ވުޖޫދުގައި ނެތް އއ. އުކުޅަސް އިޖުތިމާއީ މަރުކަޒުގެ އިސްވެރިޔަކަށް ސްޕޯޓްސް މިނިސްޓްރީން ސިޔާސީ މުވައްޒަފެއް ނަގައިފި އެވެ.
ރައީސް އޮފީހުގެ މިނިސްޓަރު އަލީ އާރިފް ސޮއިކުރައްވާފައިވާ ވަޒީފާގެ ޗިޓުން އެނގޭ ގޮތުގައި އިޖުތިމާއީ މަރުކަޒުގެ އިސްވެރިޔަކަށް ސްޕޯޓްސް މިނިސްޓްރީގެ އެސިސްޓެންޓް ޕޮލިޓިކަލް ޑިރެކްޓަރެއްގެ ގޮތުގައި ނެގީ އެ ރަށު ބަހާރީގެ އަބްދުﷲ އާރިފެވެ.
އަބްދުﷲ އާރިފްގެ ވަޒީފާގެ ޗިޓުން އެނގޭ ގޮތުގައި އޭނާއަށް މުސާރަ އާއި އެލަވަންސްގެ ގޮތުގައި މަހެއްގެ މައްޗަށް 15،000ރ. ލިބޭނެ އެވެ.
އުކުޅަހު ކައުންސިލުގެ ރައީސް އިބްރާހިމް ޝައުކަތު "އަދަދު" އަށް ވިދާޅުވީ އެ ރަށުގައި އިޖުތިމާއީ މަރުކަޒެއް ނެތްއިރު، އެފަދަ މަރުކަޒެއް އެޅުމަށް ޕްލޭން ކޮށްފައި ވެސް ނުވާ ކަމަށެވެ.
ސަރުކާރުން ދަނީ ރާއްޖޭގެ އެކި ރަށްރަށުގެ އިޖުތިމާއީ މަރުކަޒުތަކާއި އަދި އެހެނިހެން ތަންތަނަށް ވެސް އެކި ރޭންކުތަކުގައި ސިޔާސީ މުވައްޒަފުން ނަގަމުންނެވެ.
ސަރުކާރުން ހަރަދު ކުޑަ ކުރުމަށް ކުރިއަށް ގެންދާ މަސައްކަތުގެ ދަށުން މިދިޔަ މަހު 248 ސިޔާސީ މުވައްޒަފުން މަގާމުން ވަކި ކޮށްފައިވާ ކަމަށް ބުނެފައިވާއިރު، އެއްވެސް ތަފްސީލެއް ނުދެ އެވެ.
އެކި މަސްދަރުތަކުން އެނގިފައިވާ ގޮތުގައި ސަރުކާރުގައި ތިބި ސިޔާސީ މުވައްޒަފުންގެ އަދަދު 2،000 އާ ގަތް ކުރެ އެވެ. ނަމަވެސް ސަރުކާރުން ސީދާ އަދަދު ހާމަ ނުކުރާތީ ޖުމްލަ ތިބި ސިޔާސީ މުވައްޒަފުންގެ އަދަދު ސާފެއް ނުވެ އެވެ.
ރައީސް ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގެންއިރު ވިދާޅުވީ ސަރުކާރުގެ ސިޔާސީ މުވައްޒަފުންގެ އަދަދު 700 އަށްވުރެ އިތުރު ނުވާނެ ކަމަށެވެ. އެ އަދަދަށް ވުރެ ގިނައިން ސިޔާސީ މުވައްޒަފުން ސަރުކާރަށް ނެގުމުން ގިނަ ބަޔަކު އަންނަނީ ފާޑު ކިިޔަމުންނެވެ.
