މޯލްޑިވްސް އިސްލާމިކް ބޭންކް (އެމްއައިބީ) ގެ އެޕްލައިނައު ޕޯޓަލްއަށް ބައިނަލްއަގުވާމީ އެވޯޑެއް ލިބިއްޖެ އެވެ.
އިންޑިއާގެ މުމްބާއީގައި ބޭއްވި ގްލޯބަލް ފިންޓެކް އިނޮވޭޝަން އެވޯޑްސްގައި އެމްއައިބީ އެޕްލައިނައު ޕޯޓަލްއަށް ލިބުނީ މޯސްޓް އިނޮވޭޓިވް ޑިޖިޓަލް އޮންބޯޑިން ރޯލްއައުޓްގެ އެވޯޑެވެ.
އައިބީއެސް އިންޓެލިޖެންސްއިން ހޮވާ އެ އެވޯޑު އެޕްލައި ނައު ޕޯޓަލްއަށް ލިބުނީ މެދުއިރުމަތި އަދި އޭޝިއާ ސަރަހައްދުގެ ގިނަ ބޭންކުތަކާ ވާދަކޮށްގެންނެވެ.
އެމްއައިބީ އެޕްލައި ނައު ޕޯޓަލްއަކީ ވަގުތުން އެކައުންޓު ހުޅުވުމުގެ ހިދުމަތް ލިބޭ ރާއްޖޭގެ ހަމައެކަނި ޕޯޓަލް އެވެ. އެކައުންޓު ހުޅުވުމުގެ އިތުރުން މި ޕޯޓަލްއިން އެ ބޭންކުގެ ހުރިހާ ހިދުމަތްތަކަށް އެދެވެ އެވެ.
އެމްއައިބީ އެޕްލައި ނައު ޕޯޓަލްއަކީ އީފާސް މެދުވެރިކޮށް ކަސްޓަމަރުން ވެރިފައި ކުރުމުގެ ގާބިލުކަން ލިބިގެންވާ ޕޯޓަލްއެކެވެ. އަމިއްލަ ފަރުދުންގެ އިތުރުން އެ ޕޯޓަލް މެދުވެރިކޮށް ވިޔަފާރިތަކަށް ވެސް ބޭންކުތަކަށް ނުގޮސް އެކައުންޓު ހުޅުވެ އެވެ.
އިކޮނޮމިކް މިނިސްޓްރީގެ ޑޭޓާބޭސްގެ އެހީގައި ވިޔަފާރި ވެރިފައިކޮށް އެ ބޭންކުން ދަނީ އެންމެ ކުރިއަރާފައިވާ ގައުމުތަކުގައި ދޭ ފަދަ ރައްކާތެރި ޒަމާނީ ހިދުމަތެއް ދެމުންނެވެ.
އެ އެވޯޑު ލިބުމުން އެމްއައިބީގެ ޕީއާރް އޮފިސަރު އަހުސަން ޖަމީލް ވިދާޅުވީ އެޕްލައިނައު ޕޯޓަލްއަކީ 100 ޕަސެންޓު ދިވެހިންގެ މަސައްކަތެއް ކަމަށާއި އެ އުފެއްދުމަށް އެވޯޑެއް ލިބުމަކީ ދިވެހި ޑިވެލޮޕަރުންގެ ހުނަރު މުޅި ދުނިޔެއަށް ފެނިގެންދިޔަ ކަމެއް ކަމަށެވެ.
އެޕްލައި ނައު ޕޯތަލްގެ އިތުރުން ވެސް އެމްއައިބީން ދަނީ ޒަމާނީ ވަސީލަތްތަކުގެ އެހީގައި ރާއްޖެއަށް އާ ކަންކަން ތައާރަފް ކުރަމުންނެވެ. އެގޮތުން ކޭޝް ކާޑުގެ ބަދަލުގައި ބޭންކުން ކުރެވިދާނެ އަނގޮޓިއެއް އެ ބޭންކުން ވަނީ ތައާރަފްކޮށްފަ އެވެ.
