ނ. ހޮޅުދޫ ގެއެއްގެ ތެރޭގައި މިދިޔަ ސެޕްޓެމްބަރު 10، ގައި މަރުވެފައި އޮތް ނިއުލައިފް، ޒަކިއްޔާ މޫސާ، 50، ގެ ކަރުގައި ފުން ފަސް ޒަހަމެއް ހުރި ނަމަވެސް، އޭނާ މަރައިލި ކަމަށް ބެލޭނެ އެއްވެސް ހެއްކެއް މިހައިތަނަށް ލިބިފައި ނުވާ ކަމަށް ފުލުހުން އިއްޔެ ބުންޏެވެ.
ޒަކިއްޔާގެ މަރާ ގުޅޭ ގޮތުން މައުލޫމާތު ދިނުމަށް ފުލުހުން ބޭއްވި ނޫސްވެރިންގެ ބައްދަލުވުމެއްގައި މައުލޫމާތު ދެއްވަމުން، ޗީފް އިންސްޕެކްޓާ އޮފް ޕޮލިސް މުހައްހަދު ސާމިހު ވިދާޅުވީ މިހައިތަނަށް ކުރި ތަހުގީގުން ޒަކިއްޔާ މަރައިިލި ކަމަށް ބެލޭނެ ވަރުގެ އެއްވެސް ހެއްކެއް ލިބިފައި ނުވާ ކަމަށެވެ.
"މިހައިތަނަށް ތަހުގީގުން ހޯދުނު ހޯދުންތަކުން ޒަކިއްޔާއަށް ލިބިފައިވާ އަނިޔާގެ ޒަހަމުތަކަކީ ނުވަތަ ޒަކިއްޔާ މަރުވެފައި ވަނީ އިތުރު އެއްވެސް ފަރާތެއްގެ އަމަލެއްގެ ސަބަބުން [ކަން] ދޭހަކޮށްދޭނެ އިތުރު އެއްވެސް ހެއްކެއް ފެންނަން ނެތުމާއެކު މި މައްސަލައިގައި އިތުރަށް އިތުރު މީހެއްގެ ބައިވެރިވުމެއް އޮތް ކަމަށް ތަހުގީގަށް މިހައިތަނަށް ފާހަގަކުރެވިފައި ނުވާކަން އަޅުގަނޑު ފާހަގަ ކޮށްލަން،" ސާމިހު ވިދާޅުވި އެވެ.
