ސަރުކާރު ފަރާތުން ގާނޫނުއަސާސީ ބަދަލު ކުރަން ރައްޔިތުންގެ މަޖިލީހަށް ހުށަހަޅާފައިވާ ބިލުގެ މަސައްކަތް ފެށުމާއެކު މަޖިލީހުގެ ސެކިއުރިޓީ ވަރުގަދަކޮށް އެ ސަރަހައްދު ބަންދުކުރުމުގެ މަސައްކަތް ފުލުހުން ފަށައިފި އެވެ.
މަޖިލިސް ވަށައިގެންވާ މަގުތަކުގައި ގިނަ އަދަދެއްގެ ފުލުހުން މިހާރުވެސް ދަނީ ހަރަކާތްތެރިވަމުންނެވެ. އެގޮތުން މަޖިލިސް ކުރިމަތީ އޮންނަ ޕާކިން ޒޯނަށް ނުވަދެވޭނެހެން ބަންދުކޮށް މަޖިލިސް އިދާރާ ވަށައިގެންވާ މަގުތަކަށް ހަތަރު ފުރޮޅުލީ އުޅަނދުތަކަށް ނުވަދެވޭނެހެން ވަނީ ބަންދުކޮށްފަ އެވެ.
އަދި، އެ ސަރަހައްދު އެއްކޮށް ބަންދުކުރުމުގެ މަސައްކަތް ފަށާފައިވާކަން އެ ސަރަހައްދުގައި ތިބި ފުލުހުން ވަނީ "އަދަދު" ގެ ނޫސްވެރިންނަށް މައުލޫމާތު ދީފަ އެވެ. ނަމަވެސް, އެކަން ކުރަނީ ކޮން ސަބަބަކާ ހެދި ކަމެއް ފުލުހުން ސާފުކޮށެއް ނުދިނެވެ.
މިހާރު މަސައްކަތް ފަށާފައިވާ، ހުޅުދޫ ދާއިރާގެ މެންބަރު މުހައްމަދު ޝާހިދު ހުށަހެޅުއްވި ބިލުގައި ގާނޫނުއަސާސީއަށް މައިގަނޑު ފަސް ބަދަލެއް ގެންނަން ވަނީ ހުށަހަޅާފަ އެވެ. އޭގެތެރޭގައި މަޖިލިސް މެންބަރުންގެ ގޮނޑި ގެއްލޭ ހާލަތުތަކުގެ އިތުރުކުރަން ވެސް ވަނީ ހުށަހަޅާފަ އެވެ.
މަޖިލިސް މެންބަރުންގެ ގޮނޑި ގެއްލޭނެ ހާލަތްތަކަށް ގެންނަ ބަދަލު ހިމެނޭހެން ސަރުކާރު ހިންގާ މައި ޕާޓީ، ޕީއެންސީގެ މެންބަރުންނަށް އެންގީ، މެންބަރުންނާއި ބައެެއް މިނިސްޓަރުންނާ އެކު މުލިއާގޭގައި ރައީސް ޑރ. މުހައްމަދު މުއިއްޒު އިއްޔެ ބޭއްވި ބައްދަލުވުމެއްގަ އެވެ.
އެ އިސްލާހު ގެންނަން ބޭނުން ނުވާ މެންބަރުން ތިއްބެވިޔަސް، އެ ބައްދަލުވުމުގައި އެކަން ފާޅުގައި ވިދާޅުވީ މަދު މެންބަރެތަކެއް ކަމަށްވެ އެވެ. މިފަދަ އިސްލާހެއް ގެނައުމަށް ރައީސް ނިންމެވީ ރާއްޖޭގެ ޓޫރިޒަމް ދާއިރާގައި އެންމެ ފުޅާ ދާއިރާއެއްގައި ވިޔަފާރި ކުރައްވާ ބޭފުޅުންނާ ޗެލެންޖު ކުރެއްވިތާ ދެ ދުވަސް ފަހުންނެވެ.
މަޖިލިސް މެންބަރުން ވަކިވާ ހާލަތްތަކުގެ އިތުރުން، ރައީސަށް އިތުރު ބާރެއް ދިނުމާއި ރާއްޖޭގެ ސަރަހައްދަށް ބަދަލެއް އަންނަ ނަމަ މަޖިލީހުން ފާސްކުރުމާއި އަސްކަރީ ބޭނުމަށް ރާއްޖޭގައި ތިބެވޭނީ މަޖިލީހުގެ ރުހުން ހޯދައިގެން ކަމަށް މަޖިލީހަށް ހުށަހަޅާފައިވާ ބިލުގައި ބުނެފައިވެ އެވެ.
