަރުކާރުގެ ބާރުގެ ދަށަށް އަލުން ގެންދިޔައީ އީރާނާއި ރަޝިޔާގެ އެހީތެރިކަމާ އެކު މީގެ އަށް އަހަރުކުރިންނެވެ.
ބަޝާރުލް އައްސަދުގެ ސަރުކާރުން ބުނާ ގޮތުގައި އިދިކޮޅު ހަނގުރާމަވެރިންނާ ދެކޮޅަށް އާ ހަމަލާތަކެއް ދޭން އެ ގައުމުގެ ސިފައިން ދަނީ ތައްޔާރުވަމުންނެވެ.
