"ގާނޫނުއަސާސީގެ ދިފާއުގައި ރައްޔިތުންގެ" ނަމުގައި އަންނަ ޑިސެމްބަރު 10، ގައި އިދިކޮޅު އެމްޑީޕީން ބޮޑު ޖަލްސާއެއް ބާއްވަން ނިންމައި، އެ ޖަލްސާގައި ބައިވެރިވުމަށް މުޅި ރާއްޖެއަށް ދައުވަތު ދީފި އެވެ.
އިންސާނީ ހައްގުތަކުގެ ދުވަހާއި ގައުމީ މަސްވެރިންގެ ދުވަސް ވެސް ފާހަގަކުރާ ޑިސެމްބަރު 10، ގައި މި ޖަލްސާ އޮންނާނެކަން އިއުލާނުކުރެއްވީ އެމްޑީޕީގެ ހަރުގޭގައި މިރޭ ބޭއްވި ޖަލްސާއެއްގައި އެ ޕާޓީގެ ޑެޕިއުޓީ ޗެއާޕާސަން އިބްރާހިމް ވަހީދު (އިބުރޭ) އެވެ. މި ޖަލްސާ ބާއްވަނީ އަލިމަސް ކާނިވަލް ސަރަހައްދުގަ އެވެ.
ވަހީދު އާންމު ކުރެއްވި ޕާޓީގެ އިއުލާނުގައި ބުނީ، މި ޖަލްސާއަކީ ގިނަ ބައެއްގެ މަސައްކަތުން ހޯދި ޑިމޮކްރަސީ އާއި އިންސާނީ ހައްގުތައް މި ސަރުކާރުން ނިގުޅައިގަންނަމުން ދާތީ އެކަމާ ދެކޮޅަށް އަޑުއުފުލަން ބާއްވާ ޖަލްސާއެއް ކަމަށެވެ.
އިބުރޭގެ ފަހުން ވާހަކަ ދެއްކެވި އެމްޑީޕީގެ ޕީޖީ ގްރޫޕުގެ ލީޑަރު، ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް ވަނީ ރާއްޖޭގެ ހުރިހާ ރައްޔިތުންނަށް މި ޖަލްސާއަށް ދައުވަތު ދެއްވައިފަ އެވެ. ހުރިހާ ޕާޓީއެއްގެ މެންބަރުންނަށް ވެސް އޭނާ ދައުވަތުދެއްވި އެވެ.
ހާއްސަކޮށް މަސްވެރިންނާއި ރިސޯޓުތަކުގައި މަސައްކަތްކުރާ މުވައްޒަފުންނަށް އެ ޖަލްސާގައި ބައިވެރިވުމަށް ނާޒިލް އެދިވަޑައިގަތެވެ. މި ސަރުކާރުން އެ ދެ އިންޑަސްޓްރީއަށް ދެމުންދާ ގެއްލުންތައް އޭނާ ވަނީ ވަކިވަކިން ފާހަގަކުރައްވައިފަ އެވެ.
އެގޮތުން މަސްވެރިންނަށް ފައިސާ ނުދީ އެތައް ދުވަހެއް ލަސްވެގެންދިޔަ އެތައް ފަހަރަކާއި ރިސޯޓުތަކުން ޑޮލަރު މާރުކުރަން މަޖުބޫރުކުރުމުން ލިބެމުންދާ ގެއްލުންތައް ނާޒިލް ފާހަގަކުރެއްވި އެވެ.
މި އެއްވުން ވެގެންދާނީ މިދިޔަ އަހަރު ސެޕްޓެމްބަރު ބޭއްވި ރިޔާސީ އިންތިހާބަށްފަހު އެމްޑީޕީން ކާނިވަލުގައި ބާއްވާ ފުރަތަމަ ޖަލްސާއަށެވެ. އަދި، އެ ޕާޓީން އަހަރެއްހާ ދުވަހުގެ ތެރޭގައި ބާއްވާ އެންމެ ބޮޑު ޖަލްސާއަށެވެ.
