މިފްކޯއިން މަސް ކިރަން ބޭނުން ކުރާ ދެ ބޯޓު ނީލަމުގައި ވިއްކާލަން އެ ކުންފުނިން މިރޭ އިއުލާނުކޮށްފި އެވެ.
މިފްކޯއިން ގެޒެޓު ކުރި އިއުލާނެއްގައި ބުނީ ވިއްކާލަނީ ރަނދި 22 އާއި ރަނދި 27 ކަމަށެވެ. ރަނދި 22 ގެ ނީލަން ފެށޭ އަގަކީ 500،000ރ. އެވެ. ރަނދި 27 ގެ ނީލަން ފެށޭ އަގަކީ 600،000ރ. އެވެ.
އެ ދެ ބޯޓު ވެސް މިވަގުތު އޮތީ ޅ. ފެލިވަރުގަ އެވެ. ބޯޓުތަކުގެ ހާލަތު ބަލަން ބޭނުންވާ ފަރާތްތަކުން ފެލިވަރަށް ދިޔުމުން ބޯޓުގެ އިންސްޕެކްޓް ކުރުމުގެ ފުރުސަތު ލިބޭނެ ކަމަށް މިފްކޯއިން ބުނެ އެވެ.
ރަނދި 22 އަކީ ދަގަނޑު ބޯޓެކެވެ. އެއީ 1988 ވަނަ އަހަރު ސްރީ ލަންކާގެ ކޮލޮމްބޯ ޑޮކްޔާޑުގައި ހެދި ބޯޓެކެވެ. މިފްކޯއަށް އެ ބޯޓު ގަތީ 2010 ވަނަ އަހަރެވެ. އޯގަސްޓު، 2021، ގައި އެ ބޯޓު ދުއްވުން ވަނީ ހުއްޓާލައިފަ އެވެ. އެއީ 36 މެޓްރިކް ޓަނުގެ ބޯޓެކެވެ.
ރަނދި 27 އަކީ ފައިބާ ގްލާސް ބޯޓެވެ. މިފްކޯއަށް އެ ބޯޓު ގަތީ 2018 ވަނަ އަހަރެވެ. ޖެނުއަރީ، 2024، ގައި އެ ބޯޓު ވެސް ވަނީ ދުއްވުން ހުއްޓާލައިފަ އެވެ. އެއީ 50 މެޓްރިކް ޓަނުގެ ބޯޓެކެވެ.
މިފްކޯއިން ބުނީ ނީލަމުގައި ދެ ބޯޓަށް ވެސް މަދުވެގެން އިތުރު ކުރެވޭނީ 25،000ރ. ކަމަށެވެ.
