ކޮޕީރައިޓާއި އެއާ ގުޅޭ އެހެނިހެން ހައްގުތަކުގެ ގާނޫނަށް އިސްލާހު ގެނައުމުގެ ބިލު އިދިކޮޅު އަދި ސަރުކާރު މެންބަރުންގެ ވެސް ތާއީދާއެކު މަޖިލީހުން މިއަދު ފާސްކޮށްފި އެވެ.
ނިލަންދޫ ދާއިރާގެ ޕީއެންސީ މެންބަރު، ފާތިމަތު ސައުދާ މިދިޔަ ޖުލައި ގައި މަޖިލީހަށް ހުށަހެޅި ބިލު މިއަދު މަޖިލީހުން ފާސްކުރީ 57 މެންބަރުންގެ ވޯޓާއެކު އެވެ. އެ ބިލު ބަލައިގަންނަން ނުފެންނަ ކަމަށް އެއްވެސް މެންބަރަކު ވޯޓެއް ނުދެއްވަ އެވެ.
ކޮޕީރައިޓް ގާނޫނަށް ގެންނަން މިއަދު ފާސްކުރި އިސްލާހުތަކުގެ ތެރޭގައި މައިގަނޑު ގޮތެއްގައި ހިމެނެނީ، ކޮޕީރައިޓްގެ ހައްގުތަކަށް ހިމާޔަތް ލިބިދެވޭ މުއްދަތު އިތުރު ކުރުމާއި ކޮޕީރައިޓް ގާނޫނުން ހިމާޔަތް ކޮށްފައިވާ ހައްގަކަށް އަރައިގަންނަ މީހަކު، އެ ކުށް ތަކުރާރު ކޮށްފިނަމަ ދެވޭ އަދަބު ދެގުނަ ކުރެވޭ ގޮތް ހެދުމެވެ.
ކޮޕީރައިޓް ގާނޫނުގައި މީގެ ކުރިން އޮންނަނީ އުފެއްދުމެއްގެ މުސައްނިފުގެ ހަޔާތުގައި އަދި އެމީހަކު މަރުވުމަށްފަހު 50 އަހަރު ވަންދެން އެ އުފެއްދުމެއް ކޮޕީރައިޓް ގާނޫނުގެ ދަށުން ހިމާޔަތް ކުރެވޭނެ ކަމަށެވެ. ނަމަވެސް މިއަދު ފާސްކުރީ އެ މުއްދަތު 70 އަހަރަށް އިތުރު ކުރުމަށެވެ.
ކޮޕީރައިޓް ގާނޫނާ ހިލާފުވެ، އެ ގާނޫނުން ހިމާޔަތް ކޮށްފައިވާ ހައްގަކަށް އުނިކަން އަންނާނެ ގޮތަށް ގަސްދުގައި އަމަލު ކުރާ މީހާއަށް ދެވޭނެ އަދަބެއްގެ ގޮތުގައި މިހާރު ބަޔާން ކޮށްފައި އޮންނަނީ 50،000ރ. އާއި 300،000ރ. އާ ދެމެދުގެ އަދަދަކުން ޖޫރިމަނާ ކުރުމެވެ. އަދި، އެ ކުށް ސާބިތުވާތާ ފަސް މަސްދުވަހުގެ ތެރޭގައި އެ ކުށް ތަކުރާރުކޮށްފިނަމަ، ކުށަށް ދެވޭ އެންމެ ބޮޑު އަދަބު ދެގުނަ ކުރެވޭ ގޮތަށް ގާނޫނުގައި މިހާރު އޮވެ އެވެ.
ނަމަވެސް މިއަދު ފާސްކުރި އިސްލާހާ އެކު، ފަސް މަސްދުވަހަށް ފަހު ވެސް ކޮޕީރައިޓުގެ ގާނޫނާ ހިލާފުވާ ކޮންމެ ފަހަރަކު، އެ ކުށަށް އަރައިގަންނަ މީހަކަށް ދެވޭ އަދަބު ދެގުނަ ކުރުމުގެ ބާރު ޝަރީއަތަށް ލިބޭނެ އެވެ.
