ވަކި ކުރުމުގެ މަސައްކަތް މަޖިލީހުގައި ކުރިއަށް ދަނިިކޮށް އެންޓި ކޮރަޕްޝަން ކޮމިޝަނުގެ ނައިބު ރައީސް އަބްދުއްސަލާމް އާއި އެ ކޮމިޝަނުގެ މެންބަރު ތޯހާ މުހައްމަދު މިއަދު އިސްތިއުފާ ދެއްވައިފި އެވެ.
މަގާމުން އިސްތިއުފާދެއްވިކަން އެ ދެ ބޭފުޅުން ވެސް "އަދަދު" އަށް ކަށަވަރު ކޮށްދެއްވި އެވެ.
އިސްތިއުފާ ދެއްވައި ރައީސް ޑރ. މުހައްމަދު މުއިއްޒުއަށް ތޯހާ ފޮނުއްވާފައި އޮތް ސިޓީގައި ވަނީ އޭނާގެ މައްޗަށް މަޖިލިސް ކޮމިޓީ ރިޕޯޓުގައި ކޮށްފައިވާ ހުރިހާ ތުހުމަތުތަކެއް ދޮގު ކޮށްފަ އެވެ.
އޭނާގެ ސިޓީގައި ލިޔުއްވާފައި ވަނީ އެއީ އެއްވެސް އަސާސެއް ނެތް ތުހުމަތުތަކެއް ކަމަށާއި އެ ތުހުމަތުތަކަށް ބުރަވެ މަގާމުން ވަކި ކުރުމުގެ މަސައްކަތް މަޖިލީހުން ކުރުމަކީ ގާނޫނުން އެނާއާ މަތިކޮށްފައިވާ ޒިންމާތައް އަދާ ކުރުމަށް ހުރަސް އެޅުން ކަމަށެވެ.
"އަޅުގަނޑު ކޮމިޝަނުގެ ގާނޫނާ ހިލާފަށް އަމަލު ކޮށްފައިވާ ކަމަށް ބުނެ އަޅުގަނޑުގެ މައްޗަށް އެއްވެސް އަސާސެއް ނެތް ތުހުމަތުތަކެއްކޮށް، ރައްޔިތުންގެ މަޖިލީހުގެ މިނިވަން މުއައްސަސާތަކާ ބެހޭ ކޮމިޓީން އަޅުގަނޑުގެ އިތުބާރު ނެތް ކަމުގެ މައްސަލައެއް ބަލަމުން ދިޔުމަކީ ދިވެހިރާއްޖޭގެ ގާނޫނުއަސާސީ އާއި އެންޓި ކޮރަޕްޝަން ކޮމިޝަންގެ ގާނޫނުން އަޅުގަނޑާ މަތިކޮށްފައިވާ ޒިންމާތައް މިނިވަންކަމާއި ނަޒާހާތްތެރިކަމާ އެކު އަދާ ކުރުމަށް ހުރަސް އެޅޭފަދަ އަމަލެއްކަމަށް އަޅުގަނޑަށް ގަބޫލު ކުރެވޭ،" އިސްތިއުފާ ދެއްވާ ސަބަބެއްގެ ގޮތުގައި ތޯހާ ވިދާޅުވެފައިވެ އެވެ.
އެ ދެ ބޭފުޅުން އިސްތިއުފާ ދެއްވާފައި މިވަނީ އޭސީސީގައި އެ ދެ ބޭފުޅުން ފުރުއްވަމުން ގެންދެވި މަގާމުން ވަކިކުރުމުގެ މަސައްކަތް މަޖިލީހުގެ މިއަދުގެ ޖަލްސާއަށް އެޖެންޑާކޮށް ވޯޓާ ހަމައަށް ގޮސްފައި އޮއްވަ އެވެ.
އެ ދެ ބޭފުޅުން ވަކި ކުރުމުގެ މައްސަލަ ދިރާސާކޮށް މިނިވަން މުއައްސަސާތަކުގެ ކޮމިޓީން ތައްޔާރު ކުރި ރިޕޯޓުގައި ވަނީ ގިނަ ތުހުމަތުތަކެއް އެ ބޭފުޅުންނަށް ކޮށްފަ އެވެ.
އެގޮތުން ބިިންވެރިޔާ ސްކީމުގެ މައްސަލަ ތަހުގީގު ކުރުން ލަސް ކުރުމާއި އެހެން ލޯފާމެއްގައި މަސައްކަތް ކުރުން ފަދަ ގާނޫނާ ހިލާފު ކަންކަން ހިމެނެ އެވެ.
އޭސީސީގެ ނައިބުރައީސް ސަލާމްގެ މައްޗަށް ކުރާ ތުހުމަތުތައް:
- ކުރީގެ ބަންޑާރަނައިބެއްގެ މައްޗަށް ތުހުމަތު ކުރެވުނު މައްސަލައެއްގައި ދައުވާ ކުރެވޭ ވަރަށް ހެކި ހުރި ނަމަވެސް، އެ މައްސަލައިގައި ދައުވާ ނުކުރެވޭނެ ކަމަށް ކަނޑައަޅައި އެ މައްސަލަ ފައިލް ކުރުމުގައި އިސް ދައުރެއް އަދާކުރުން.
- ބިންވެރިޔާ މައްސަލަ އިތުރަށް ތަހުގީގު ކުރުމަށް ޕްރިލިމިނަރީ އިންވެސްޓިގޭޝަނުން ސަޖެސްޓު ކޮށްފައި ވަނިކޮށް، އިންވެސްޓިގޭޝަން އޯވާސީ ކުރާ އިސްފަރާތުގެ ހައިސިއްޔަތުން އެ މައްސަލަ އިތުރަށް ތަހުގީގު ކުރުމަށް ފުރުސަތު ނުދީ މައްސަލަ ހުއްޓުވުން.
