ބޯކޮށް ވާރޭ ވެހުމުގެ ސަބަބުން ހިނގާބިނގާވެ އުޅުމަށާއި، އުޅަނދުތައް ދުއްވަން ދަތިވާ މިންވަރަށް މާލޭގެ ގިނަ މަގުތަކެއްގައި ފެންބޮޑުވެއްޖެ އެވެ.
އެންމެ ބޮޑަށް ފެންބޮޑުވެފައި ވަނީ އައިޖީއެމް ހޮސްޕިޓަލް ސަރަހައްދު ހިމެނޭ ގޮތަށް މާފަންނުގެ ގިނަ މަގުތަކެކެވެ. މަޖީދީމަގާއި، އެހެން ސަރަހައްދުތަކުގެ ބައެއް މަގުތައް ވެސް އޮތީ ފެނު އަޑީގަ އެވެ.
އެހެންވެ، ފެން ހިންދުމުގެ މަސައްކަތް އެމްއެންޑީއެފުން މިހާރު ވަނީ ފަށައިފަ އެވެ.
މާފަންނުގައި ފެންބޮޑުވާ މައްސަލަ ހައްލު ކުރަން، އެ ސަރަހައްދުގައި ހުރި ފެން ހިންދާ ނިޒާމުތައް ވެސް ދާދި ފަހުން ސަރުކާރުން ރަނގަޅުކުރި އެވެ.
ނަމަވެސް އެ ސަރަހައްދުތަކުގައި މިހާރު ވެސް އޮތީ ފެންބޮޑުވެފަ އެވެ.
ކަނބާއައިޝާރަނި ހިނގުމުގައި ފެންބޮޑުވެފައި. -- ފޮޓޯ: އަދަދު
މިއަދު ރާއްޖޭގެ ބޮޑު ސަރަހައްދަކަށް މޫސުން ގޯސްވާނެ ކަމާއި ބައެއް ރަށްތަކަށް ބޯކޮށް ވާރޭ ވެހޭނެ ކަމަށް މޫސުމާބެހޭ ގައުމީ އިދާރާ މޯލްޑިވްސް މީޓިއޮރޮލޮޖިކަލް ސާވިސްއިން ވަނީ ބުނެފަ އެވެ.
މެޓް އޮފީހުން ބުނީ ރާއްޖޭގެ އެކި ހިސާބުތަކަށް ވިއްސާރަ ކުރުމާއެކު ގުގުރާނެ ކަމަށާއި، ދެކުނާއި މެދުރާއްޖެތެރޭގެ ބައެއް ރަށްތަކަށް ބޯކޮށް ވާރޭ ވެހޭނެ ކަމަށެވެ.
ސެޓްލައިޓު ފޮޓޯތަކުން ފެންނަ ގޮތުގައި ރާއްޖޭގެ ދެކުނުގެ އަތޮޅުތަކުގެ މަތީގައި ވިއްސާރަ ވިލާ އުފެދިފައިވެ އެވެ.
މިއަދު ހަވީރު 6 ޖެހުމާ ހަމައަށް މޫސުން ގޯސްކޮށް ދައްކާ ކަމަށް މެޓު އޮފީހުން ލަފާކުރާއިރު، ދެކުނުގެ އަތޮޅުތަކަށް ވައިގެ ބާރުމިން ހުންނާނީ ގަޑިއަކު 5 މޭލާއި 15 މޭލުގަ އެވެ. އެހެން ހިސާބުތަކަށް 3 މީލާއި 13 މޭލުގަ އެވެ.
