ރައްޔިތުންގެ ތާއީދާއެކު މަޖިލީހަށް ހޮވޭ މެންބަރަކު އެ މަގާމުން ވަކިކުރުމުގެ ބާރު ސިޔާސީ ޕާޓީތަކުގެ އިސްވެރިންނަށް ލިބިދީގެން ނުވާނެ ކަމަށް ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް ވިދާޅުވެއްޖެ އެވެ.
މަޖިލީހުގެ މެންބަރުކަން ގެއްލޭ ހާލަތްތައް ހިމެނޭހެން ގާނޫނު އަސާސީ ބަދަލުކުރުމަށް ސަރުކާރުން ހުށަހަޅާފައިވާ ބިލަށް ބަހުސް ކުރައްވަމުން އެމްޑީޕީގެ ޓިކެޓެއްގައި އިންތިހާބުވެ ވަޑައިގެންފައިވާ މީކާއިލް ވިދާޅުވީ، އެންޓި ޑިފެކްޝަން ނުވަތަ ޕާޓީ ބަދަލުކުރުމުން ގޮނޑި ގެއްލޭ ފަދަ ނިޒާމަކަށް އޭނާ ވެސް ތާއީދުކުރާ ކަމަށެވެ. ނަމަވެސް އެ ބާރު ސިޔާސީ ޕާޓީގެ ވެރިންނަށް ދީގެން ނުވާނެ ކަމަށް އޭނާ ވިދާޅުވި އެވެ.
"ޕާޓީއެއްގެ އިސްވެރިން ބޭނުންވާ ކޮންމެ ދަނޑިވަޅެއްގައި ރައްޔިތުން އިންތިހާބުކޮށްފައި ހުރި މީހަކު ޓޮއް ކިޔާފައި. އިއްޒަތްތެރި ރައީސް. ޓޮއް ކިޔާފައި ވަކިކޮށްލެވޭ އުސޫލު އެއީކީއެއް އަޅުގަނޑުމެން ގަބޫލުކުރާ އުސޫލެއް ނޫން،" މީކާއިލް ވިދާޅުވި އެވެ.
ސަރުކާރުން ގާނޫނު އަސާސީއަށް ހުށަހަޅާފައިވަ ބަދަލުގެ ތެރޭގައި މަޖިލިސް މެންބަރުން ގޮނޑި ގެއްލޭނެ ގޮތަށް އޮތީ ދެ ހާލަތެކެވެ. އެއީ މެންބަރަކު ޕާޓީ ބަދަލުކުރުން ނުވަތަ އަމިއްލަ މެންބަރަކު ޕާޓީއަކަށް ސޮއިކުރުމާއި ޕާޓީން މެންބަރަކު ވަކިކުރުމެވެ. ޕާޓީން މެންބަރަކު ވަކިކުރުމުން ގޮނޑި ގެއްލޭނެ ކަމަށް މިހާރު އޮތް އެންޓި ޑިފެކްޝަން ގާނޫނުގައި ވެސް ނޯވެ އެވެ.
"ރައްޔިތުންގެ މަޖިލީހުގެ މަންދޫބުން ވަކިކުރެވޭނެ އިޖުރާތްތަކެއް ކަނޑައެޅިގެންދާއިރު އަޅުގަނޑުމެން އިސްކުރަން ޖެހޭނީ ރައްޔިތުން. އަޅުގަނޑުމެން ޖެހޭނީ އަހަން ޖެހޭނީ އެ ރައްޔިތުން ގާތު އޭނާ ވަކިކުރަން ބޭނުންތޯ،" މީކާއިލް ވިދާޅުވި އެވެ.
"ސިޔާސީ ޕާޓީތަކަކަށް ނޫން ބާރުތައް ޖަމާކުރަންވީތީ. އިއްޒަތްތެރި ރައީސް ތަފާސް ހިސާބުތަކުން އެކި ޕޯލްތަކުން އެނގޭ ގޮތުގައި ރައްޔިތުންގެ ތެރޭ ސިޔާސީ ޕާޓީތަކަށް އޮތް އިތުބާރު އިންތިހާއަށް ކުޑަ. އެހެންވީމާ ސިޔާސީ ޕާޓީއެއްގެ ލީޑަޝިޕުގަ ތިބޭ މަދު، ހަތަރު ފަސް ބޭފުޅުންނަށް ރައްޔިތުންގެ ތެރެއިން 5،000 މީހުން އިންތިހާބުކުރާ މަންދޫބެއް އެއްދުވަހުގެ ތެރޭ ވަކިކޮށްލެވޭ ގޮތަށް އޮންނަ އޮތުން އެއީ ރަނގަޅު ގޮތެއް ނޫން،"
މަޖިލިސް މެންބަރުންގެ ގޮނޑި ގެއްލޭނެ ހާލަތްތަކަށް ގެންނަ ބަދަލު ހިމެނޭހެން ސަރުކާރު ހިންގާ މައި ޕާޓީ، ޕީއެންސީގެ މެންބަރުންނަށް އެންގީ، މެންބަރުންނާއި ބައެެއް މިނިސްޓަރުންނާއެކު މުލިއާގޭގައި ރައީސް ޑރ. މުހައްމަދު މުއިއްޒު އިއްޔެ ބޭއްވި ބައްދަލުވުމެއްގަ އެވެ.
އެ އިސްލާހު ގެންނަން ބޭނުން ނުވާ މެންބަރުން ތިއްބެވިޔަސް، އެ ބައްދަލުވުމުގައި އެކަން ފާޅުގައި ވިދާޅުވީ މަދު މެންބަރުންތަކެއް ކަމަށް މައުލޫމާތު ލިބެ އެވެ. މިފަދަ އިސްލާހެއް ގެނައުމަށް ރައީސް ނިންމެވީ ރާއްޖޭގެ ޓޫރިޒަމް ދާއިރާގައި އެންމެ ފުޅާ ދާއިރާއެއްގައި ވިޔަފާރި ކުރައްވާ ބޭފުޅުންނާ ޗެލެންޖު ކުރެއްވިތާ ދެ ދުވަސް ފަހުންނެވެ.
