ސްޓޭޓު ޓޭރޭޑިން އޮގަނައިޒޭޝަން (އެސްޓީއޯ) އިން ހަދަން ނިންމާފައިވާ 25 ބުރީގެ ވިޔަފާރި އިމާރާތް 15 ބުރިއަށް ކުޑަކުރަން ނިންމައިފި އެވެ.
އެސްޓީއޯގެ ހެޑް އޮފީސް ހުރި އިމާރާތާ ޖެހިގެން، އެސްޓީއޯގެ ބޮޑު ގުދަނެއްގެ ހަދާފައިވާ 15000 އަކަފުޓޫގެ ބިމުގައި 25 ބުރީގެ އިމާރާތެއް ހަދާނެ ބަޔަކު ހޯދަން އޯގަސްޓު މަހު އިއުލާނު ކުރި އެވެ. ނަމަވެސް އެ މަޝްރޫއަށް ބަދަލު ގެނެސް، މިހާރު ނިންމާފައި ވަނީ 15 ބުރީގެ އިމާރާތެއް ހަދަން ކަމަށް، އެސްޓީއޯގެ މެނޭޖިން ޑިރެކްޓަރު ޝިމާދު އިބްރާހިމް ވިދާޅުވި އެވެ.
"ކުރިން ވިސްނީ 25 ބުރީގެ އިމާރާތެއް ހަދަން. ނަމަވެސް މިހާރު ހައުސިން މިނިސްޓްރީއާ ވާހަކަ ދައްކައިގެން 15 ބުރިއަށް އިމާރާތް ކުރަން ނިންމާފައި ވަނީ،" ޕީއެސްއެމްއިން ރޭ ގެނެސްދިން ރާއްޖެމިއަދު ޕްރޮގްރާމުގައި ޝިމާދު ވިދާޅުވި އެވެ.
އެ މަޝްރޫއުގެ ބޭނުމަކީ އެސްޓީއޯގެ އޮފީސްތައް ހިންގާނެ ޖާގައިގެ ދަތިކަން ހައްލުކޮށް، ވިޔަފާރީގެ އިތުރު ކަންކަން ގާއިމުކުރުން ކަމަށް އެސްޓީއޯއިން ކުރިން ބުނެފައިވެ އެވެ.
ޝިމާދު ރޭ ވިދާޅުވީ މިހާރު ކުރަމުންދަނީ މަޝްރޫއުގެ ފީސިބިލިޓީ ހެދުމުގެ މަސައްކަތް ކަމަށާއި އެއަށް ފަހުން ބީލަމަށް ހުޅުވާލާނެ ކަމަށެވެ.
އެސްޓީއޯގެ އޮފީސްތަކާއި އެ ކުންފުނީގެ ސަބްސިޑިއަރީ ކުންފުނިތަކުގެ އޮފީސްތައް ބަދަލު ކުރާނީ އާ ބިލްޑިންއަށް ކަމަށް ކަމަށާއި އޭގެ އިތުރުން، އިވެންޓުތައް ބޭއްވޭނެ ޒަމާނީ ހޯލްތަކާއި ވަސީލަތްތައް ގާއިމުކުރާނެ ކަމަށް ޝިމާދު ވިދާޅުވި އެވެ.
