ރާއްޖޭގައި ހުންނަ ޗައިނާގެ އެމްބަސީގެ އޮފިޝަލުން ނައިބު ރައީސް ހުސައިން މުހައްމަދު ލަތީފުއާ ބައްދަލުކުރައްވައިފި އެވެ.
ނައިބު ރައީސްގެ ރަސްމީ ގެކޮޅު ހިލާލީގޭގައި މި ބައްދަލުވުން ކުރިއަށް ދިޔައީ މިއަދު ހަވީރުގެ ވަގުތެއްގަ އެވެ. ބައްދަލުވުން ނިންމާލުމަށްފަހު ޗައިނާގެ އޮފިޝަލުން ހިލާލީގެ ދޫކޮށް ދިޔައީ 5:30 ހާއިރު އެވެ.
ހިލާލީގޭގައި ކުރިއަށް ދިޔަ މި ބައްދަލުވުމަށް ޗައިނާގެ އެމްބަސީގެ އޮފިޝަލުން ދަތުރުކުރި ޑިޕްލޮމެޓިކް ކާރު އެ ގޭގެ ޕާކިން ޒޯނުގައި އޮއްވައި "އަދަދު" ގެ ނޫސްވެރިންނަށް ވަނީ ފެނިފަ އެވެ. ނަމަވެސް މި ބައްދަލުވުމުގައި ރާއްޖޭގައި ހުންނަވާ ޗައިނާގެ ސަފީރު ވާން ލިޖިން ބައިވެރިވެވަޑައިގެންނެވި ކަމެއް ޔަގީނެއް ނޫނެވެ.
އެ ބައްދަލުވުމުގައި ނައިބު ރައީސްގެ ގޭގައި ދިވެހި ސަރުކާރުގެ އޮފިޝަލުންގެ ތެރެއިން ބައިވެރިވީ ކޮން ފަރާތްތަކެއްކަން ވެސް މިހާތަނަށް ޔަގީނެއް ނޫނެވެ.
ޗައިނާގެ އޮފިޝަލުން ނައިބު ރައީސް އާއެކު ވަކިން ބައްދަލު ކުރިއިރު، މި ސަރުކާރުން ގެންދަނީ އެ ގައުމާއެކު ގާތް ގުޅުމެއް ބާއްވަމުންނެވެ. އެގޮތުން މި އަހަރުގެ ޖެނުއަރީގައި ރައީސް ޑރ. މުހައްމަދު މުއިއްޒު ޗައިނާއަށް ކުރެއްވި ރަސްމީ ދަތުރުގައި އެ ގައުމާއެކު ގިނަ އެއްބަސްވުންތަކެއްގައި ވަނީ ސޮއިކޮށްފަ އެވެ.
