އިންޑިއާގެ އިތުރުން މުޅި ދުނިޔެ އިން ވެސް ފާހަގަކޮށްލެވޭ އެންމެ މުއްސަނދި އެއް މަހުޖަނު، މުކޭޝް އަމްބާނީގެ އެންމެ ހަގު ދަރިފުޅު، އަނަންތު އަމްބާނީ ރާއްޖޭގައި ޗުއްޓީ ހޭދަކޮށްފި އެވެ.
ޗުއްޓީ ދަތުރުގައި އަނަންތު ވަނީ ހދ. މަކުނުދޫއަށް ޒިޔާރަތްކޮށްފަ އެވެ. އެ ރަށުން ތިން މުސަޅާއި ކުކުޅެއް އޭނާ ގަތެވެ.
މަކުނުދޫއިން އަނަންތުއަށް ހިދުމަތް ދިން މުހައްމަދު ސާނިހު "އަދަދު" އާ ވާހަކަ ދައްކަމުން ބުނީ އޭނާ ރަށަށް އައިސް ދިމާވުމުން އެދުނީ ޖަނަވާރުތައް ގެންގުޅޭ ތަނަކަށް ގެންގޮސް ދިނުމަށް ކަމަށެވެ.
"ރަށަށް އައީ އޭނާގެ ސެކިއުރިޓީންނާއި ޑޮކްޓަރުންނާ އެކު. ޖަނަވާރު އެއްޗެހި ހުރިތަނަކަށް ދާން ބޭނުންވީ. އެ އެއްޗެހި ގެންގުޅޭ ގެއަކަށް ގެންދިޔުމުން ތިން މުސަޅާއި ކުކުޅެއް ގަތީ،" ސާނިހް ބުންޏެވެ.
މަކުނުދޫގައި އަނަންތު 20 ވަރަކަށް މިނެޓު މަޑުކުރި ކަމަށްވެ އެވެ. ސާނިހު ބުނީ ސެކިއުރިޓީން ކައިރީގައި ތިބުމުން މާ ގިނަ ވާހަކައެއް ނުދެއްކުނު ކަމަށާއި އޭނާއަށް ރަނގަޅު ހިދުމަތެއް ދެވުނީތީ އެކަމާ އުފާވާ ކަމަށެވެ.
"އެކަހަލަ މީހަކު އައީމަ ވަރަަށް ފަހުރުވެރިވި މި ރަށަށް. ހާއްސަކޮށް ރަނގަޅު ހިދުމަތެއް ފޯރުކޮށްދެވުނީމަ އުފާވި. ދަމުން ބުނި ޓިޕްސް ފޮނުވާނަމޭ ވެސް،" ސާނިހް ބުންޏެވެ.
އަނަންތުގެ އާއިލާ ރާއްޖެ އައިސް ޗުއްޓީ ހޭދަކުރަމުންދަނީ މަކުނުދޫ ކައިރީ އަލަށް ހުޅުވި ސޮނޭވާ ސީކްރެޓްގަ އެވެ. އޭނާ އެތަނުގައި ޗުއްޓީ ހޭދަކުރަމުން ދަނީ ދާދި ފަހުން ކައިވެނިކުރި ރާދިކާ މާޗަންޓްއާ އެކުގަ އެވެ.
މިދިޔަ ޖުލައި މަހު އަނަންތު އާއި ރާދިކާ ކައިވެނި ކުރިއިރު އެ ކައިވެންޏަކީ ދުނިޔޭގައި ވެސް މިހާތަނަށް ބޭއްވި އެންމެ އަގުބޮޑު އެއް ކައިވެނި ހަފުލާ އެވެ. އެ ހަފުލާގައި ދުނިޔޭގެ އެކި ކަންކޮޅުން މަޝްހޫރު ގިނަ ތަރިން ބައިވެރިވި އެވެ. ރާއްޖޭގެ ކުރީގެ ރައީސް މުހައްމަދު ނަޝީދު ވެސް އަނަންތުގެ ކައިވެނި ހަފުލާއަށް ވަޑައިގަތެވެ.
