ޓޫރިޒަމް މިނިސްޓަރު އިބްރާހިމް ފައިސަލް އާއި ކުރީގެ ނައިބު ރައީސް އަހުމަދު އަދީބު ބޭރު ގައުމެއްގައި ބައްދަލުވުމެއް ބާއްވައިފި އެވެ.
އަދީބު އާއި ފައިސަލް ބައްދަލު ކުރެއްވުމަށްފަހު ނަގާފައިވާ ފޮޓޯއެއް މިހާރު އިންޓަނެޓުގައި ވެސް ދަނީ ދައުރުވަމުންނެވެ. ނަމަވެސް އެއީ ކޮން ގައުމަކު އަދި ކޮން އިރަކު ނަގާފައިވާ ފޮޓޯއެއް ކަމެއް ނޭނގެ އެވެ.
މި ހަބަރު ޝާއިއު ކުރިއިރު، އަދީބު އަދި ފައިސަލްގެ ވެސް ބަހެއް ނުލިބުނެވެ.
ނަމަވެސް، މި ބައްދަލުވުން ކުރިއަށްދިޔަކަން އެކަމުގެ މައުލޫމާތު އެނގޭ މަސްދަރަކުން ވަނީ މި ނޫހަށް ޔަގީންކޮށްދީފަ އެވެ.
ސޯޝަލް މީޑިއާގައި ދައުރުވަމުންދާ ފޮޓޯ ލިބުމާއެކު މި ނޫހުން ވާނީ މިއީ އަސްލު ފޮޓޯއެއްތޯ ބެލުމަށް ގިނަ މަސައްކަތްތަކެއް ކޮށްފަ އެވެ. އެގޮތުން އޭއައި ބޭނުންކޮށްގެން ނުވަތަ އެޑިޓުކޮށްގެން އުފައްދާފައިވާ އަސްލު ނޫން ފޮޓޯއެއްތޯ ވެސް މި ނޫހުގެ ޓީމުން ވާނީ ބަލާފަ އެވެ.
އޭއައި ފޮޓޯއެއް ނޫންކަން ކަށަވަރުކޮށް މި ނޫހުން ހޯދި ހޯދުން ---
އެ މަސައްކަތުގެ ތެރެއިން މި ނޫހުގެ ޓީމުން ބޭނުންކުރި ހުރިހާ ޓޫލަކުން ވެސް ވަނީ މިއީ އޭއައި ޖެނޭރެޓު ނުވަތަ އެޑިޓުކޮށްފައިވާ ފޮޓޯއެއް ނޫންކަން ޔަގީންވެފަ އެވެ. ނަމަވެސް ފޮޓޯގެ އިތުރު ޑޭޓާއެއް ހޯދޭ ގޮތް ވަނީ ނުވެފަ އެވެ.
ފޮޓޯގެ އަސްލު ކަށަވަރުކުރަން މި ނޫހުން ކުރި މަސައްކަތުގެ ތެރެއިން ހޯދިފައިވާ ބައެއް ނެގެޓިވްތައް ---
މީގެ ކުރިން، ރައީސް ޑރ. މުހައްމަދު މުއިއްޒު ވެސް ސިންގަޕޫރުގައި އަދީބުއާ ބައްދަލު ކުރިކަމަށް ކުރީގެ ރައީސް އަބްދުﷲ ޔާމީނު ވަނީ ތުހުމަތުކުރައްވާފަ އެވެ. ނަމަވެސް، އޮގަސްޓު މަހު ސިންގަޕޫރަށް ކުރެއްވި ދަތުރުގައި އަދީބު އާ ބައްދަލުނުކުރައްވާ ކަމަށް ރައީސް ވަނީ ވިދާޅުވެފަ އެވެ.
ޔާމީނުގެ ވެރިކަމުގައި ޓޫރިޒަމް މިނިސްޓަރުކަން އަދި ނައިބު ރައީސްކަން ކުރެއްވި އަދީބު މަގާމުން ވަކިކުރީ އެމްއެމްޕީއާރުސީގެ ހިޔާނާތުގެ މައްސަލައިގަ އެވެ. އޭނާގެ މައްޗަށް ހިޔާނާތުގެ ކުށް ސާބިތުވެ ދިގު މުއްދަތަކަށް ޖަލަށް ހުކުމް ކުރި ނަމަވެސް، މިނިވަންވީ ކުރީގެ ރައީސް އިބްރާހިމް މުހައްމަދު ސޯލިހުގެ ވެރިކަމުގެ ފަހު ދުވަސްވަރު އަދަބު ލުއިކޮށްދެއްވުމުންނެވެ.
މިނިވަންވުމަށްފަހު އަދީބު ދިރިއުޅުއްވަމުން ގެންދަވަނީ ރާއްޖެއިން ބޭރުގަ އެވެ. އެގޮތުން އިރުމަތީ އޭޝިއާގެ ގައުމުތަކާއި މެދުއިރުމަތީގެ ގައުމުތަކުން އޭނާ ވަނީ އެކި ފަހަރުމަތިން ސޯޝަލް މީޑިއާގައި ޕޯސްޓުކޮށްފަ އެވެ. މިވަގުތު އަދީބު ހުރި ގައުމެއް ޔަގީނެއް ނޫނެވެ.
