ޒެމްބިއާ އިންޓަނޭޝަނަލް 2024 ބެޑްމިންޓަން މުބާރާތުގެ އަންހެން ޑަބަލްސްގެ ފައިނަލުން ރިވައިވަލް ސްޕޯޓްސް ކްލަބާ އެކު، މުބާރާތުގައި ވާދަކުރަމުން އަންނަ ގައުމީ ބެޑްމިންޓަން ޓީމުގެ އައިމިނަތު ނަބީހާ (ނަބީ) އާއި ފާތިމަތު ނަބާހާ (ނަބާ)ގެ ޕެއާ އިން ފުރުސަތު ހޯދައިފި އެވެ.
ސެމީ ފައިނަލުގައި ނަބީ އާއި ނަބާގެ ޕެއާ އިން ވަނީ، އަޒަރުބައިޖާންގެ ޕެއާ އެއް ކަމަށްވާ އީރާ މަފްތުހާ އާއި ހާޖަރު ނުރިޔޭވާގެ ޕެއާ އަތުން 2-1 ސެޓުން މޮޅުވެގެންނެވެ. ސެޓުތައް ދިޔައީ، 19-21، 21-15 އަދި 21-14 އިންނެވެ. ކުއާޓާ ފައިނަލުގައި ނަބީ އާއި ނަބާ ވަނީ ކުއާޓާ ފައިނަލުގައި، ޒެމްބިއާގެ ބޫޕޭ މާބޯ އާއި ޓުކޫޒާ އެމްބޭވޭގެ ޕެއާ އަތުން 21-04، 21-05 އިން މޮޅުވެފަ އެވެ.
ފައިނަލުގައި ނަބާ އާއި ނަބީގެ ޕެއާ މާދަމާ ކުޅޭނީ ސްރީ ލަންކާގެ ހަސީނީ އަމްބަލަންގޮޑަގޭ އާއި ހަސާރާ ވިޖަރަޔަތުނޭގެ ޕެއާއާ އެވެ.
މިކްސް ޑަބަލްސްގައި ޒަޔާން ޒަކީ އާއި ނަބާގެ ޕެއާ ވަނީ ސެމީ ފައިނަލުގައި ވާދަކޮށް ބަލިވެފަ އެވެ. އެ ގޮތުން، ޒަޔާން އާއި ނަބާގެ ޕެއާ އަތުން އަޒަރުބައިޖާންގެ އާގިލް ގަބިލޯވް އާއި އީރާގެ ޕެއާ މޮޅުވީ، 21-19، 21-16 އިންނެވެ. ކުއާޓާގައި ނަބާ އާއި ޒަޔާންގެ ޕެއާ މޮޅުވީ، ޒެމްބިއާގެ އަލިންޓޫލާ ހަބޯވާ އާއި އަންޖުމަން ބަރްދްވާޖުގެ ޕެއާ އަތުން 21-10، 21-14 އިންނެވެ.
އަންހެން ސިންގަލްސްގައި ނަބާ ވަނީ ސެމީ ފައިނަލުގައި އަޒަރުބައިޖާންގެ އީރާ އަތުން ތިން ސެޓު ކުޅެގެން ބަލިވެފަ އެވެ. ސެޓުތައް ދިޔައީ، 21-18، 14-21 އަދި 10-21 އިންނެވެ. ކުއާޓާ ފައިނަލުގައި ނަބާ ވަނީ، ޒެމްބިއާގެ ސަލިފްޔަންޖީ ސިމްވަކާއާ ކުޅެގެން، 21-02 އާއި 21-01 އިން މޮޅުވެފަ އެެވެ.
ކުއާޓާ ފައިނަލުގައި ރާއްޖޭގެ ފިރިހެން ޑަބަލްސް ޕެއާ، ޒަޔާން އާއި ނިބާލް އަހުމަދު ކުޅުނު މެޗުން އަޒަރުބައިޖާންގެ ގަބީލޯވް އާއި ޕެންގެސްޓޫގެ ޕެއާ އަތުން ބަލިވީ 21-07، 21-09 އިންނެވެ. ނިބާލް އާއި ނަބީގެ މިކްސް ޑަބަލްސްގެ ކުއާޓާގައި ބަލިވީ އަޒަރުބައިޖާންގެ ޖާހިދު އަލްހަސަނޯފް އާއި ހާޖަރުގެ ޕެއާ އަތުންނެވެ. ސެޓުތައް ދިޔައީ، 21-16، 23-21 އިންނެވެ. އަދި އަންހެން ސިންގަލްސް ކުއާޓާގައި ނަބީ ވަނީ އަޒަރުބައިޖާންގެ ހާޖަރު އަތުން 21-18، 21-18 އިން ބަލިވެފަ އެވެ.
މިއީ، ނަބީ އާއި ނަބާ، ރިވައިވަލްއާ އެކު، ވާދަކުރާ ދެ ވަނަ މުބާރާތެވެ. ފުރަތަމަ މުބާރާތުގައި މިދިޔަ އަހަރު ޔޫގާންޑާ ސީރީސްގެ އަންހެން ޑަބަލްސް އިން ސެމީ ފައިނަލުގައި ކުޅެ ލޯ މެޑަލް ހޯދި އެވެ.
