ހުޅުމާލެ އާއި ތިލަފުއްޓާއި ގުޅީފަޅުގައި ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ކުއްޔަށް ދޫކޮށްފައި ހުރި ބިންތަކުން ލިބެން ޖެހޭ 1.4 ބިލިއަން ރުފިޔާ އެބަހުރި ކަމަށާއި އޭގެ ތެރޭގައި ބޮޑެތި ވިޔަފާރި ކުންފުނިތައް ވެސް ހިމެނޭ ކަމަށް މާލިއްޔަތު ކޮމިޓީން މިއަދު ހާމަކޮށްފި އެވެ.
މާލިއްޔަތު ކޮމިޓީގެ ބައްދަލުވުމުގައި މިކަމާ ގުޅިގެން ކުރެވުނު މަޝްވަރާތަކުގައި މެންބަރުން ބުނީ ލިބެން ޖެހޭ ފައިސާގެ ތެރޭގައި ހިނގަމުންދާ އެއްބަސްވުންތަކާ ގުޅިގެން ލިބެން ޖެހޭ 1.2 ބިލިއަން ރުފިޔާ އާއި ބާތިލުކޮށްފައި ހުރި އެއްބަސްވުންތަކުން ލިބެން ޖެހޭ 195 މިލިއަން ރުފިޔާ އެބަ ހުރި ކަމަށެވެ.
ފައިސާ ނުދައްކާ ހުރި ބިންތަކުގެ ތެރޭގައި އެންމެ ބޮޑެތި އަދަދުތަކުން ކުލި ނުދައްކާ ހުރީ ހުޅުމާލޭގައި މަތީ ފަންތީގެ ގެދޮރުއަޅަން "ޑިވެލޮޕްމަންޓް އެންޑް ސޭލްސް ރައިޓްސް" އުސޫލުން ދޫކޮށްފައި ހުރި ބިންތަކާއި ގުޅީފަޅާއި ތިލަފުށިން ސިނާއީ ބޭނުންތަކަށް ދޫކޮށްފައި ހުރި ބިންތަކުންނެވެ.
ރައްޔިތުންގެ މަޖިލީހުގެ ހިތަދޫ މެދު ދާއިރާގެ މެންބަރު އަހުމަދު އަޒާން އޭނާގެ އެކްސް އެކައުންޓުގައި ހިއްސާކުރެއްވި މި މައްސަލައާ ގުޅޭ ލިޔުމަކުން ދައްކާ ގޮތުގައި، އެންމެ ގިނަ އަދަދެއްގެ ފައިސާ ނުދައްކާ ހުރީ "އަކުއާވީޓާ ރެސިޑެންސީސް" ތަރައްގީކުރި އެންޕީއެޗް ކުންފުނިންނެވެ. އެ ކުންފުނިން ނުދައްކާ ހުރި އަދަދު 215 މިލިއަނަށް އަރަ އެވެ.
އެޗްޑީސީއަށް އެންމެ ގިނަ ފައިސާ ނުދައްކާ ހުރި ކުންފުނިތައް
- އެންޕީއެޗް ޑިވެލޮޕްމަންޓްސް - 215.2 މިލިއަން ރުފިޔާ
- ޖައުސާ އިންވެސްޓްމަންޓް - 99.4 މިލިއަން ރުފިޔާ
- އައިލެންޑް އެކްސްޕާޓް - 85 މިލިއަން ރުފިޔާ
- ހަންބޯ ކުންފުނި - 69.9 މިލިއަން ރުފިޔާ
- ރެއިންބޯ މެގަ ޑިވެލޮޕާސް - 68.9 މިލިއަން ރުފިޔާ
- ޔޮޓް ޓުއާސް - 36.3 މިލިއަން ރުފިޔާ
- އެންސިސް ފިޝަރީޒް - 27.1 މިލިއަން ރުފިޔާ
- އަމީން ކޮންސްޓްރަކްޝަން - 25.2 މިލިއަން ރުފިޔާ
- ވޯޓާ ފްރަންޓް ހޮޓެލް އެންޑް ލެޝާ - 23.4 މިލިއަން ރުފިޔާ
- ވޯޓާ ފްރަންޓް ހޮޓެލް އެންޑް ލެޝާ 14.4 މިލިއަން ރުފިޔާ
އެ ލިސްޓުގައި ދެން ވެސް އޮތީ މި ގޮތަށް މަތީ ފަންތީގެ ފްލެޓުތައް އިމާރާތް ކުރަން ދޫކޮށްފައި ހުރި ބިންތަކުން ލިބެން ޖެހޭ ފައިސާ އެވެ.
އޭގެ ތެރޭގައި ފްލެޓުތައް ވިއްކައިގެން އެ ފައިސާއަށް ހިޔާނާތްތެރިވި މައްސަލަައިގައި ހިމެނޭ ހަސަން މަމްދޫހު (މަންޑޭ) އާ ގުޅުން އޮތް ހަންބޯ ކުންފުންޏާއި އެތައް ބައެއްގެ އަތުން ފައިސާ ނެގުމަށް ފްލެޓުތައް ނުނިންމާ އުޅޭ ޖައުސާ ކުންފުނި ހިމެނެ އެވެ. އަދި ފުލުހުންގެ ފްލެޓުތައް ތަރައްގީކުރަން ހަވާލުކުރި އައިލެންޑް އެކްސްޕާޓު ކުންފުނި ވެސް މި ލިސްޓުގައި ހިމެނެ އެވެ.
އޭގެ އިތުރުން ހުޅުމާލޭގައި ވޯޓާ ޕާކެއް ތަރައްގީކުރަން ހަވާލުކުރި ވޯޓާ ފްރަންޓު ހޮޓެލް އެންޑް ލެޝާ ކުންފުނިން ވެސް ދެ ބިމަކަށް ދައްކަން ޖެހޭ 37 މިލިއަނަށް ވުރެ ގިނަ ރުފިޔާ އެބައޮތެވެ. އެއީ މިހާރު އެޗްޑީސީން ބާތިލުކޮށްފައި އޮތް ކޮންޓްރެކްޓެކެވެ.
މާލިއްޔަތު ކޮމިޓީން މިއަދު ނިންމީ މި ފައިސާތައް ހޯދަން އެޗްޑީސީން ކުރަމުންދާ މަސައްކަތްތަކާއި ކުރެވިފައި ހުރި މަސައްކަތްތަކުގެ އިތުރުން މި ފައިސާ ނުހޯދޭ ކަމުގައި ވަނީ ނަމަ ކުރިއަށް އޮތް ތަނުގައި އެ ކުންފުނިން އަޅަން ގަސްތުކުރާ ފިޔަވަޅުތައް އެ ކޮމިޓީއާ ހިއްސާކުރަން އެ ކުންފުންޏަށް އެންގުމަށެވެ. އަދި ބާތިލުކޮށްފައި ހުރި އެއްބަސްވުންތަކުގައި ހުރި ބިންތަކުގެ މިހާރުގެ ހާލަތު ދެނެގަތުމަށް ވެސް ކޮމިޓީން ނިންމާފައިވެ އެވެ.
