އެންޓި ކޮރަޕްޝަން ކޮމިޝަން (އޭސީސީ) އާއި އިލެކްޝަންސް ކޮމިޝަން (އީސީ) ގެ މައްޗަށް ރައީސުލްޖުމްހޫރިއްޔާއަށް ނުފޫޒު ފޯރުވޭ ގޮތަށް، އެ ދެ ކޮމިޝަނުގެ ރައީސް އާއި ނައިބު ރައީސް އައްޔަނު ކުރުމުގެ ބާރު ލިބޭ ދެ ބިލު މަޖިލީހުން މިއަދު ފާސްކޮށްފި އެވެ.
އޭސީސީ އަދި އީސީގެ ގާނޫނަށް އިސްލާހު ގެނައުމުގެ ބިލު ވެސް ފާސްކުރީ 69 މެންބަރުންގެ ވޯޓާއެކު އެވެ. އެ ދެ ބިލު ފާސްކުރަން ނުފެންނަ ކަމަށް 10 މެންބަރުން ވޯޓު ދެއްވި އެވެ.
އީސީގެ ގާނޫނަށް ބަދަލު ގެންނަން ކެލާ ދާއިރާގެ މެންބަރު އަބްދުﷲ ޝަރީފު ހުށަހެޅުއްވި ބިލާއި އޭސީސީގެ ގާނޫނަށް ބަދަލު ގެންނަން ފެލިދޫ ދާއިރާގެ މެންބަރު އާދަމް ޒާހިރު ހުށަހެޅުއްވި ބިލު މަޖިލީހުން ފާސްކުރީ އެއްވެސް އިސްލާހެއް ނުގެނެސް ސަރުކާރުން ހުށަހެޅި ގޮތަށެވެ.
މި ބިލުތައް ތަސްދީގު ކުރުމާއެކު އެ ދެ ކޮމިޝަނުގެ ރައީސް އާއި ނައިބު ރައީސްގެ މަގާމަށް ބޭފުޅުން އައްޔަނު ކުރާނީ އެ މަގާމުތަކަށް އައްޔަނު ކުރަން ރައީސުލްޖުމްހޫރިއްޔާއަށް ފެންނަ ބޭފުޅުންގެ ނަން މަޖިލީހަށް ހުށަހަޅައިގެންނެވެ. އޭގެއިތުރުން އެ ބިލުތަކުގައި ވާގޮތުން މަގާމުތަކުގައި ތިއްބަވާ ބޭފުޅުން އިސްތިއުފާ ހުށަހަޅަން ވެސް ޖެހޭނީ ރައީސުލްޖުމްހޫރިއްޔާ އަށެވެ.
މި ދެ ބިލު ފާސްކޮށްފައި މިވަނީ އިދިކޮޅު އެމްޑީޕީ އާއި ޑިމޮކްރެޓްސްއިން މި ބިލާ މެދު ކަންބޮޑުވުން ފާޅުކޮށްފައިވަނިކޮށެވެ. އެ ދެ ޕާޓީން ވެސް ބުނެފައި ވަނީ މި އިސްލާހުތަކާއެކު އޭސީސީ އާއި އީސީއަށް ނުފޫޒު ފޯރުވުމުގެ ބާރު ރައީސްއަށް ލިބޭނެ ކަމަށެވެ.
