އިންޑިއާގެ އަސްކަރީ އުޅަނދުތައް އޮޕަރޭޓު ކުރުމަށް ތިބި އެ ގައުމުގެ ސިފައިން އަނބުރާ ފޮނުވާލުމަށް ފަހު މި ވެރިކަމުގައި ގެނައި "މަދަނީން"ގެ ހުރިހާ ތަފުސީލެއް ހާމަކުރަން އިންފޮމޭޝަން ކޮމިޝަނަރުގެ އޮފީސް (އައިކޮމް) އިން ޑިފެންސް މިނިސްޓްރީއަށް އަންގައިފި އެވެ.
އެއީ މަދަނީންކަން ކަށަވަރުކުރި ގޮތާއި، އެ މީހުންގެ ތަފުސީލުތަކާއި އުޅަނދުތައް އޮޕަރޭޓުކުރުމުގާ އަމަލުކުރާ ގޮތްތައް ހޯދުމަށް، މައުލޫމާތު ހޯދާ ލިބިގަތުމުގެ ހައްގުގެ ގާނޫނުގެ ދަށުން "އަދަދު" އިން އެދުނީ މެއި 12، ގަ އެވެ.
ނަމަވެސް އެ މީހުންގެ ވަނަވަރާއި އެވްރެޖް އުމުރާއި އޭގެ ތެރޭގައި ހިމެނޭ އަންހެނުންނާއި ފިރިހެނުންގެ އަދަދާއި އޭގެން އެއްވެސް މީހަކު މީގެ ކުރިން އިންޑިއާގެ އަސްކަރިއްޔާގައި މަސައްކަތް ކުރިކަން ސާފުކޮށްދޭން އެދުނު ނުކުތާތަކުގެ ޖަވާބު ސިއްރުކުރަން ޑިފެންސް މިނިސްޓްރީން މީގެ ކުރިން ވަނީ ނިންމާފަ އެވެ. އަދި، ނޮވެމްބަރު 17، 2023 އިން ފެށިގެން ހަމަ އެ އުޅަނދުތަކުން ކުރި ދަތުރުތަކުގެ އަދަދު ވެސް ޑިފެންސުން ވަނީ ސިއްރުކޮށްފަ އެވެ.
ޑިފެންސުން ސިއްރުކުރަން ނިންމި މައުލޫމާތުތަކަށް އެދި މި ނޫހުން ވާނީ އައިކޮމްއަށް މައްސަލަ ހުށަހަޅާފަ އެވެ. ދެތިން މަހަށް ދިގުދެމިގެންދިޔަ މި މައްސަލާގައި ހަތަރު އަޑުއެހުމެއް ވަނީ ކުރިއަށް ގެންގޮސްފަ އެވެ. މައްސަލަ ނިންމާ، ނިންމި ގޮތުގަ ލިޔުން އައިކޮމް އިން ހިއްސާކުރީ ނޮވެމްބަރު 14، ގަ އެވެ.
އިންފޮމޭޝަން ކޮމިޝަނަރު އަހުމަދު އާހިދު ރަޝީދު ފޮނުއްވި ލިޔުމުގައި، ޑިފެންސަށް އަންގާފައިވަނީ ރަސްމީ ފަސް ދުވަހުގެ ތެރޭގައި ޑިފެންސުން ސިއްރުކުރި މައުލޫމާތުތައް މި ނޫހަށް ދޭން ޖެހޭނެ ކަމަށެވެ.
މީގެ އިތުރުން، މަދަނީން ގެނައުމަށް ދިވެހި ސަރުކާރުން ވަކި އެއްބަސްވުން ހަދާފައިވާނަމަ އެ އެއްބަސްވުން އޮތީ ފޮރިން މިނިސްޓްރީގައި ކަމުގައި ޑިފެންސުން މި މައްސަލާގެ އަޑުއެހުންތަކުގައި ބުނެފައިވާތީ އާރުޓީއައިގެ އެ ނުކުތާ ފޮރިންއަށް ބަދަލުކުރުމަށް ވެސް އައިކޮމް އިން ވަނީ އަންގާފަ އެވެ.
އިންޑިއާގެ އުޅަނދުތައް އޮޕަރޭޓުކުރަން ތިބި އެ ގައުމުގެ ސިފައިން ފޮނުވާލުމަށް ރައީސް ޑރ. މުހައްމަދު މުއިއްޒުގެ ވެވަޑައިގެންނެވި ވައުދާއެކު، ވެރިކަމަށް ވަޑައިގެން އެ މަސައްކަތް ފެށްޓެވި އެވެ. ނަމަވެސް އޭގެ ފަހުން އިންޑިއާގެ އުޅަނދުތައް އުދުހުނެވެ.
ތިން ބެޗަކަށް ބަހާލައިގެން އިންޑިއާގެ 76 ސިފައިން އަނބުރާ ގެންގޮސް ނިމުނު ކަމަށް ސަރުކާރުން ބުނީ މެއި 10، ގަ އެވެ. ބަދަލުގައި ގެނައީ އިންޑިއާގެ ސަރުކާރުން ހިންގާ ޑިފެންސް ކުންފުންޏެއްގެ މަދަނީން ކަމަށްވެސް ސަރުކާރުން ބުނެފައިވެ އެވެ. މަދަނީން އައި ފަހުން ވެސް އިންޑިއާގެ އުޅަނދުތައް އެކި ދަތުރުތައް ކޮށްފައިވާ ކަމަށް މި ނޫހަށް ވަނީ މައުލޫމާތު ލިބިފަ އެވެ.
ރަސްމީކޮށް ބަލިމީހުން އުފުލަން ފަށާ ޑޯނިއާއިން މިނިވަން ދުވަހު ދަތުރެއް ކޮށްފައިވާ ކަމަށް ރައީސް ވިދާޅުވި އެވެ. ނަމަވެސް މައުލޫމާތު ސިއްރުކުރުމުން އެ އުޅަނދުތަކުން މި ވެރިކަމުގައި ކުރި ދަތުރުތަކުގެ ޖުމްލަ އަދަދެއް ނޭނގެ އެވެ.
