ގަވާއިދާ ހިލާފަށް ރާއްޖެ އެތެރެވެ އުޅުނު ބޯޓެއް ޑްރޯން ބޭނުންކޮށްގެން ހޯދާފައިވާ ކަމަށް މޯލްޑިވްސް ނެޝަނަލް ޑިފެންސް ފޯސް އިން މިއަދު ބުނެފި އެވެ.
އެމްއެންޑީއެފްއިން ބުނީ ބޭރު ގައުމެއްގެ އެ އުޅަނދު ހޯދީ ސިފައިންގެ އެއާ ކޯ އާއި ކޯސްޓް ގާޑުން ހިންގި އޮޕަރޭޝަނެއްގެ ތެރެއިން ކަމަށެވެ.
ބޭރުގެ އެ އުޅަނދު މިހާރު ވަނީ ކޯސްޓް ގާޑުގެ ބެލުމުގެ ދަށަށް ގެންގޮސްފައި ކަމަށް ވެސް އެމްއެންޑީއެފް އިން ބުނެ އެވެ.
ސިފައިން އާންމު ކުރި ފޮޓޯއިން ފެންނަ ގޮތުގައި އެ ބޯޓަކީ މަސްވެރިކަން ކުރުމަށް ބޭނުން ކުރާ ބޯޓެކެވެ. ނަމަވެސް އެ ބޯޓު ރާއްޖޭގެ ސަރަހައްދަށް ވަދެ އުޅުނީ ކީއްކުރަން ކަމެއް މިހާތަނަށް ސާފެއް ނޫނެވެ.
އެ ބޯޓާ ގުޅޭ އިތުރު ތަފްސީލެއް އަދި އެ ބޯޓުގައި ތިބީ ކިތައް ފަޅުވެރިން ކަމެއް ވެސް އެމްއެންޑީއެފްއިން ނުބުނެ އެވެ.
ތުރުކީގެ ކުންފުންޏަކުން އެމްއެންޑީއެފްގެ އެއާކޯއަށް ޑްރޯން ގެނައީ ދައުލަތުގެ ބަޖެޓުން 37 މިލިއަން ޑޮލަރު (570 މިލިއަން ރުފިޔާ) ހޭދަކޮށްގެންނެވެ.