- ބިންވެރިޔާ މައްސަލަ ހުއްޓުވީ އަމިއްލަ މަސްލަހަތު އިސްކޮށް، ވަކި ސިޔާސީ ޕާޓީއަކަށް ގެއްލުންވެދާނެތީ އަދި އެ މައްސަލައިގައި ތުހުމަތު ކުރެވޭ ފަރާތުގެ ފޯނު ހިފެހެއްޓުމުގެ އަމުރު ހޯދުން ލަސްކޮށް ހެކި ނައްތާލަން ފުރުސަތު ދިނުމުގައި އިސްދައުރެއް އަދާކުރި.
- އޭސީސީގެ އޮނިގަނޑު އިސްލާހުކޮށް، ފޮރެންސިކް ސެކްޝަން ހަދައި އެތަނުގެ ހެޑަކަށް ގާތް މުވައްޒަފެއްލި. އެ ސެކްޝަނުން ކުރާ މާ ބޮޑު މަސައްކަތެއް ވެސް ނެތްއިރު، އެތަން ކުރިއަރުވަން މަސައްކަތް ނުކުރޭ.
- އޭސީސީގެ އޮނިގަނޑު އިސްލާހުކޮށް އާ ޑިޕާޓްމަންޓެއް ހަދައި ގާތް މުވައްޒަފަކު ހެޑަކަށް ލާން މަސައްކަތް ކޮށްފައިވޭ އަދި އެކަމުގައި އިސް ދައުރެއް އަދާކުރި.
- ބޭނުންވާ މައްސަލަތައް ވަކި ގޮތަކަށް ނިންމަން މެންބަރުންނަށް ބާރު އެޅުމުން އަންގާ ގޮތަކަށް މެންބަރުން މައްސަލަތައް ނިންމާ. އަދި މައްސަލަތައް އެޖެންޑާ ކުރުމުގައި އަމިއްލަ މަސްލަހަތަށް އިސްކަންދީފައިވޭ.
- ނުފޫޒު ފޯރުވައިގެން ބޭނުންވާ މައްސަލައެއް ބޭނުންވާ ދުވަހަކަށް އެޖެންޑާކޮށް ކުރިއަށް ގެންގޮސްފައިވޭ.
އޭސީސީގެ މެންބަރު ތޯހާގެ މައްޗަށް ކުރާ ތުހުމަތުތައް:
- އޭސީސީން ވަކި ކުރި މުވައްޒަފެއްގެ މައްސަލަ ވަޒީފާއާ ބެހޭ ޓްރައިބިއުނަލުން ނިންމި ނިންމުން ހައި ކޯޓުގައި އިސްތިއުނާފު ކޮށްފައި ވަނިކޮށް، ނުފޫޒުން އެ އިސްތިއުނާފު ބާތިލުކޮށް ކުރިން އޭސީސީން އަމަލު ކޮށްފައި ނުވާ ގޮތަށް އެ މުވައްޒަފު އެހެން ދެ ތަނެއްގައި ވަޒީފާ އަދާކުރަމުންދިޔަ މުއްދަތު ހިމަނައިގެން ކޮމިޝަނުގެ ލީގަލް ޓީމުގެ ލަފަޔާ ހިލާފަށް ދެ ލައްކައަށްވުރެ ގިނަ ރުފިޔާގެ ބަދަލުދީފައިވޭ.
- ކުރީގެ ބަންޑާރަނައިބެއްގެ މައްޗަށް ކުރެވުނު ތުހުމަތެއްގައި ދައުވާ ކުރެވޭ މިންވަރަށް ހެކި ހުރި ނަމަވެސް، ދައުވާ ނުކޮށް މައްސަލަ ފައިލް ކުރުމުގައި އިސް ދައުރެއް އަދާކުރި.
- އޭސީސީގެ މެންބަރުންނަށް އެހެން ވަޒީފާއެއް އަދާ ނުކުރެވޭނެ ކަމަށް ބުނާއިރު، ރާއްޖޭގެ ލޯފާމެއްގެ ވެބްސައިޓުގައި އެ ލޯފާމުގެ އެޓާނީންގެ ތެރޭގައި ހިމެނޭ.
އޭސީސީގެ ނައިބު ރައީސް އަބްދުއްސަލާމް އާއި މެންބަރު ތޯހާ ވަކިކުރަން ހުށަހެޅީ އެންޓި ކޮރަޕްޝަން ކޮމިޝަނުގެ ގާނޫނުގެ 17 ވަނަ މާއްދާގެ ހ. އަދި ށ. އާ ހިލާފަށް އަމަލުކޮށްފައިވާ ކަމަށް ތުހުމަތުކޮށް މިނިވަން މުއައްސަސާތަކުގެ ކޮމިޓީއަށް ލިބިފައިވާ ދެ މައްސަލައަކާ ގުޅިގެންނެވެ.
އޭސީސީއަށް ތޯހާ އަދި އަބްދުއްސަލާމް އައްޔަނުކުރީ މާޗު 17، 2022، ގަ އެވެ.
މިއީ ރައީސް ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގަތުމަށް ފަހު މިނިވަން މުއައްސަސާއެއްގެ މެންބަރުންތަކެއް ވަކިކުރަން މަޖިލީހުން މަސައްކަތް ކުރާ ފުރަތަމަ ފަހަރެވެ.
