މާލެގެ މޫނުމަތީ އޮތް ކ. ފުނަދޫގައި ގާއިމުކޮށްފައިވާ އެސްޓީއޯގެ ފިއުލް ފާމް ތިލަފުއްޓަށް ބަދަލުކުރަން ނިންމައި، އެތަން ޑިޒައިންކުރުމުގެ މަސައްކަތް ފަށާފައިވާ ކަމަށް އެސްޓީއޯގެ މެނޭޖިން ޑިރެކްޓަރު ޝިމާދު އިބްރާހިމް ވިދާޅުވެއްޖެ އެވެ.
ޕީއެސްއެމްއިން ރޭ ގެނެސްދިން ރާއްޖެ މިއަދު ޕްރޮގްރާމުގައި ޝިމާދު ވިދާޅުވީ "ތިލަފުށިން ރަނގަޅު ސައިޒެއްގެ ބިމެއް ލިބޭކަމުގެ އުފާވެރި ހަބަރު އޮތީ ލިބިފައި" ކަމަށެވެ. ބިމަކީ ފުނަދޫ ބަނދަރަށް ވުރެ ބޮޑު ބަނދަރެއް ވެސް ހެދޭ ވަރުގެ ތަނެއް ކަމަށް އޭނާ ވިދާޅުވި އެވެ.
"އެހެންވީމާ އަޅުގަނޑުމެންގެ އަމާޒަކީ ވީހާ ވެސް އަވަހަކަށް ތިލަފުށީގައި ރަނގަޅު ސްޓޯރޭޖެއް ގާއިމުކޮށް ރާއްޖެއަށް ބޭނުންވާ ތެލަށް ބަލާފައި ރަނގަޅު ސައިޒެއްގެ ސްޓޯރޭޖުތަކެއް ގާއިމުކުރުން،" ޝިމާދު ވިދާޅުވި އެވެ.
ރާއްޖޭގެ ތެލުގެ ޑިމާންޑު މަތިވެގެން ދިޔަ މިންވަރާ އަޅައި ބަލާއިރު ފުނަދޫގެ ޖާގަ ކުޑަވެފައިވާ ކަމަށް އޭނާ ވިދާޅުވި އެވެ.
އެސްޓީއޯގެ މެނޭޖިން ޑިރެކްޓަރު ޝިމާދު. -- ފޮޓޯ: އަދަދު
ފިއުލް ފާމް ތިލަފުއްޓަށް ބަދަލުކުރުމަށްޓަކައި ކޮންސަލްޓެންޓެއް ނަގައިގެން، ކޮންސެޕްޓާއި ޑިޒައިން އަދި މުޅި މަޝްރޫއުގެ އަގު ހެދުމުގެ މަސައްކަތް ކުރިއަށް ގެންދާ ކަމަށް ޝިމާދު ވިދާޅުވި އެވެ. އެއަށް ފަހު މަޝްރޫއުގެ އަމަލީ މަސައްކަތް ކުރާނެ ބަޔަކު ހޯދަން ބީލަމަށް ލާނެ އެވެ.
އެ މަޝްރޫއު ފެށުމަށް ފަހު ނިންމަން 18 މަހާއި 24 މަހާ ދެމެދުގެ މުއްދަތެއް ނަގާނެ ކަމަށް ޝިމާދު ވިދާޅުވި އެވެ.
ތިލަފުށީގައި ފިއުލް ފާމު ގާއިމު ކުރުމުން، ތެޔޮ ރައްކާކުރެވޭ މިންވަރު ގިނަވުމާއެކު، ތެލުގެ އަގަށް ހެޔޮ ބަދަލެއް އަންނާނެކަން ވެސް ޝިމާދު ފާހަގަ ކުރެއްވި އެވެ.
ފުނަދޫ ފިއުލް ފާމް މި ސަރުކާރުން ފުރަތަމަ ބަދަލު ކުރަން އުޅުނީ ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އަށް ދީފައި އޮތް ކ. މާގިރިފަޅު ހިއްކައިގެން އެތަނަށެވެ.
ނިމިދިޔަ އެމްޑީޕީ ސަރުކާރުން މާގިރިފަޅު އެޗްޑީސީއަށް ދިނީ، އެ ސަރުކާރުން ކުރިއަށް ގެންދިޔަ ބިންވެރިޔާ އާއި ގެދޮރުވެރިޔާ ސްކީމުގެ ދަށުން ދޫކުރާ ގޯތިތަކާއި ސޯޝަލް ހައުސިންއަށް ހާއްސަކޮށްފައިވާ ބިމުގެ އަގުގެ ގޮތުގަ އެވެ.
ފިއުލް ފާމް ބަދަލުކުރުމަށް ފަހު، ފުނަދޫ ތަރައްގީކުރާ ގޮތުގެ ކުރެހުމެއް.
ފުނަދޫ ހުސްކުރަން ސަރުކާރުން ނިންމީ، އެ ރަށް ސްޕެޝަލް އިކޮނޮމިކް ޒޯނެއްގެ ގޮތުގައި ތަރައްގީކޮށް، ބައިނަލްއަގުވާމީ ފައިނޭންޝަލް ސެންޓަރެއް ހެދުމަށެވެ. މި މަޝްރޫއާއެކު މާލެއާއި ފުނަދޫ އަދި ވެލާނާ އިންޓަނޭޝަނަލް އެއާޕޯޓު ގުޅާލަން ވަނީ ނިންމައިފަ އެވެ.
މި ތިން ރަށް ލެ މޮނޯރެއިލްއިން ގުޅާލުމުގެ މަޝްރޫއު ކުރިއަށް ގެންދިއުމަށް މޯލްޑިވްސް އެއާޕޯޓްސް ކޮމްޕެނީ ލިމިޓެޑު (އެމްއޭސީއެލް) އިން އޮކްޓޯބަރު 15، ގައި ވަނީ ޗައިނާގެ ބެއިޖިން އާބަން ކޮންސްޓްރަކްޝަން ގްރޫޕް (ބީޔޫސީޖީ) އާއެކު އެމްއޯޔޫއެއްގައި ސޮއިކޮށްފަ އެވެ.
