މަޖިލިސް މެންބަރުންގެ ގޮނޑި ގެއްލުވައިލުމުގެ ބާރު ސިޔާސީ ޕާޓީތަކަށް ލިބޭ ގޮތަށް ގާނޫނުއަސާސީއަށް ގެނައި އިސްލާހާ ދެކޮޅަށް އަޑު އުފުލުމަށް "ގާނޫނުއަސާސީގެ ދިފާއުގައި" ނަމުގައި އިދިކޮޅު ދަ ޑިމޮކްރެޓްސްއިން މިރޭ ޖަލްސާއެއް ކުރިއަށް ގެންދަނިކޮށް އެތަނުން ކުއްލިއަކަށް ކަރަންޓު ކެނޑިއްޖެ އެވެ.
ގާނޫނުއަސާސީގެ ދިފާއުގައި ނަމުގައި ޑިމޮކްރެޓުންގެ ޖަލްސާ މިރޭ ފެށީ 9:00 ގައި މާފަންނު ބޮނޑިބަތް ޕާކުގަ އެވެ. އެ ޖަލްސާ ފަށައިގެން އެންމެ ފުރަތަމަ ވާހަކަދައްކަވަމުން ގެންދެވީ މާފަންނު މެދު ދާއިރާގެ ކުރީގެ މެންބަރު އިބްރާހިމް ރަޝީދު (ބޮންޑޭ) އެވެ. ނަމަވެސް އޭނާގެ ވާހަކަ ފަށައިގެން 10 ވަރަކަށް މިނެޓު ފާއިތުވިތަނާހެން ކުއްލިއަކަށް ބޮނޑިބަތް ޕާކުން ކަރަންޓު ގޮސް ލައިވް މެދުކެނޑުނީ އެވެ.
އެކަމާ ގުޅިގެން މައުލޫމާތު ދެއްވަމުން އުނގޫފާރު ދާއިރާގެ ކުރީގެ މަޖިލިސް މެންބަރު، މުހައްމަދު ވަހީދު (ވައްޑެ) "އަދަދު" ނޫހަށް ވިދާޅުވީ ކަރަންޓު ކެނޑުނީ ހަމައެކަނި ބޮނޑިބަތް ޕާކުން އެކަނި ކަމަށާއި ވަށައިގެންވާ މަގުގައި ހުރި ބައްތިތަކުން ކަރަންޓު ނުކެނޑޭ ކަމަށެވެ.
"ވަށައިގެން ހުރި މަގުބައްތިތަކުގައި ކަރަންޓު އެބަހުރި، ހަމައެކަނި މިތަނުން ކަރަންޓު މިދިޔައީ، މިއީ ކަރަންޓު ދިޔައީއެއް ނޫން، ކަރަންޓު ދުއްވައިލީ،" ވައްޑެ ވިދާޅުވި އެވެ.
"ސްޓެލްކޯއަށް ގުޅީމާ ބުނީ ޓެކްނީޝަނެއް އެބަ ފޮނުވަމޭ، އަދި މީހަކު ނާދޭ."
ޖަލްސާ ކުރިއަށް ދަނިކޮށް ބޮނޑިބަތް ޕާކުން ކަރަންޓު ކެނޑުނުއިރު، ޕޯޑިއަމުގައި ވާހަކަ ދައްކަވަން ހުންނެވި ބޮންޑޭ ވިދާޅުވީ ޖަލްސާ ބާއްވަން ކަރަންޓު ނަގާފައި ހުރީ ބޮނޑިބަތް ޕާކުގައި ހުރި ކަރަންޓު ފޮށިން ކަމަށެވެ.
"މިތަނުގައި ހުރި ކަރަންޓު ފޮށިން ކަރަންޓު ނަގައިގެން މި ގެންދިޔައީ ޖަލްސާ، އެބަ ފޮނުވަމޭ ބުނީ ޓެކްނީޝަނެއް، އަދި ކުރިއަށް ގެންދާނަން،" ބޮންޑޭ ވިދާޅުވި އެވެ.
ޑިމޮކްރެޓްސްގެ ޖަލްސާ ކުރިއަށް ދަނިކޮށް ބޮނޑިބަތް ޕާކުން ކަރަންޓު ކެނޑުނުއިރު، މިދިޔަ ހަފުތާގައި އެ ޕާޓީން ހަމަ އެ ސަރަހައްދުގައި ބޭއްވި ޖަލްސާގައި ވަނީ ސަރުކާރަށާއި ރައީސުލްޖުމްހޫރިއްޔާ ޑރ. މުހައްމަދު މުއިއްޒުއަށް ވަރުގަދަ ބަހުގެ ހަމަލާތަކެއް ދީފަ އެވެ.
