ރައްޔިތުންގެ މަޖިލީހުގެ މެންބަރުން މަގާމުން ވަކި ކުރުމުގެ ފުރިހަމަ ބާރު ސިޔާސީ ޕާޓީތަކަށް ދިނުމުގެ ބަދަލުގައި، އެ ބާރު ސީދާ މެންބަރުން ނިސްބަތްވާ ދާއިރާގެ ރައްޔިތުންނަށް ދިނުމަށް އިސްލާހެއް ގަލޮޅު ދެކުނު ދާއިރާގެ މެންބަރު މީކާއިލް ނަސީމް މިއަދު ހުށަހަޅުއްވައިފި އެވެ.
ސިޔާސީ ޕާޓީގެ މެންބަރަކުން ވަކި ކުރެވުނު މެންބަރަކު، ރައްޔިތުންގެ މަޖިލީހުގެ މެންބަރުކަމުގައި ދެމި ހުރުމާމެދު އެ ދާއިރާގެ މެދުގައި ފެންނަ ނުފެންނަ ވޯޓެއް ނަގަންވާނެ ކަމަށް އެ ބިލުގައި ބުނެފައިވެ އެވެ.
އަދި އެ މެންބަރަކު ވަކި ކުރުމަށް ނުފެންނަ ކަމަށް ދާއިރާގެ ވޯޓުދޭ މީހުންގެ އަގުލަބިއްޔަތު ލިބިއްޖެނަމަ، ހިނގަމުންދާ ދައުރުގެ ބާކީ އޮތް މުއްދަތުގައި އެ މެންބަރަކު ހުންނާނީ ވަކި ސިޔާސީ ޕާޓީއަކަށް ނިސްބަތް ނުވާ މެންބަރެއް ގޮތުގައި ކަމަށް ވެސް ބިލުގައި ފާހަގަކޮށްފައިވެ އެވެ.
އެ އިސްލާހުގައިވާ ގޮތުން އިޖުރާއަތު ހިންގަންވާނީ، ނިސްބަތްވާ އިންތިހާބީ ދާއިރާއަކީ މާލެ އާއި ސިޓީތައް ފިޔަވައި އެހެން އިންތިހާބީ ދާއިރާއެއްނަމަ، އެ ދާއިރާއަކަށް ވޯޓު ދިނުމުގެ ހައްގު ލިބިފައިވާ އާބާދީގެ 25 ޕަސަންޓު ރައްޔިތުން ސޮއިކޮށް ޕެޓިޝަނެއް ހުށަހަޅާފައިވާނެމަ އެވެ.
އަދި މާލެ އާއި ސިޓީ ތަކުގައިވާނަމަ، އެ ދާއިރާއަކަށް ވޯޓު ދިނުމުގެ ހައްގު ލިބިފައިވާ އާބާދީގެ 15 ޕަސަންޓު ރައްޔިތުން ސޮއިކޮށް ޕެޓިޝަނެއް ހުށަހަޅާފައިވާނަމަ އެވެ
މީކާއިލް މަޖިލީހަށް ހުށަހަޅުއްވީ ގާނޫނު އަސާސީގެ 73 ވަނަ މާއްދާގެ (ރ) ގެ ފަހަތެއް އަކުރެއް އިތުރު ކުރުމަށް ހުށަހަޅާފައިވާ އިސްލާހު އުނި ކުރުމަށްފަހު، ގާނޫނު އަސާސީގެ 73 ވަނަ މާއްދާގެ (ނ) ގެ ފަހަތަށް އަކުރެއް އިތުރު ކުރުމަށެވެ.
އެގޮތުން މީކާއިލް މީކާއިލް ހުށަހަޅުއްވާފައިވާ ގޮތުން މަޖިލީހަށް އިންތިހާބުވެފައިވާ މެންބަރަކު ހަތަރު ހާލަތެއްގައި އެ މެންބަރަކު މަޖިލީހުގެ މެންބަރުކަމުން ވަކިވާނެ ކަމަށް ބަޔާން ކޮށްފައިވެ އެވެ. އެއީ:
- ސިޔާސީ ޕާޓީއެއްގެ މެންބަރެއްގެ ހައިސިއްޔަތުން ރައްޔިތުންގެ މަޖިލީހަށް އިންތިހާބުވެފައިވާ މެންބަރެއް އަމިއްލަ އިސްނެގުމަށް އިންތިހާބުވީ ޕާޓީއަކުން ނުވަތަ އެހެން ސިޔާސީ ޕާޓީއަކަށް ބަދަލުވުން.
- އަމިއްލަ ގޮތުން އިންތިހާބުވެފައިވާ މީހަކު ސިޔާސީ ޕާޓީއެއްގެ މެންބަރުކަމުން ވަކިވުން.
- އެ މީހަކު ރައްޔިތުންގެ މަޖިލީހަށް އިންތިހާބުވެފައި ވަނީ ސިޔާސީ ޕާޓީއެއްގެ މެންބަރެއްގެ ހައިސިއްޔަތުން ކަމަށްވެފައި، ޕާޓީގެ ނިންމުމާ ހިލާފަށް ރައްޔިތުންގެ މަޖިލީހުން، ނުވަތަ އެ މަޖިލީހުގެ ކޮމިޓީއެއްގައި ނިންމާ ނިންމުމެއްގައި ވޯޓު ދިނުމުގެ ސަބަބުން ނުވަތަ އެނޫން ވެސް ސަބަބަކަށްޓަކައި އެ ޕާޓީގެ އަސާސީ ގަވާއިދާ އެއްގޮތަށް، އެ އިންތިހާބުވި ދައުރުގެ ތެރޭގައި އެމީހަކު އެ ޕާޓީގެ މެންބަރުކަމުން ވަކިކުރާ ހާލަތެއްގައި، އޭނާ އިންތިހާބުވީ ދާއިރާގެ ވޯޓު ދިނުމުގެ ހައްގު ލިބިފައިވާ މީހުންގެ އަގުލަބިއްޔަތު އޭނާ އެ މަގާމުން ވަކި ކުރުމަށް ނިންމުން.
- މެންބަރަކު މަގާމުން ވަކި ކުރުމަށް، އެ މެންބަރަކު އިންތިހާބުވެފައިވާ ދާއިރާއަކަށް ވޯޓުލުމުގެ ހައްގު ލިބިފައިވާ ޖުމްލަ އާބާދީގެ ވަކި އިންސައްތައެއްގެ ރައްޔިތުން ސޮއިކޮށް ރައްޔިތުންގެ މަޖިޅިހަށް ހުށަހަޅާ ޕެޓީޝަނެއް ރައްޔިތުންގެ މަޖިލީހުގެ ކަމާބެހޭ ކޮމިޓީން ދިރާސާކޮށް، އެ މެންބަރަކު މަގާމުން ވަކި ކުރުމަށް އެ ދާއިރާގެ ވޯޓުލުމުގެ ހައްގު ލިބިފައިވާ އާބާދީގެ މެދުގައި އާންމު ވޯޓެއް ނެގުމަށް ނިންމައި، އެ ވޯޓުލާ މީހުންގެ އަގުލަބިއްޔަތުން އެ މެންބަރަކު މަގާމުން ވަކި ކުރަން ނިންމުން..
