ރައްޔިތުންގެ މަޖިލީހުގެ މެންބަރުން ޕާޓީ ބަދަލުކޮށްފިނަމަ ނުވަތަ ޕާޓީއިން ވަކިކޮށްފި ނަމަ ގޮނޑި ގެއްލޭ ގޮތަށް ގާނޫނުއަސާސީ މިއަދު ބަދަލު ކުރަން މަސައްކަތް ކުރާއިރު، އެފަދަ ބިލެއްގެ މަސައްކަތް ކުރިއަށް ގެންދާނީ އާންމުންގެ ހިޔާލު ހޯދައި ފުޅާ ދާއިރާއެއްގައި މަޝްވަރާ ކޮށްގެން ކަމަށް އެޓާނީ ޖެނެރަލް އަހުމަދު އުޝާމް މީގެ ދެ ހަފުތާ ކުރިން އޮތީ ވިދާޅުވެފަ އެވެ.
މަޖިލިސް މެންބަރުންގެ ގޮނޑި ގެއްލޭ ހާލަތުތަކުގެ އިތުރުން ވެސް ސަރުކާރުގެ ފަރާތުން ހުޅުދޫ ދާއިރާގެ މެންބަރު މުހައްމަދު ޝާހިދު ހުށަހެޅުއްވި ބިލުގައި ގާނޫނުއަސާސީއަށް މައިގަނޑު ފަސް ބަދަލެއް ގެންނަން ވަނީ ހުށަހަޅާފަ އެވެ.
ގާނޫނުއަސާސީއަށް ސަރުކާރުން ހުށަހަޅަން ބޭނުންވާ އިސްލާހުތަކާ ގުޅޭ ގޮތުން އުޝާމް ވާހަކަ ދެއްކެވީ އޮކްޓޯބަރު 30، ގައި ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގަ އެވެ. އަސާސީއަށް ބަދަލު ގެންނަ ބިލު ލަސްވަނީ ހޯދަން ޖެހޭ ހިޔާލާއި މަޝްވަރާތައް ގިނަވާތީ ކަމަށް ވެސް އޭނާ ވިދާޅުވި އެވެ.
"މީގެތެރެއިން ބައެއް އިސްލާހުތަކަކީ ވަރަށް އެކްސްޓެންސިވް ޕަބްލިކް ކޮންސަލްޓޭޝަން އަދި އެކި އެކި ފަރާތްތަކާ މަޝްވަރާ ކޮށްގެން ގާނޫނުއަސާސީއަށް ގެންނަން ޖެހޭ އިސްލާހުތަކެއް ކަމަށް އަޅުގަނޑުމެންނަށް ގަބޫލުކުރެވޭތީ އެކަމަށް ވަގުތު ކޮޅެއް ނަގަނީ،" އުޝާމް ވިދާޅުވި އެވެ.
އެގޮތުން، މި ދައުރުގެ ތެރޭ ގާނޫނުއަސާސީއަށް ބަދަލު ގެނައުމުގެ ފުރަތަމަ ބިލު ހުށަހަޅުއްވާނެ ކަމަށް ވެސް އެދުވަހު އޭނާ ވިދާޅުވި އެވެ. މިހާރު ހުށަހަޅާފައި ވަނީ އެ ދުވަހު ވިދާޅުވި ބިލު ކަމަށް ބެލެވެ އެވެ.
މަޖިލިސް މެންބަރުންގެ ގޮނޑި ގެއްލޭނެ ހާލަތްތަކަށް ގެންނަ ބަދަލު ހިމެނޭހެން ސަރުކާރު ހިންގާ މައި ޕާޓީ، ޕީއެންސީގެ މެންބަރުންނަށް އެންގީ، މެންބަރުންނާއި ބައެެއް މިނިސްޓަރުންނާއެކު މުލިއާގޭގައި ރައީސް ޑރ. މުހައްމަދު މުއިއްޒު އިއްޔެ ބޭއްވި ބައްދަލުވުމެއްގަ އެވެ.
އެ އިސްލާހު ގެންނަން ބޭނުން ނުވާ މެންބަރުން ތިއްބެވިޔަސް، އެ ބައްދަލުވުމުގައި އެކަން ފާޅުގައި ވިދާޅުވީ މަދު މެންބަރެތަކެއް ކަމަށްވެ އެވެ. މިފަދަ އިސްލާހެއް ގެނައުމަށް ރައީސް ނިންމެވީ ރާއްޖޭގެ ޓޫރިޒަމް ދާއިރާގައި އެންމެ ފުޅާ ދާއިރާއެއްގައި ވިޔަފާރި ކުރައްވާ ބޭފުޅުންނާ ޗެލެންޖު ކުރެއްވިތާ ދެ ދުވަސް ފަހުންނެވެ.
މަޖިލިސް މެންބަރުން ވަކިވާ ހާލަތްތަކުގެ އިތުރުން، ރައީސަށް އިތުރު ބާރެއް ދިނުމާއި ރާއްޖޭގެ ސަރަހައްދަށް ބަދަލެއް އަންނަ ނަމަ މަޖިލީހުން ފާސްކުރުމާއި އަސްކަރީ ބޭނުމަށް ރާއްޖޭގައި ތިބެވޭނީ މަޖިލީހުގެ ރުހުން ހޯދައިގެން ކަމަށް މަޖިލީހަށް ހުށަހަޅާފައިވާ ބިލުގައި ބުނެފައިވެ އެވެ.
