ސަރުކާރު ސްކޫލްތަކުގައި ކިޔަވަމުންދިޔަ ދަރިވަރުންނާއި ޓީޗަރުން ބޭނުން ކުރަން ޓެބްލެޓުތަކެއް ފޯރުކޮށްދިނުމަށް 2017 ގައި މެކްސްކޮމް ޓެކްނޮލިޖީސް އާއެކު އެޑިއުކޭޝަން މިނިސްޓަރީން ވެފައި އޮތް އެއްބަސްވުމުގެ ދަށުން، އެ ކުންފުންޏަށް ދޭންޖެހޭ ފައިސާގެ ތެރެއިން ދައުލަތުން ހިފަހައްޓާފައި ހުރި 15 ޕަސެންޓު ވެސް އެ ކުންފުންޏަށް ދޭން ސިވިލް ކޯޓުން ހުކުމްކޮށްފި އެވެ.
އެ ކޯޓުން އިއްޔެ ކުރި ހުކުމް ކުރީ އެޑިއުކޭޝަން މިނިސްޓަރީ އާއި މެކްސްކޮމް އާ ދެމެދު ވެފައި އޮތް އެއްބަސްވުމުގެ ދަށުން މިނިސްޓަރީއަށް ފޯރުކޮށްދިން ޓެބްލެޓުތަކަށް ދޭންޖެހޭ ޖުމުލަ ފައިސާގެ ތެރެއިން، ނުދީ ހިފަހައްޓާފައި ހުރި 23.6 މިލިއަން ރުފިޔާ، އަންނަ ޑިސެމްބަރު 1 ގެ ކުރިން އެ ކުންފުންޏަށް ދޫކުރުމަށެވެ.
މިއީ ކުރީގެ ރައީސް ޔާމީނުގެ ވެރިކަމުގައި ސަރުކާރު ސްކޫލްތަކަށް 71،400 ޓެބްލެޓު ފޯރުކޮށްދިނުމަށް ކުރެވުނު މުއާމަލާތުގެ 15 ޕަސެންޓު ފައިސާ އެވެ. ދައުލަތުން މި ފައިސާތައް ހިފަހައްޓާފައި ހުރީ ސްކޫލްތަކަށް ޓެބުލެޓުތައް ފޯރުކޮށްދޭން އޮތް މުއްދަތުގައި އެކަން ކޮށްފައި ނުވާ ކަމަށް ބުނެ ދައުލަތުން ހިފަހައްޓާފައި ހުރި ފައިސާ އެވެ.
މެކްސްކޮމް އިން ސިވިލް ކޯޓަށް މައްސަލަ ހުށަހެޅީ ޓެބްލެޓުތައް ފޯރުކޮށްދިނުން ލަސްވީ އެޑިއުކޭޝަނުގެ ޒިންމާ އަދާ ނުކުރުމުން ކަމަށް ކަނޑައަޅައި، ދައުލަތުން ހިފަހައްޓާފައި ހުރި ފައިސާ ހޯދައިދިނުމަށް އެދި އެވެ.
ނަމަވެސް ދައުލަތުން ކޯޓުގައި ބުނެފައި ވަނީ އެ ފައިސާ ހިފަހެއްޓީ، ދެ ފަރާތުގެ މެދުގައި ވެވުނު އެއްބަސްވުމުގައި ބަޔާން ކޮށްފައިވާ މުއްދަތުގައި މެކްސްކޮމްއިން މަސައްކަތް ނިންމާފައި ނުވާތީ، ދެ ފަރާތުގެ ދެމެދުގައި ވެވުނު އެއްބަސްވުމާއި ދައުލަތުގެ މާލިއްޔަތު ގަވާއިދުގެ 10.71 ވަނަ މާއްދާގައި ބަޔާން ކުރާ އުސޫލުތަކާ އެއްގޮތަށް ކަމަށެވެ.
ދައުލަތުން އެއްބަސްވުމުގައި ބުނާ މުއްދަތަށް މެކްސްކޮމްއިން މަސައްކަތް ނިންމާފައި ނުވަނީ އެޑިއުކޭޝަން މިނިސްޓަރީން އަދާ ކުރަންޖެހޭ އަދާ ނުކުރުމުގެ ސަބަބުން ނޫން ކަމަށް ކަނޑައަޅައި ދިނުމަށެވެ.
ދެފަރާތުގެ ދެމެދުގައި ވެފައި އޮތް އެއްބަސްވުމުގައި ބުނެފައި ވަނީ:
- މަސައްކަތުގެ ޖުމުލަ އަގަކީ 157.7 މިލިއަން ރުފިޔާ
- މަސައްކަތް ފެށޭ ތާރީހެއް ކަމަށް އޮތީ ޑިސެމްބަރު 9، 2017
- މަސައްކަތް ނިންމަންޖެހޭ ތާރީހަކީ ފެބްރުއަރީ 2، 2018
މެކްސްކޮމް އާ އެއްކޮޅަށް، ސިވިލް ކޯޓުން ކުރި ހުކުމުގައި ބުނެފައި ވަނީ އެ މައްސަލައިގެ ފަސްފަހަތަށް ބެލުމުން، މަސައްކަތް ނިންމަންޖެހޭ ތާރީހު ޖޫން 19، 2018 އަށް އިތުރު ކޮށްދީފައިވާކަން އެނގޭ ކަމަށެވެ.
ނަމަވެސް އެ މުއްދަތަށް ވެސް މަސައްކަތް ނިންމިފައި ނުވަނީ އެޑިއުކޭޝަނާ އެކު މެކްސްކޮމް އިން ވީ އެއްބަސްވުމުގައި އެ ޓެބްލެޓުތައް ޑެލިވާ ކުރަންޖެހޭ ސްކޫލްތަކުގެ ތަފުސީލުތައް ނެތުމުން ކަމަށެވެ. އަދި ސްކޫލްތަކަށް ފޯރުކޮށްދިން ޓެބްލެޓުތައް އެކްޓިވޭޓު ކުރުމުގައި ވެސް ސްކޫލްތަކުން ލަސްކަމެއް ގެންގުޅެފައިވާތީ ކަމަށް ސިވިލް ކޯޓުން ފާހަގަ ކޮށްފައިވެ އެވެ.
