އިޒްރޭލު ޕާސްޕޯޓް އޮންނަ އެއްވެސް މީހަކަށް ރާއްޖެއަށް ދަތުރު ނުކުރެވޭ ގޮތަށް "ބްލޭންކެޓްކޮށް" ޕާސްޕޯޓް މަނާކުރުމާ ދެކޮޅު ކަމަށާއި ތާއީދުކުރަނީ ހަމައެކަނި އިޒްރޭލުގެ ވެރިން ރާއްޖެ އައުން މަނާކުރަން ކަމަށް ނޭޝަނަލް ހޮޓެލްސް އެންޑް ގެސްޓްހައުސް އެސޯސިއޭޝަން (އެންއެޗްޖީއޭ) އިން ބުނެފި އެވެ.
ގެސްޓްހައުސް އެސޯސިއޭޝަނުން މިހެން ބުނީ އިޒްރޭލްގެ ޕާސްޕޯޓުގައި ރާއްޖެއަށް އެތެރެވުން މަނާކުރަން އިދިކޮޅު އެމްޑީޕީން ރައްޔިތުންގެ މަޖިލީހަށް މީގެ ފަސް މަސްދުވަސް ކުރިން ހުށަހެޅި ބިލުގެ ކޮމިޓީ މަރުހަލާގައި މަޖިލީހުގެ 241 ކޮމިޓީއަށް ހާޒިރުކޮށް ހިޔާލު ހޯދަން އެހުމުންނެވެ.
އެގޮތުން، ބްލެންކެޓުކޮށް އިޒްރޭލު ޕާސްޕޯޓު މަނާކޮށްފިނަމަ ފަތުރުވެރިކަމަށް ބުރޫއަރާނެ ކަމަށާއި، އެ ވާހަކަ ދެކެވުމާއެކު މިހާރު ވެސް އިޒްރޭލުން އަންނަ ޓޫރިސްޓުންގެ އަދަދު ވަރަށް ބޮޑުތަނުން މަދުވެފައިވާ ކަމަށް އެ އެސޯއިއޭޝަނުގެ ފަރާތުން ވާހަކަ ދެއްކެވި އޮފިޝަލަކު ވިދާޅުވި އެވެ.
"ޖުމްލަކޮށް ޕާސްޕޯޓު ބޭންކުރަން އަޅުގަނޑުމެން އެއްވެސް ގޮތަަކަށް ތާއީދެއް ނުކުރަން މުޅި އިޒްރޭލުގެ މައްޗަކަށް. އަޅުގަނޑުމެންނަށް މައުލޫމާތު ލިބޭ ގޮތުގައި އިޒްރޭލުގެ ޕާސްޕޯޓު ގެންގުޅުއްވާ ފަލަސްތީނުގަ ގެންގުޅޭ މުސްލިމު ރައްޔިތުން ވެސް،" އޭނާ ވިދާޅުވި އެވެ.
އިޒްރޭލުގެ ގިނަ މީހުންނަކީ ޑުއަލް ސިޓިޒަންޝިޕު އޮންނަ މީހުން ކަމަށާއި އެހެންކަމުން މި ބިލުގެ މަގުސަދާމެދު ވެސް އޭނާ ސުވާލުއުފެއްދެވި އެވެ. ގެސްޓްހައުސް އެސޯއިއޭޝަނުގެ ފަރާތުން ދެން ހުށަހެޅީ އިޒްރޭލުގެ ވެރިން ރާއްޖެއަށް އައުން މަނާކުރުމަށެވެ.
"އަޅުގަނޑުމެންގެ އެދުމަކީ އިޒްރޭލުގެ ވެރިން. އާންމު ރައްޔިތުން ނުހިމެނޭ ގޮތަށް އިޒްރޭލުގެ ވެރިންގެ ޕާސްޕޯޓު ބޭންކުރުން. އެއަށް އަޅުގަނޑުމެން ވަރަށް ބޮޑަށް ތާއީދުކުރަން. އޭގެ ތެރޭގަ ސިފައިން ވެސް ނުހިމެނޭ ގޮތަށް. މުޅި އިޒްރޭލަކީ ސިފައިން ދެއްތޯ ގާތްގަނޑަކަށް. އެހެންވީމަ އެ ހިމެނިއްޖިއްޔާ އިޒްރޭލުގެ ހުރިހާ ރައްޔިތުން ހިމެނިގެންދާނެ،" އެ ޖަމިއްޔާގެ ނައިބު ރައީސް އަހުމަދު ވަހީދު ވިދާޅުވި އެވެ.
އިޒްރޭލު ޕާސްޕޯޓު ބޭންކުރަން ސަރުކާރުން ނިންމާ އެކަން އިއުލާނުކުރީ ޖޫން 2، ގަ އެވެ. އޭރު އިދިކޮޅު އެމްޑީޕީން މަޖިލީހަށް ހުށަހަޅާފައި އޮތް މި ބިލު ބަލައިގަނެ ކޮމިޓީއަށް ފޮނުވީ ޖޫން 10، ގަ އެވެ. ނަމަވެސް ބިލުގެ ކޮމިޓީ މަސައްކަތް ފެށީ މި މަހު އެވެ.
އޭރު ނިންމީ އަންނަ ފެބްރުއަރީގެ ނިޔަލަށް ކޮމިޓީ މަސައްކަތް ނިންމުމަށެވެ. އަދި ޑިސެމްބަރުގެ ނިޔަލަށް ކަމާބެހޭ އިދާރާތަކަށް ސިޓީ ފޮނުވާ ހާޒިރުކުރުމަށް ވެސް ނިންމި އެވެ. ނަމަވެސް އެ މަސައްކަތްތައް އަވަސް ކުރުމަށް އިއްޔެ ވަނީ އަލުން ނިންމާފަ އެވެ.
ބިލުގެ މަސައްކަތް ލަސްވުމާ ގުޅިގެން އިދިކޮޅު ޕާޓީ އާއި އާންމުންގެ ގިނަ ބަޔަކު ވެސް އަންނަނީ ސަރުކާރާއި މަޖިލީހުގައި އޮތް ސަރުކާރުގެ މެޖޯރިޓީގެ އިތުރުން ރައީސް ޑރ. މުހައްމަދު މުއިއްޒަށް ފާޑުކިޔަމުންނެވެ. ކޮމިޓީގެ މަސައްކަތް އަންނަ އަހަރާ ހަމައަށް ދިގުދަންމާލުމާއެކު މި ފާޑުކިޔުންތައް ވަނީ އިތުރަށް ބޮޑުވެފަ އެވެ.
ބިލުގެ މަސައްކަތް ލަސްވެފައިވަނިކޮށް، އޮކްޓޯބަރު 16، ގައި މަޖިލީހުގެ ސުޕަ މެޖޯރިޓީ އޮތް ސަރުކާރު ހިންގާ ޕީއެންސީން ވަނީ އެ މަސައްކަތް އަވަސްކުރުމަށް ގޮވާލާ ބަޔާން ނެރެފަ އެވެ. އެ ބަޔާން ނެރުމުން، އެ ބިލު ހުށަހެޅުއްވި މީކާއިލް އަހުމަދު ނަސީމް ވިދާޅުވީ ޕީއެންސީން ބަޔާން ނެރުނީ ރައްޔިތުންނަށް މަލާމާތް ކުރަން ކަމަށެވެ.
